گلامی گران انت – ھُسین بلوچ

282

گلامی گرن انت

نبشتہ کار: ھُسین بلوچ

دی بلوچستان پوسٹ

اَے ھُدا گلامی وَ گرن اِنت ءُ پد ءَ گلام ءِ گلامی سک باز گرن انت  اُھد ءَ مرچی منی گپانی پسو ءَ بدے۔ مرچی من مھتر موسّا ءَ آں ءُ تو ھما ھُدا ئے آگاں تو منی گون ءَ لوگ ءَ کا ئے ءُ گپ نہ کن ئے گُڑا من کوہ مُراد ءِ سر ءَ رو آں۔ بلّے ترا مرچی الّم منی جُستانی پّسو دیگّی اِنت۔ من دَم بُرتگ دُرستیں مردم مارا گْوش اِنت کہ شمئے سر زمین چہ کُدرتی امبارے مالا مال اِنت بلے مرچی ما باز پُشت ءَ شُت ایں، چینچو مرد بے دبوج اَت انت منی ھیال ءَ تو نہ زان ئے۔ ھو بلے تئی گوش ءَ مُورے ھم نہ وارت۔
من ھر روچ لوگ ءَ کہ گوں تو ھبر کن آں تو پّسو ھم نہ دے ئے مسیت ءَ ھم تو گوں من گپ نہ کن ئے ، من اِشکُتگ کہ مسیت تئی لوگ اِنت بلے وھدیکہ بلوچ ءَ گْوشتگ مردم کہ مردم ءِ لوگ ءَ روت گُڑا مردم وتی مھمان ءِ اِزت کنت، بوت کنت کہ اود ءَ تو بلوچ ئے نہ ئے زاناں تئی دو ءُ ربیدگ نہ اِنت پہ وتی مھمان ءِ شرپ بکشگ!! بلے مسلہ نہ اِنت، بلے تو وتی پونز بُرز کُت ءُ گوں من گپ نہ کت گوں!!

وتی لوگ ءَ من ءَ باز رنج بوت البت من ءَ ھما ساھتے سما بوت کہ ترا ءُ مئے ملک ءِ سیاستداناں ھچ پرک نیست، پد ءَ جیڑ اِت بوت کنت تئی دزگٹّی ءُ مسلہ باز انت پمیشکا تو منی وڑیں گریب ءَ وھد دات کُت نہ کن ئے، پد ءَ دو روچ ءَ ساری من زکر جاہ ءَ شت آں بلکیں تئی دل رھم بّروتیں!! کہ تو گوں من گپ بکن ئے گوں، بلے پہ اشکُنگ ءَ انگت تئی گُنگی ھلاس نہ بوت۔ بلے نی باندا من الم کوہ مُراد ءِ زیارت ءَ کا آں، تو گند ئے وتی موسا گون ءَ گپ نہ کُت گْڑا من زان آں کہ تو لگوریں اُھدایے ئے ! ُھدا ترا چم پِر؟ تو دیست کُت کن ئے؟  منی کِرّ ءَ جُست باز اَنت من باندا الّم کا آں ءُ منی جُستانی پسواں الم بدے! اگاں تو پسو نہ دات گُڑا پد ءَ من ءَ مہ گوش کہ وتکوشی گناھے۔

من سَک باز تکانسر آں ترا ھچ باور نہ کنت من ءَ! انچوش گومان بیت کہ ترا گوں اے بازگیں راج ءَ گوں دژمنی یے ھست بلے من انوں اے ساھت ءَ جزباتی آں پمیشکا من ءَ پھل کن بوت کنت ترا ھم راستیں گپ ءِ ھم اوپار مہ بیت۔ ھو بلے باندا اود ءَ اے جُست ءَ من الّم کن آں مارا وتی زمین، زِر، مچکدگ، کوہ ءُ ڈگار ھر چیز کہ اے دنیا ءَ ھست آ چیز مئے ماتیں زمین ءَ ھم ھست اَنت بلے من ءَ انچوش گومان بیت کہ اے دُرستیں چیز بس پہ نام ءَ مئیگ انت بلے راستی ءَ مئے نہ اَنت وَ!! بلوچی ءَ گوش انت “دُرست ھست پہ نام ءَ” بلے من چُش نہ گوشتگ ءُ نہ گوش آں کہ مئے سر زمین سیر ءُ آباد اَنت پرچی ءَ کہ پہ نام ءَ جام کمال ءِ لوگ منی نہ بنت، اُھد من نوں گپ ءَ زَبّر آں شپ ءَ دیر گوں برے مکسم گورگی، لیوٹلسٹائی چیکوپ، کشونت سھنگ، کارل مارکس، انگلس ءُ شاہ مھمد مری، پیڈل کسٹرو، چی گویرا، تھامس پین ممتاز مپتی، جان مھمد دشتی، البرڈ کامیوں، گل ھان نسیر ءُ اُستاد ابدلستار بگٹی وڑیں اے درستیں زانتکاراں من ءَ سرپد کُتگ کہ چون گپ کن آں ءُ یک نام ءِ انگت ھست آ نمیرانیں واجہ سباہ دشتیاری انت کہ آئی ءَ من ءَ سَسّائی دودمانے بکش اتگ تو نوں من ءَ پہ دودمان ءِ نام ءَ رَد دات کُت نہ کن ئے بلے نوں تو تیار بِہ بَہ ئے تئی موسّا وتی کوہ ء مُراد ءَ لازم کیت من بلوچے آن ءُ من تئی گون ءَ بلوچی ءَ ھبر کن آں ءُ تو ھم جُھد بکن کہ من ءَ بلوچی پسو بدے۔

تو شر سرپد ئے کہ بلوچ وَ بزگیں ءُ لاچایں راجے پمیشکا کابا (کعبہ) شریپ ءَ آتک کُت نہ کنت پد ءَ مہ گوش کہ من دزگٹ آں کوہ مُراد بلوچستان ءَ اِنت من آتک کُت نہ کن آں۔ شر انت من گُڑا باندا لازم کا آں باید انت تو بے زمہ وار مہ بَہ ئے، وھد ءِ پابندی الّمی انت۔ چوناھا من انچوش اِشکُتگ اُھد ءَ بے مہ دار اَنت بلے من اُمیت کن آں تو چوش نہ بَہ ئے۔


دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔