خضدار کے مختلف علاقوں میں شدید بارش کے سبب تباہی
دی بلوچستان پوسٹ ویب ڈیسک کو موصول ہونے والی اطلاعات کے مطابق ضلع خضدار کے علاقوں کودہ اور نال میں بارش سے فصلیں اور سڑکیں تباہ ہوگئیں۔
گزشتہ شب شدید بارش کی وجہ سے کودہ کے علاقے میں پیاز، کپاس، ٹماٹر اور دیگر کھڑی فصلیں تباہ ہوگئیں۔ طوفانی ہوائوں کے باعث ٹیوب ویلوں کے سولر پلیٹ اڑ گئے جس کے باعث زمینداروں کو لاکھوں روپے کے نقصانات اٹھانے کا سامنا کرنا پڑرہا ہے۔
ضلع خضدار کے تحصیل نال میں بارش کے باعث ٹوبڑو کے مقام پر گروک سڑک ٹوٹ گئی۔ جس کے باعث آمدورفت میں مشکلات درپیش ہورہی ہیں۔
علاقائی ذرائع کا کہنا ہے پل چھوٹے ہونے کی وجہ سے پانی سڑک کو عبور کرتی ہے جس کے باعث گزشتہ رات پانی کا تیز بہاؤ روڈ کو بہا کر لے گئی۔
لوگوں نے مطالبہ کیا ہے کہ روڈ کی فوری بھرائی کرکے عوام کو جانی و مالی نقصان اٹھانے سے بچایا جائے۔
