شھید ڈاکٹر منان جان ءَ سھر چکیں دروت.!! – بابا جی آر بلوچ

شھید ڈاکٹر منان جان ءَ سھر چکیں دروت.!!

نبشتانک: بابا جی آر بلوچ

دی بلوچستان پوسٹ

مروچی زر ءِ چولانی توار اَنچش بے برمش اِت اَنت چو سھب ءِ سمین ءِ سارتکیں گوات ءَ ءُ گُشگ ءَ مروچی پد ءَ زمستان آتکگ ءُ تیاب ءِ چول نزور تر اتگ اَنت زمین ءَ وتی زید یلو داتگ ءُ وتی دروشم ءَ چہ بدل بیتگ ءُ سھریں رنگے آورتگ ئِے..
من ءَ ھچ سما نیست اَت کہ سینگار اتگیں زمین ءِ چو رنگ مٹ بیت بس ھمے پگر ءَ اِت آں کہ وشیں مولم مٹ بیتگ ءُ چو سوچوکیں لیوار ءَ مارا سوچان اِنت..!!

اے ھچ تھتال ءَ نہ اِت آں کہ مے راجی ، سیاسی ءُ پگری استاد واجہ ڈاکٹر منان جان گوں وتی ھمبلان شھید بابو نوروز بلوچ، اشرپ بلوچ، ھنیپ بلوچ ءُ ساجد بلوچ لشکریانی تیرانی دیمپان اَنت اے ھم گمان کنگ ءَ نہ اِت آں بی این ایم (بلوچ نیشنل مومنٹ ) مزن کارگشاد بزاں واجہ ڈاکٹر منان جان بے گِھاریں ءُ لجوزیں لشکر ءَ اَچ ما چہ پُل اِتگ ءُ شھید کتگ …
ڈاکٹر منان جان تمردے اَت ءُ راستی ءِ چیدگ اَت ، منان جان بلوچ راجی زرمبشت ءِ توار اَت کہ گس پہ گس ءَ وتی بے تاگتیں پاداں گوں راجی آجوئی ءِ توار گوں جْوانی ءَ سر کنگ اَت، ھمے واستا دژمن ءِ چماں چوں شیلیں کنٹگ مک اَت،شھید ڈاکٹر منان جان ءَ وتی ھر پیمیں واھشت یک کر کتگ اِت اَنت ءُ راجی وت واجھی ءِ برمش ءَ ماں ھر دمک ءُ تھتگ ءَ سر کنگ ءَ اَت برے ماں مکران ءِ لوار ءَ گوں سیل ءَ اَت ءُ برے گوں شال ءِ برپ بستگیں ھنکین ءَ گردگ ءَ اَت برے برے گندگ آتک کہ آجوئی لوٹوکیں گلاں پہ تپاک ءُ ھمکوپگ کنگ ءِ واستا گوں ترندی ءَ جھد کنگ ءَ اِنت .

ڈاکٹر منان جان ءِ پیمیں ھستی مئے پیمیں کم تاگتیں مردماں ھوسلہ/ ھمت دے اَنت ءُ آجوئی گاماں گام پہ گام بوگ ءِ سکین ءَ دے اَنت چے ءَ کہ اے پیمیں راجدوست ھر کسی تہ ءَ راجدوستی پیداک کن اَنت ءُ گوچنی مچی ءَ پیلو کنگ ءِ سکین ءَ شون دے اَنت، شھید ڈاکٹر منان جان ءِ پیمیں زمین زادگانی ودی بوگ پہ راجاں شاتکامی یے ءُ وش بھتی یے بلے پاکستانی بے ڈولیں لشکر ءَ مستونگ ءَ 31 بھاران(جنوری) دوھزار ءُ شانزدہ شھید ڈاکٹر منان جان گوں وتی ھمراھاں شھید کت ءُ تاں گیدی مان ایت شھیداں وتی نام ماں راج دپتر ءَ نکش کت اَنت…!!

بلوچ سر زمین میزران بات ءُ بلوچستان آجو بات..!!

انکلاب تاں گڈی منزل ءَ….!!!