پہ ڈیھ ءَ ھرکس نمیران بُوَگ لوٹیت
نبشتاکار سراج نور
دی بلوچستان پوسٹ
ڈیھ نام ءُ ننگ ءُ شرپ ءُ ازت اِنت ڈیھ پجار ءُ نشان اِنت ڈیھ ماس اِنت ءُ پت ءِ مھری نود اَنت. ڈیھ راجانی پجار اِنت ڈیھ سیاد ءُ وارث ءُ ھمبلانی سنگتانی سارتیں سمین اِنت ڈیھ راجانی زندمان ءِ مانزمان اِنت ڈیھ مُرگ ءُ پَس ءُ دلوتانی ساھگ اِنت.
ڈیھ دھکان ءُ مزدور ءُ بزگرانی اُمیت اِنت ڈیھ سرمچارانی ھمت ءُ جپاکشی، جُنزگ ءُ جزبگ ءِ نشانی اِنت. ھمے واست ءَ ھرکس کولیگ بوگ لوٹ ایت، مرگ ءَ پد زندگ بوگ لوٹ ایت ھمے ھاتر ءَ واجد ءِ مکھیں مات گُشیت من وتی بچ ءُ جنکاں واجد ءِ کشک ءِ روگ ءَ نہ داریں. ھمے وڑ ءُ الیاس نزر جان ءِ مکھیں مات ءَ گُشت کہ منی تنگویں بچ پہ گلزمین ءَ شھید بیتگ من ھچ تکانسر نھاں۔
ھمے ھاتر ءَ شھید رزاجانگیر ءِ مکھیں مات موتک ءِ بدل ءَ نازینک الھان کنت. ھمے ھاتر ءَ ھیربکش مری بالاچ ءِ پرس ءَ نہ داریت پرچا کہ آ گُشیت کہ بالاچ نہ مُرتگ بالاچ شھید بیتگ ، بالاچ نمیران انت. دگے ھزاراں مات ءُ پت بس ھمے شرپ ءَ لوٹ انت۔
ڈیھ ءَ گوں مھر کنوکانی دوستی انچو مُھکم انت کہ نیلسن منڈیلا بیست ءُ ھشت سال بندیگ جاھاں گوازین ایت. ڈیھ ءِ بُو انچو وش اِنت کہ بھگت سنگھ پاھو ءَ چُکیت ءُ گُٹ ءَ کنت.
ڈیھ ءِ مھر انچیں مھرے کہ اُستاد اسلم ءُ ماتی یاسمین وتی جوانسالیں بچ ءَ دست ءَ بڈ ءَ جن انت ءُ دیم دئینت پہ ڈیھ ءِ دیمونیاں کولیگ بوگ ءَ.
مرچی بلوچستان ءِ وانگ جاھاں دُز ءُ ڈونگانی نام گرگ بیت بلے بلوچستان ءِ ھیروانی گرگ نہ بیت۔ بلے بلوچستان ءَ ھر گس ءَ ھر ماتے کہ زھگ ءَ واپینیت گُڑا زھگ ءَ دودا ءِ کسّہ ءَ ھمل جئیند ءِ کسّہ، جلال ھان ءِ کسہ ءُ دِگے ھزاراں کسّہ گُشیت۔
بلوچستان ءَ ھر زھگ زانت کہ ڈاکٹر چِے کے انت، منڈیلا کے اِنت ،اکبر بگٹی کے اِنت ، ڈاکٹر منان کے اِنت، گلام مھمد کے اِنت پِدا کے اِنت، پرچا کہ آشوبی مردم مرگ ءَ رند زندگ مان انت۔
ما بلوچستان ءِ نندوک اِیں. بلے زان اِیں کہ کیبرل ءُ ڈاکٹر چِے کے بوتگ انت.
منی مراد کہ ھے گٹیاھیں پاکستان ءِ وانگجاھانی تہ ءَ کہ مدامی بلوچ راج ءَ وتی دروگیں راجدپتر ءَ وانینیت بلے بلوچ انگت وت ءَ شمشکار نہ انت۔
دشت بشولی ءِ جنگ ءَ ھپتاد سالیں کماش سھادت مری ایوک ءَ گوں دژمن ءَ جنگ دات ءُ شھید بوت بلے سلاہ ئِے دور نہ دات انت. بالگتر ءِ جنگ ءَ ھشت تمردیں سرمچار گوں دژمن ءَ جنگ دیان ءَ شھید بوت اَنت ءُ سدانی کچ دژمن ءِ کشت ءُ بلے سلاہ اِش دور نہ دات اَنت، سوراپ ءِ جنگ ءَ دژمن ءَ ڈاکٹر ھالد ءُ دلجان انگیر ءَ کُت انت داں گُڈی تیر ءَ دژمن گوما جنگ دیان ءَ شھید بوت انت سداں دژمن جنگ بوت، دگے ھزاراں شھیداں دژمن جتگ ءُ وت ڈیھ ءِ دیمونیاں کربان بوتگ انت بلے باجو نہ بوتگ انت۔
اے ڈیھ ءِ ھما پُسگ بوتگ انت کہ آیاناں ماسانی لیلو ءُ ڈیھے ءِ مھر گون بوتگ.
شائرے گُشیت:-
ماں دپ ءَ جنگانی بٹاک وش انت
مرد ھما انت کہ پسواں اوشت انت
ھمے پسو ءُ کنّو 27 اپریل ءَ 2020 ءَ پروم ءَ زانگ بوت چار ورنا ءَ وتی ھون ھمے مرزبُوم ءِ ھاتر ءَ دات انت ءُ گیدی ءِ کسّھے نوک کُت ھمے کنو کینگ ءَ پاکستان ءِ بہ دلیں سداں لجوز بے آبرو کُت ھمے چاریں تمرداں گیدی ءَ را کلوہ دات کہ ما مرگ زانیں وتی ڈیھ ءِ دیگ ءَ برداشت نہ کن ایں. اے تمرد ءُ پگرانی نام اَت شھید پیرک جان ،شھید گلاب جان، شھید زھیر جان ءُ شھید بشام جان ۔
من ءَ یاد انت 2015 ءَ من تربت ءَ روگ ءَ اِت آں گُڑا من کور ءَ جان شُشت من گلاب جان ءَ دیست کور ءِ لمب ءَ گو ایل اِیم جی ءَ نشتگ ات من ءَ گشت ئِے مرچی پوج آیگ ءَ انت ما کمو تران کت ءُ پدال ءَ منی گاڑی رس ات من رکست کُت ءُ شُت آں ما آسانک ءِ کنڈگ ءَ سربوت ایں داں پوج گوں مزنیں کاروان ءَ روگ ءَ ات بالگتر ءِ گرگ کُزا کنگ ءَ ۔ ھما روچ ءَ پد من ناں کہ پیرک جان دیست ناں کہ گلاب جان۔
دوبر من 2019 ءَ شھید پیرک ءَ دیست گُڑا من ءَ گشت ئِے تو سراج نہ ئے؟
تو مرچاں مزن بوتگ ئے من ترا ھپت سال ءَ ساری دستگ تو سک کسان بوتگ ئے ءُ پد بچکندگے جت ءُ گشت ئِے تو مارا وتی گس ءَ جاہ دات تو چِی گشتگ من ھر وھد ھُمود ءَ نند آں؟
پد ءَ کندگے جت ءُ گُشت ئِے تو سرمچاراں آپ ءُ چاہ کن ئے ھاں۔
ھما بچکندگ بوت دوبر من نہ دیست زیک من ءَ ھال ءَ گپت کہ پیرک جان وتی آکری بچکندگ پروم ءِ دلبند ءَ جتگ ءُ نمیران بوتگ۔
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔
