زبان دوستی ءِ سیاست – حکیم واڈیلہ

356

زبان دوستی ءِ سیاست

حکیم واڈیلہ

دی بلوچستان پوسٹ

چوناھا چاگردی رسانکدراں روچے مردمے کیت ء شنگ کتگیں پوسٹانی چیرءَگپ کنت، بھتام جنت، شگان جنت، ایراد گراِیت، تھلیں گپ جنت، مردمءَ رد ءُ بد گُش اِیت ۔ مردم ھمک مردمءِ ھمک گپءَ پسو ھم دات نہ کنت۔ بلے لھتیں مردمانی گپ آیانی کمنٹ، آیانی تہءَ نبشتگیں ھیال بد نیتی اگاں کارھرابیءِ نیتءَ نہ بنت۔ البت لوٹ اَنت کہ جوانیں ءُ شریں راہ شوھازگ بہ بیت۔ پمیشکا آیانی ھبر کنگءِ وڑ کمو ترند گندگ بیت ھما دمانءَ مردمءَ بیت کنت مردمانی ھبر دوست ھم مہ بنت بلے آ گپانی تہءَ راستی گندگ بیت۔

اے گپ ءِ تہءَ ھچ شک نیست کہ داں وھدیں مردم وتی زبانءَ گپ مہ جنت، نبشتہ مہ کنت، وتی زبانءَ وانگءِ مِھر ودی مہ کنت۔ زبان دیمروی نہ کنت۔ وھدے زبان دیمروی نہ کنت چاگرد دیمروی نہ کنت۔ چاگردی دیمروی کہ اوشتءِ آماچ بیت گُڑا بزاں تئی آجوئی، وت واجھی، راجدپتر درس بے معنی بنت۔ پرچا کہ زبان راجی ھستی ءِ پجار اِنت۔ ھمے رنگءَ مئے زبان ھم مروچی زدگ اِنت ۔ یک نیمگے غلامی ءِ بستگیں سانکلاں بندیگ کُتگ۔ مئے زبان مئے سرڈگار ءِ وانگجاھاں وانینگ نہ بیت۔ زبان کہ وانگجاہ ءَ وانینگ مہ بیت بزان آ زبان چوناھا تاوانبار بوان اِنت ۔ بلئے چہ زوراک ءَ گلگ ھم کنگ نہ بیت کہ آئی ءِ مول و مراد ترا، تئی زبانءَ ءُ تئی ھستیءَ سرجم ءَ ھلاس کنگ اِنت۔

دومی نیمگءَ بلوچ راجی جھدءَ ھواریں سیاسی گل اَنت کہ چَہ آیانی مستریں زمہ واریاں یکیں ھمیش بیت کہ وتی زبانءِ دیمروی ءِ ھاتر ءَ کار بہ کن اَنت۔ بلوچ راجءَ ھاسیں وڑ ءَ بلوچی ءُ براھوئی وانگ ءُ نبشتہ کنگ ھیل دئیگ ءِ زمہ واری ءَ بہ زور اَنت۔ دانکہ ما گوں وتی الس ءَ ھمراہ بہ بَہ اِیں ءُ بہ جنز اِیں ۔ بلئے سیاسی گل تھنا اے کاراں کُرت نہ کن اَنت ۔ آیاں زبانزانت ، شاعر، کواس، زانتکاریں مردمانی رھشونی ءُ کمک ءِ پکار بیت۔ بلئے مئے گور ءَ یک وتسریں کشکے کَشگ بوتگ کہ درستیں کارانی زمہ واری لھتیں مردمانی سرءَ دیگ بیتگ۔ نوں اگاں یکیں مردم یکیں وھدءَ، درستیں کارانی تہءَ دست مان کنت کار الم ھراب بنت ءُ دیمروی آرگ نہ بیت۔ ما بائد اِنت سرپد بہ بَہ اِیں کہ مارا کارکنوکیں مردم کمک کنگی اَنت، سکین دیگی اَنت، الم جاھے رد بنت ایراد ھم گرگی اَنت۔ بلئے تھنا ایراد گرگ کاراں دیما نہ بارت پد ءَ مئے رویہ جاورانی پجیگءَ مٹ بنت۔ زیک یک مردمے ءِ ھمیں کار من ساڑاتگ بلئے مرچی من ءُ آ مردم وش نَہ اِیں ھما یکیں کارءَ ایر جن آں کلاگ بند آں۔

منی گمان ءَ سال دو ھزار نو اگاں دہ ءَ کراچی پریس کلب ءِ دیم ءَ ماتی زبانانی میان اُستمانی روچ ءِ درگت ءَ زھرشانی یے کنگ بیتگ اَت کہ آئیءِ جار بلوچ زبان دوستاں جتگ اَت۔ بژن کہ آ روچی پریس کلب ءِ دیم ءَ ھسابی مردم اوشتوک اَت اَنت ھمے مردمانی تہءَ اُستاد شھید صباہ دشتیاری ءُ ڈاکٹر ناگمان ھم ھوار اَت اَنت۔ ما چُش کہ ھمے وھدءَ زرمبش ءُ دگہ ادبی کارانی تہءَ نوک دست مان کُتگ اَت پمیشکا گون کپت اِیں۔ ھمے زھرشانی ءَ دو نعرہ منا یاد اَنت یکیں ماتی زبانءَ وانگ مئے بُنکی حق اِنت، دومی براھوئی ءَ لمئی زبان اَٹ خواننگ ننا بنیادی حق ءِ(بوت کنت براھوئی رد نبشتگ ) ۔ ھو کہ آروچی سیاسی مردم سیاسی گل جوانیں رنگی ءَ گون نہ اَت اَنت بلئے زبانزانت ، شاعر ، ادبی سنگتانی مستریں بھر ھم گندگ بوگ ءَ نہ اَت۔ پدءَ اے تھنا یک درورے، چُشیں بازیں درور ھست کہ کار کنگ ءِ باریگءَ زبان ءِ پِڑ ءَ بور تاچوکیں سنگتاں نیمون کُتگ۔ کار کنوکیں مردماں وتی کار ھم کتگ اَنت چُش کہ استاد صباہ دشتیاری ءُ آئیءِ ھمراھیں سنگتاں، لائبریری ءَ بلوچی وانینگ ءِ کار بہ بیت، اگاں بلوچستان ءِ پرائیوٹ اسکولانی ھاترءَ بلوچی کورس اڈ دیگ ءِ کار بہ بیت آیاں کُتگ اَنت۔

واجہیں منظور بسمل ءُ حاصل نور ءَ منی یک فیسبوکی پوسٹ ءِ سر ءَ وتی لہتیں دانک پہ من ندر کُتگ اَنت۔ آ دانک پہ من سر ءُ چم بلئے بیا کہ ابید چہ ھمے دانکاں آیاں پہ بلوچیءَ کار کنگ، اگاں ھمکار بوگ ءُ بلوچی ءِ مھکم کنگ ءُ دیم ءَ برگ ءِ ھاتر ءَ کدی گوں من ھال کُتگ منی لیکو زانتگ اَنت؟ کدی اے زانگ ءِ کوشست کُتگ کہ من ءَ بلوچی وانگ ءُ زانگ ءِ واھگ ھست اگاں نیست؟ ۔

لندن ءِ سنگتاں وھدیں بلوچی کلاسانی چن ءُ لانچانی بندات کُت گُڑا واجہ اسماعیل امیری ءَ گُشتگ اَت کہ اد ءَ پیسر ھم انچیں کلاسانی برجم دارگءِ جھد بوتگ بلئے مردمانی ھمراھداری نہ کنگءِ سوب ءَ کلاس نیم بندگ بوتگ اَنت۔ ما وتی کورسی سرجم کُت سئے اگاں چار ماہ کلاس ھم جُنز اِت اَنت ما کمو باز بلوچی نبشتہ کنگ وانگ ھم در بُرت اے کسی سرءَ مزنیں احسانے نہ اِنت بلکیں مئے فرض اِنت کہ ما پیلو کنگ ءِ ناکامیں کوشستے کُتگ اَت۔بلئے وھدیں من دومی نیمگءَ چاراں مئے زانتکاراں، زبانزانتاں، کواساں، لچہ کاراں ءُ آیانی نبشتگیں زبانءَ، گُڑا سما کن آں کہ اے نبشتہ کُتگیں زبان یک درآمدیں زبانے پرچا کہ ھمک مردم ءَ وتی راہ ءُ کِشک گون اِنت ھمائی ءِ ھسابءَ کار کنگءَ اِنت۔ بائد اِنت درسا پیش زبانزانت اے جیڑھاں بہ گیشین اَنت پد ءَ ما دگہ جیڑھاں وشیں رنگے ءَ گیش ءُ گیوار کُت کن اِیں۔ دانکہ یک دروشمیءَ زبان پہ وانگءَ دست مہ کپ اِیت وانوکانی ھاترءَ پہ وانگ ءُ سرپد بوگ باز جیڑہ بیت۔

 

دی بلوچستان پوسٹ : اے نبشتانک ءِ تہا درشتان کُتگیں ھیال ءُ لیکہ نبشتہ کار ۓ جندءِ گنت، الم نہ اِنت کہ دی بلوچستان پوسٹ رسانک نیٹورک ایشانی منوک بہ بیت یا اگں اے گل ءِ پالیسیانی درشانی اِنت۔