بلوچستان کے دارالحکومت کوئٹہ میں بلوچ سیاسی اسیران کے اہلخانہ نے احتجاجی کیمپ قائم کردیا۔
بلوچ یکجہتی کمیٹی کا کہنا ہے کہ ڈاکٹر ماہ رنگ بلوچ، صبغت اللہ شاہ جی، بیبگر بلوچ، گلزادی بلوچ، بیبو بلوچ اور دیگر سیاسی اسیران کی غیر قانونی و غیر آئینی حراست کے خلاف اُن کے اہلِ خانہ نے کوئٹہ پریس کلب کے سامنے احتجاجی کیمپ قائم کر دیا ہے۔
مزید کہا گیا کہ احتجاجی کیمپ کا مقصد ریاستی جبر کے خلاف آواز بلند کرنا اور اسیران کی فوری رہائی کا مطالبہ کرنا ہے۔ سیاسی کارکنان کو ماورائے آئین طریقے سے حراست میں رکھنا انسانی حقوق کی سنگین خلاف ورزی ہے۔
انہوں نے کہا کہ ہم کوئٹہ کے تمام طبقات، سماجی و سیاسی کارکنان، انسانی حقوق کے علمبرداروں اور شہریوں سے اپیل کرتے ہیں کہ وہ احتجاجی کیمپ میں شرکت کر کے متاثرہ خاندانوں سے اظہارِ یکجہتی کریں۔
