شھید داکتر منان مادنیں راہ ءِ سْرکُم
نبشتہ کار: سسّا رھگوز
دی بلوچستان پوسٹ
زُنّالاں کہ وتی دبستان ءِ سرتاکاں بُنگپّ نبیس اِتگ ءُ آیاں چہ کارِست جوڑ کنگ ءِ اوست بستگ ، دومی نیمگ ءَ مھر ءُ شادِھانی کارِستاں زُنّالانی سرتاکاں نبیس اِتگیں بُنگپّ ءُ کارِست لپاشتگ ءُ گوناپ کُتگ اَنت،ابرم ءِ کازماس ءِ کارِستانی وتی وتی کار رِد اَنت کہ ھر یکّے چہ دومی ءَ جتا ءُ یکتا اِنت ،ازلیں کارِست کہ انسانی دبستان ءِ سرشون اَنت، آ چہ تھاری ءَ وت در آیگ ءُ دومی ءَ اُوں درکنگ ءِ بود اِنت ۔ اِے کارِست اِنسانی دبستان ءَ چوں گِندگ ءَ کیت،اگاں یکّے پہ وتی نام ءَ کارپدے سازیت ، یکّے پہ ھَوس ءُ شان ءَ ، یکّے وتی واھشتاں ایرماد کنت پہ دومیگ ءِ آکبت ءَ جیڑ اِیت ءُ اِے ریس ھمے کارِست اِنت کہ آدمزادگاں ونڈ کنگ ءَ اِنت ۔
انسانی گوستانک ءَ چماں شانک ئِے اُود ءَ اُوں ھمے پیمیں کارِست اَنت ،اگاں یک گْورے زُنّالیں تاجدار اَنت دومی نیمگ ءَ بے کس ءُ ایردستیں مھلوک ءَ پہ مِھتر ءُ انسان دوست اَنت پہ تمردی اُوستاتگ اَنت ، ھمُک راج ءُ ھمُک ھند ءِ ایردست ءُ ناپوھیں مھلوک ءَ اَلم گھمردے ءَ آیانی تھاریں کُل ءَ پہ سْرکُمے بالینتگ یا پہ مادنیں دگ ءَ پیژگام بوتگ ۔۔
اگاں ما وتی نزوک ءَ بِہ پول اِیں مارا اُوں انچیں بامرد ءُ باجنیں نام دزکپت اَنت کہ اَچ آیاں یک نامے شھید داکتر واجہ منّان اِنت کہ اِے نام ءَ بلوچ ءِ ھمُک کَتّا ءُ شیرزال اگاں زان اَنت، بلوچستان ءِ تیھریں ماتبند ، ھُلکہ ءُ دمگ اَچ منان ءِ گاماں ترانگار بیت نہ کن اَنت ۔
دشت ءِ پُلکاں اگاں آئی پاد کلّرین اِتگ اَنت ، شال ءِ آپبندیں سارتی ءَ اُوں آئی انارک ءُ رکانی تْرک دیسگ اَنت ، شھید منّان ءِ شاھگانیں سسّا ءُ اِزم بلوچ ءِ مرچیگ ءُ باندات ءِ تھارگ ءَ پہ سْرکُم درور اِنت۔
اِے دگ ءِ منزل ھما وھد ءَ براھدار بیت کہ سپر زیبا بیت ، منزل ءِ زبیا کنوک سپر اِنت کہ ھمے منزل ءَ پہ بلوچ وتی بے مُلیں سرانی دیمونی ءَ دَیَگ ءَ پہ چکُّو نہ اِنت ۔
اِے یکّیں بھاران نا بلکیں داں منزل بلوچ ءَ را وتی ھمُک دیگر ءِ ھوادگیں سُھری ءَ را وتی ھوناں بِہ ریٹھ اِیت کہ اِے دگ ءِ رھگْوز یکّیں بلوچ نہ اِنت ، بلکیں جھان ءِ ھرچ زندگیں راج ءَ اِے دگ ءَ سپر کُتگ۔۔۔۔۔اُو اِے راستے کہ مردُم ءَ اِے پیمیں راجدوستیں بامرد ءِ گِسر کپگ تَور اِیت،بلے پہ زندگ بُوَگ ءَ مرگ اُوں ھژدر اِنت ،چی ءَ کہ پہ ھاٹیگ ءُ توان کنگ ءَ کارِست اُوں لوٹ اِیت، بلے من انگت ھما تورشتیں شپ ءِ یاتاں کپ آں، ھما بے وانکیں آس ءِ دیوان ءِ کہ شپ آس ءُ زمستان توک ءَ اِت اَنت ما چہ دو شپ ءُ روچ ءِ پند ءَ نوک اَتکگ اَت اِیں۔
بی بی سی ءِ سرھال ءَ شھید منّان ءُ آئی گھگیریں بیلانی شھیدی ءِ ھال اَت ءُ پد ءَ آس اَت ، زمستان ، گوریچ اَت ءُ بی بی سی ءِ سرھال۔ھردیں بھاران ایرھت بیت من ،آس ،زمستان ءُ گوریچ مُس بَہ اِیں۔ بس بی بی سی ، منّان ءُ بلوچستان تا دیر ءَ نند اَنت ءُ پد ءَ منّان پاد کَیت کہ بھاران ھینّار اِنت ھون لوٹ اِیت۔
من کہ ایوک ءَ پشت کپ آں ۔
من ءَ وتی توار گُوشاں کپ اِیت”لھتیں گوستانک ءَ جوڑ کنت
لھتیناں گوستانک جوڑ کنت”
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
