‎بلوچ راجدپتر ءِ تہ ءَ بے مَٹیں کرد شھید اکبر ھان – کمال بلوچ

198

‎بلوچ راجدپتر ءِ تہ ءَ بے مَٹیں کرد شھید اکبر ھان

تحریر: کمال بلوچ

دی بلوچستان پوسٹ

جنگ ءِ آزادی ءِ تہ ءَ بلوچ رھشُون نواب اکبر ھان بگٹی ھما انسان اِنت کہ پہ ھر بلوچ سیاسی کارکن ءَ رول ماڈل اِنت، چیاکہ مرچی آ گوں وتی دیم ھونی ءُ داتگیں کُربانیاں بلوچ ورنایانی آئیڈیل جوڑ بوتگ۔ بوت کنت کسے گوں منی اے ھبر ءَ اختلاف بِہ دار اِیت بلے راستیں ھبر ھمیش اِنت، اگاں کسے تاریک ءَ سرپد اِنت ، گُڑا آ اکبر ھان ءَ الم زانت کہ آئی آجوئی ءِ جُنز ءِ اندر ءَ کُجام کِرد ادا کُتگ، پمیشکا کس چہ آئی ءِ ساپ ءُ پلگاریں کِرد ءَ انکار کرت نہ کنت ۔

اکبر ھان ءِ کِرد پمے ھاتر ءَ گیر آرگ بیت کہ آئی ءِ کِرد چہ 2005 ءَ پیش بزاں شازیہ ھالد ءِ جیڑہ ءَ پیسر اکبر ھان بلوچ جھد ءِ آجوئی ءِ بھر بوتگ، بلے پاکستانی دانشوراں ھما دروگیں پندل پیش کرتگ کہ اکبر ھان شازیہ ھالد ءِ ریپ ءِ ھلاپ ءَ جنگ کنگ ءَ اِنت بلےاے کُل ھما دُژمِن ءِ چِست ءُ ایرانی بھر اَنت کہ پہ بلوچ راجی جُھد ءِ ایر جنگ ءُ نزور کنگ ءِ ھاتر ءَ کنگ بوتگ اَنت، چیاکہ اکبر ھان اے ھبر پیسر ءَ ھم گْوشتگ کہ وھدے مزکرات بوت ما وتی مال ءُ مَڈیانی لوٹ ءَ کن اِیں ۔

اکبر ھان بگٹی ءِ کِرد ھما روچ بگر بزاں کُجام وھد ءَ بلوچ مزاھمت مکران ءَ بندات بیت، ھما روچ ءَ ھمراہ بیت۔ وھدے اکبر ھان ءِ گِند ءُ نند ءَ بلوچستان ءِ مزن نامیں رھشُون واجہ گلام مھمد بلوچ، بالاچ مری ءُ اے دِگہ رھشُون ڈیرہ بگٹی ءَ رَو اَنت گُڑا اے سرجمیں باوست ءَ بُنگیج کن اَنت۔ اے راستی یے کہ بلوچ راجی آجوئی ءِ واست ءَ ھر مجلِس ءُ دیواناں واجہ گلام مھمد ڈارک آجوئی ءِ ھبر کُرتگ۔ اُود ءَ گم واجہ گلام مھمد آجوئی ءِ ھبر کرتگ، ھما کہ دیم پہ دیم ھبر بوتگ بلے اے ھبر رسانکدار ءَ آرگ نہ بوتگ اَنت،چرے ھبر ءَ گوں راستی ءَ زانگ بیت کہ اد ءَ آجوئی ءِ نُکات ءِ سر ءَ باوست گوں شریں وڑے ءَ بوتگ۔

مرچی شھید واجہ گلام محمد، شھید بالاچ ءُ شھید اکبر ھان مئے درمیان ءَ ساڑی نہ اَنت، بلے اے ھبر مئے دیم ءَ اِنت کہ آیانی گِند ءُ نند ، پیسلہ پہ کُجام مکسد ءَ بوتگ ۔ چیاکہ آیاں اے پیسلہ پرے ھاتر ءَ زُرتگ ھما پُسّگاں پہ اے ڈیھ ءِ آجوئی ءَ وتی جان ندْر کُتگ اَنت ،آیانی مکسد ءِ دیم ءَ برگ ءُ پہ منزل ءَ سر کنگ مئے راجی زمہ واری اِنت۔ اگاں ما اے جُھد دیم ءَ نہ بُرت ءُ لگور بوت اِیں، گُڑا آؤکیں پدریچ مارا ھچ رنگ ءَ ماپ نہ کنت ، چیاکہ اے آجوئی ءِ جنگ پاکستانی کْوازہ ءَ پد بندات بوتگ داں روچ ء مروچی دیم پہ منزل ءَ جُنزان اِنت،چہ اے جُھد ءُ کُوشست ، کُربانیانی دَیَگ ءَ پد مروچی دگینا بلوچ راجی آجوئی ءِ جنز ءَ باوست کنت، چیاکہ بلوچ ءَ را تاریکی دستاویز ھست اِنت۔ کجا کہ مرچی بلوچ ءِبحقیقی کیس ءَ کسے باوست کنت، گُڑا اے بلوچ راجی رھشُون ءُ شھیدانی ھونانی بدولت اِنت کہ بلوچ ءَ دگینا وتی نیمگ ءَ تَرینت کُرتگ۔

بلے اد ءَ یک چیزّے مارا الم زانگ لوٹ اِیت دانکہ ما آجوئی نہ گِپت، پہ مئے باندات ءَ ھچ پش نہ کپ ایت، پمیشکا جُھد ءِ آجوئی ءِ اندر ءَ کُجام کہ اڑ ساڑی اَنت آیانی گیش ءُ گیوار کنگ پما ھژدری اِنت، اگاں ما آ نیمگ ءَ دلگوش گور نہ کُت گُڑا اے نزوری مئے جُھد ءَ مزنیں تاوانے دات کنت ،اے نزوریانی پُشت ءَ من ھمے سرپد باں ءُ پہ راستی گْوش آں کہ اے ردیانی پُشت ءَ مئے لھتیں رھشُونانی نزوری اَنت کہ اے تفریق پیداک بوتگ، یکیں جاگہ ءَ دُژمِن مارا جنت ءُ شھید کنت بلے دومی نیمگ ءَ ما وتی ذاتی نمود ءُ نمائش ءَ گیش ارزِشت دے اِیں، بزاں چہ راجی جُنز ءَ گیش وتی انا ءِ زندگ دارگ ۔

ھمے ھاتر ءَ بازیں ورنا چرے اَمل ءَ دلپروش بوتگ ءُ وت گستا ، ھاموش ءُ بے توار کُتگ ، اے ھبر ھمے ھاتر ءَ کہ وھدے سیاسی ورکر وتی کد ءُ بالاد ءَ بزانت گُڑا ردیانی گِر ءُ بند کنگ بیت داں گیش ردی کنگ مہ بیت ۔

اے بابت ءَ کمیں بلوچ نیشنل فرنٹ ءِ سر ءَ گپ جَن اِیں کہ آئی ءِ تہ ءَ شھید ثنا سنگت ،شھید واجہ گلام مھمد ، شھید جلیل ریکی ءُ سنگتانی مِھنت ھوار بوتگ اَنت پہ راجی یکجاھی ءَ، اے یکجاھی پرے ھاتر ءَ کہ بلوچ راج یکّیں سنگر ءَ راجی جُھد ءَ دیم ءَ بِہ بارت ءُ وتی مِنزل ءَ سر بِہ بیت،ھمے وڑ ءَ اے یکجاھی ءَ بلوچ راج ءِ اُوست ءُ اُمیت ھم مُھکم کُت کہ مئے راجی رھشُون گوں یکدستی ءَ دیم پہ مِنزل ءَ روگ ءَ اَنت ۔

چے کن ئے! بلے ھما یکجاھی پہ دائِمی نہ بوت، اے یکجاھی ءَ را اولی ءَ بلوچ ریپبکین پارٹی ءَ ھتم کُرت ابید چہ یک شرّیں باوستے ءَ داں اے اُمیت ھلاس مہ بیت، بلے چُش نہ بوت۔ پمیشکا اے ھبر مرچی ھم راجدپتر ءِ بھر اِنت کہ بی آر پی ءِ اے پیسلہ ءَ بلوچ راج چنچو دردیگ کُتگ ،بلے بلوچ ءِ نبشتہ کاراں اے ھبر ءِ ھر وھد ءَ اظہار وتی نبشتانکانی توک ءَ کُتگ ءُ راج ءِ دیم ءَ آرتگ اَنت،چیاکہ اے ھبر شھید اکبر ھان چہ وتی شھادت ءَ کُتگ کہ پہ بلوچ راج ءَ سنگل پارٹی یے جوڑ کنگی اِنت کہ آئی ءِ وابانی راستی ھمے بی این ایف بوتگ کہ سنگل پارٹی ءِ بُن ھِشت اَت، بلے اے اُمیت زوت ھلاس بوت۔ اے درگت ءَ ما یک ھبرے ءِ گواہ ھم ھست اِیں، پرچا کہ ۲۰۱۱ ءَ چہ پد من بی این ایف ءِ بنجائی باڈی ءِ بہر بوتگاں ءُ مئے کُوشت مُدام ھمے بوتگ کہ کلیں گلاں ھمے پلٹ فارم ءَ بیار اِیں داں آ وتی کرد ءَ پہ راج ءِ باندات ءَ شرّیں وڑے ءَ ادا بکن اَنت ءُ شھید اکبر ھان ءِ ھما دیستگیں واب پورا بِہ بیت ،راجی جُنز دیمروئی بِہ کنت ،بلے ما ھم اے اَمَل ءَ را پیلو کنگ ءَ سوبین نہ بوت اِیں ۔

ھمے نزیکی ءِ ھاتر ءَ بی ایس او آزاد ءَ وتی مزنیں جلسہ ءَ ماں اسٹیج ءِ سر ءَ بی آر پی ءَ را مھمان ء ھاص ھم کُرتگ دانکہ مئے اے نزیکی شرّیں وڑے ءَ مُھکم بِہ بیت ءُ دیم پہ مِنزل ءَ جُنزاں بِہ کنت۔ ھمے وڑ ءَ بی این ایم ءُ بی این ایف ءَ ھم وتی اسٹیج ءِسر ءَ بی آر پی ءَ را جاگہ داتگ بلے ھاسیں کِردے دیم ءَ نیاتکگ۔ ایشی ءِ مستریں ثبوت بی این ایف اِنت کہ وتی جلسہ ءِ اسٹیج ءِ سر ءَ ہم بی آر پی جاگہ داتگ،دشت تربت ءَ بی این ایف یک مزنیں جلسھے اڈ کنت، اے جلسہ ءِ پاگواجی واجہ شھید ڈاکٹر منان کرتگ ءُ مھمان ء ھاص من کرتگ ، اھزازی مھمان بی آر پی ءِ مرکزی ممبر واجہ بابا عبداللہ کرتگ،ھالانکہ بی آر پی اے وھد ءَ چہ یکجاھی ءَ در بوتگ بلے ماں نزیکی پیداک کتگ دانکہ ما یک یکجہتی یے پیداک کُت بکن اِیں ، داں مئے اے یکجاھی پہ بلوچ راج ءَ وشھالی ءِ پیگام بِہ بیت، بلے مئے اے کلیں کار پہ یکجاھی ءَ کارآمد سابت نہ بوتگ اَنت،منی اے کسانیں تاریک ءِ نبشتہ کنگ ءِ مول ءُ مراد ھمیش اِنت کہ یکجاھی ءُ یکمشتی بَہ کَول ءِ اکبر ھان ءِ راجی جُھد ءِ مزنیں لوٹ اِنت کہ بلوچ رھشُون ایشی ءَ پورا بکن اَنت ، چیاکہ اے کار ءِ سرجم کنگ شھید ءِ پَلسپہ اِنت۔ اے درگت ءَ ھاسکن بی این ایف ءِ رنگیں ادارے ءِ پَھال کنگ سک اَلّمی اِنت، یا دومی بچار اِیں سِلاہ بندیں گَل براس رنگیں ادارے موجود اِنت ایشی ءِ مھکم کنگ ھم یک شریں اَمَلے بیت، اگاں ما چہ وتی زاتی مَسیتاں در آیگ ءِ واست ءَ ساڑی بِہ بَہ اِیں، اے بابت ءَ دگینا ءِ سیاست ءِ بدلی ءُ پہ بلوچ راج ءَ یکمشتی ءُ یکجاھی داں گُڈّی منزل ءَ ،چیا کہ دگینا ءِ اگاں سیاست مٹ بُوَگ ءَ اِنت گُڑا مارا ھم وتی جُھد ءُ سیاست ءِ ھیال ءُ دلگوش دارگی اِنت داں وھد ءِ ھمراھی ءَ چہ نُکس ءُ تاوان ءِ بدل ءَ نپ ءُ پائدگ ھاسل کرت بکن اِیں ، اے درگت ءَ مارا یک راجی پالیسی یے دگینا ءِ دیم ءَ آرگی اِنت ءُ وتی جُھد منّارینگی اِنت، پہ اے گامگیج ءَ مئے کُلیں آجوئی لوٹوکیں گلانی یکجاھی مزنیں ارزِشتے داراِیت،اگاں ما زندگ بُوَگ لوٹ اِیں ،گُڑا مارا اکبر ھان ءِ شھادت روچ ءِ درگت ءَ اھد کنگی اِنت کہ پہ وتی راج ءِ باندات ءَ جُھد ءِ اندر ءَ ھچ وڑیں نزوری ءُ کمی ءَ نیل اِیں۔ ھمے جُھد ءُ کو شست، ھمے اھد ءُ پیمان بلوچ راج ءَ را وتی منزل ءَ سر کنت ءُ دگینا ءَ زندگیں راجے ءِ بستار ءَ پہ دائِمی زندگ مان اِیت ءُ ابدمان بیت ، اے درگت ءَ مارا لوٹ اِیت کہ ما چہ دوری ءُ گستائی ءِ بدل ءَ وتی میان ءَ یکمشتی ءُ یکجاھی پیداک بکن اِیں، اگاں نا ناتِپاکی مارا سوب ءِ بدل ءِ گُڑا بے سوب کنت ۔


دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔