بلوچستان میں معدنیات کے شعبے میں کام کرنے والی کمپنی نیشنل ریسورسز (پرائیوٹ) لمیٹڈ (این آر ایل) کی ایک سائٹ پر بدھ کے روز نامعلوم مسلح افراد نے حملہ کیا ہے۔
کمپنی کی جانب سے جاری پریس ریلیز کے مطابق، 22 اپریل 2026 کو تقریباً شام 5 بج کر 45 منٹ پر بلوچستان کے ضلع چاغی میں داریگوان کے علاقے میں نیشنل ریسورسز لمیٹڈ کی سائٹ پر نامعلوم افراد نے حملہ کیا۔
نیشنل ریسورسز لمیٹڈ کا کہنا ہے کہ کمپنی قانون نافذ کرنے والے اداروں کے ساتھ قریبی رابطے میں ہے اور مزید معلومات دستیاب ہونے پر تازہ صورتِ حال سے آگاہ کیا جائے گا۔
علاقائی ذرائع کے مطابق حملے میں پاکستانی فورسز فرنٹیئر کور (ایف سی) کے تین اہلکاروں سمیت کمپنی کے متعدد ارکان ہلاک ہوئے ہیں۔ مجموعی طور پر دس افراد کے ہلاکت کی اطلاعات ہیں۔
ذرائع کے مطابق حملہ آوروں نے کمپنی کے ڈرلنگ مشین اور دیگر بھاری مشنری کو نذر آتش کرکے تباہ کردیا ہے۔
بیان میں مزید کہا گیا ہے کہ ملازمین اور آپریشنز کی حفاظت اور سلامتی کمپنی کی اولین ترجیح ہے۔
این آر ایل کوئٹہ میں رجسٹرڈ ایک نجی پاکستانی کمپنی ہے۔ یہ فاطمہ فرٹیلائزر، لبرٹی ملز اور لکی سیمنٹ کے درمیان قائم ایک جوائنٹ وینچر کے طور پر تشکیل دی گئی ہے۔
کمپنی کی ویب سائٹ پر دستیاب معلومات کے مطابق این آر ایل کے پاس بلوچستان میں 500 مربع کلومیٹر میں سونے اور تانبے کی تلاش کا لائسنس ہے۔
