گپ چوں اے وڈا اِنت
نبشتہ کار: سنگت قادر بولانی
دی بلوچستان پوسٹ
گپ چوں اے وڈا اِنت سئے ءَ بہ گِر سینزدہ مردم اَنت، مفاد پرست آں ءُ وتسریں رھبند اِش ٹھینتگ، اے درست فلاسفر اَنت۔ راجی راھشوناں ءُ سوشل میڈیا کارمرز کنوکاں کلاگ بند انت، بلے بیا کہ وتی مورچہ ہم اشاں زوم ءَ جتگ ءُ ساڑی اَنت، پرائیویٹ وٹس ایپ گروپ ءِ ہم است، زاھر بوھگ یکیں نہ لوٹیت، گپاں گوں بلے کوہ پروش اَنت، لہتیں ازمکار اَنت، سیاستدان اَنت، زبان زانت اَنت، فیمینسٹ اَنت، سائینس اشانی شلوارے کسگ ءَ اِنت، اکیڈیمک تعلیم یکی ءَ ہم نیست ءُ گپاں علمی کناں۔
لائیبیری آنی کتاب وا گُشے اشاں درست ھلینتگ اَنت، وتا علم نیست ءُ دگرے علمے سرا گُر انت کہ واجہ پلاں نبشتہ کار اے گوشیت، پلاں چُش گُشیت۔ اشانی جیڈہ اِش اِنت کہ اے درست احساس کمتری ءِ شکار انت۔
اشانی تہا باز مردم من زاناں کہ ملک ءَ تنظیمانی نامے سرا بازیں ردیں کار کُتگ اِش ءُ نی دری دنیا ءِ دیما وت ءَ انسانی حقانی مزنیں چیمپئین اِش جوڈ کُتگ۔ اشانی تھا درستیں مردمانی جیڈہ زاتی اَنت، راجی جیڈہ یکی ءِ کش ءَ چے ہم نہ گوستگ۔ جنگ ءِ نامے سرا زر ءُ کلدارے مچ کُتگ ءُ نی کہ گنداں بلائیں سردار ءُ نواب بلوچ قوم ءَ چہ آزمان ءَ زمین ءَ چگل داتاں، نی اشانی جندے سروائیول ءِ جیڈہ ودی بیتگ، پمے ھاترا درستیں دانشور یک پہ یک ءَ گوں وتی تُستگیں نبشتانک ءَ دیما پیداک اَنت۔ حرام بات کہ اشانی یک نبشتانکی ءِ تہا ہم دلجمی ءَ بلوچستان ءِ سرا گپے ھم ھوار بہ بیت۔ داہ سال اِنت در ملک آں انت، بلے انگت وتی جندے پروموشن ءَ چے نہ چُٹیتگ آں گُڈا اے چے پئیم راجی جیڈہ آں دگنیا ءِ دیما پدر کن انت ؟ ھمک ھپتگ یکے کہیت ءُ گلگ کنت، من اے وڈا گرگ بیتاں، من چوں عزاب اتاں، یکی ءَ اسائلم نہ رستگ ءُ کئیت آرٹیکل نبشتہ کنت۔ شمارا واجہ چے بلاہ اِنت ؟ داہ سالے تہا اشاں دری دنیا ءَ بس چندے کتاب ونتگ، جندے دیار ءُ مردماں پھک ءَ بیھال اَنت، انوگیں گرانے وھد ءَ سنگت بندی جاھ ءَ بند اَنت، ٹارچر کنگ بنت، شھید کنگ بنت گوں آیاں اشاں ھچ وڈیں کار نیست، بس داہ سال پیسر کئے ءَ لٹ وارتگ روچ مرچیگاں نند اَنت ہمایاں پروموٹ کن اَنت۔ لہتیں نبشتہ کارانی لوگے تہا بی ایل ایف اڈ کنگ بیتگ، بلے آہ ہم کردانی تھا وتی ناکوزتکاں شوھاز ءَ اَنت۔ اڈے ھدائے بندا جندے ناکوزتک بزاں کہ قوم ویران اِنت تو کُجا گلائیش اے ؟
اشانی منافقت ءِ کسانیں مثال اِش اِنت کہ اے درست دیوانانی تہا وتا بے ھُدا گُش اَنت ءُ نبشتانکانی تہا نبی ءُ بلال ءِ کسہ ءَ کار انت۔ کمیونزم، نیشنلزم، فیمینزم ءُ دگہ بازیں ازمانی سرا گپ کنوک، پرچہ وتی جندے جنین، گُہار ءُ چُکاں یک روچے دیما نیار اَنت ؟ ملک ءَ وا ھیر شمارا نیمون ءِ بیتگ کہ سرکار مردماں گیپت ءُ جنت، بلے یورپ، کینیڈا ءُ امریکہ ءِ تہا کئے شُمے نام ءَ گیپت ؟ کوریا ءَ لہتیں بلوچ فیملی جاھمنداں، آیاں انچوش پروموٹ کن انت گُشے زاناں اشانی مات ءُ گُہار ہم گوں ہمیشانی دابہ پہ راجی کاراں گون انت ءُ ساڈی انت۔ اشانی ھمک گپانی تہا دنیا ءِ ھما ھلاس بیتگ ایں تحریکانی ھوالہ گون انت، تامل اے وڈا ھلاس بیتاں، پلاں چوش کشگ بیت آں، بلے بیا کدی ہم یک کامیاب تحریک ءِ درور ءِ پیش کُت نہ کن انت کہ قوم چہ مایوسی ءَ در بئیت۔ انچوش کہ من پیسر گوشت کہ اشانی جیڈہ ذاتی اَنت ءُ قومی جیڈہ چہ اشانی کش ءَ ھم نہ گوستگ۔ پمے ھاترا مرچاں مایوسی ءِ درس دیگ بئیگ ءَ اِنت۔ ھرچی نودربر ھما چئیرمین یا چئیرپرسن ءِ دور ءَ گوں بی ایس او ءَ ھوار بیتگ، اے درست مرچی وتی فارغ ایں کارمسترانی چیریں لابی آنی آماچ اَنت۔ سیاسی تنظیم وا چہ اسلہ گروپانی ءُ لوبیانی آماچ بیتگ انت، اشانی تہا پدا لہتیں سیاسی لاُڈک انت کہ مئے نام پہ ھدائی کس مہ گپت ماں ھرچ سیاہ ءُ اسپیت بہ کنے قوم بس مئے دپ ءَ بہ کندیت۔ چوش نی نبیت واجہ۔ باز بیت نی گیشیں گروپانی ھچ جاگہ نیست بلوچ راجی جنزے تہا۔ اگاں سنگتی ءِ بنیاد ءَ سیاست کنگی اِنت گُڈا ہمے دری پارٹی ءَ ھوار بہ بیت ءُ ھرچ زھمے جنگی اِنت بہ جن ات بلے راجی گلانی تہا اے دھندہانی کمو ھم جاگہ نیست۔
علم، زانت، ھُنر ءُ دیمروی ءِ منی جند ھچ وڈا نہ ھلاپ اِنت ءُ نہ کدی اے عمل ءَ ایر جت کنت، بلے انچو کہ شُما گُشے کہ اسلام مئے سرا چٹی کنگ بیتگ، ما آئی پلا مرزی ءَ کُت نہ کنے گُڈا اے سرجمیں راج چون شُمے دو نبشتاکارانی رندگیری ءَ بہ کنت ؟ پرچہ واجہ ؟ شُمے ذاتی کِرد زاناں چی اِنت ؟ قوم شُمے چرپیں گپاں پرچہ باور بہ کنت ؟ علم ءِ گپ پروفیسر صبا دشتیاری ءَ کُت، من بلے نہ ایت پہ آئی نام شُما کدی دو دانک ھم شات کتاں۔ اے لاچاریں قوم دیما وڈ وڈیں نبشتہ کارانی نام آنی گرگ ءَ شُما مزن نہ بئیت۔ اے درستیں کتاب رازق بگٹی ءَ ھم ونتگاں ءُ چپ ءُ چاگرد ءَ تر ءُ پِر تر ہمیشانی درور اے ھم داتگ بلے اے کتابانی آسر چے بیت ؟ پہ لگوری دگنیا وئیل ءِ کُت۔ شُما ھم اگاں دگہ زھمے نہ جنے وتی جندے کاراں ٹھین ات انچو کہ پیسر شُما کُتگ۔ قوم ءَ راھشون ہم است، لازم نہ اِنت ھمک راھشون کتاب نبشتہ بہ کنت۔ مئے راھشوناں اگاں کتاب ھم نبشتہ بہ کتیں شمے وڈیں مردماں آیانی اے عمل ایر جتگ ءَ پرچہ شُما وتی جندا گوں بندوکیں مردمے۔ برے برے منا گمان بیت شُما چندیں سالانی تہا اے وڈا دری دگنیا ءَ چے اے رنگ ءَ اثر زرتگ، اگاں شُمے جند ھمودا ودی بیت ایں شُما گنتری کُتگ ات۔
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
