وھد ءِ ھمرائی ءَ جنزگی اِنت
کریاب بلوچ
دی بلوچستان پوسٹ
بلوچ راجی جُہدءَ کم ءُ گیش 15 سال بیت کہ بلوچ راجءَ داشتگ ءُ راجی پُسگ وتی وّس واکءَ جُہد کنان انت ءُ دیما روان انت۔
جُہدے مستریں سوبمندی اِش انت کہ بلوچ ءَ پہ وت سیاسی گّل اڈ داتگ ءُ سِلاہ بندیں تنظیم جوڑ کُتگ۔
مئے سیاسی ءُ سِلاہ بندے گّلاں ہزاراں سر قربان کُتگ پہ بلوچ راج ءُ سر زمین، آ سرانی مٹ ءُ بدل وا نہ اِت بلے آہانی اروائے آسودگی بلوچ سرزمین ءِ آجوہیءَ گوں بندوک انت۔
مئے سیاسی تنظیم ستاہ کرزنت کہ اینچوں سالاں وتءَ داشتگ اِش پروشت پروش، سروکانی اسد ءُ کینگءَ بِگر تا ریاستی زوراکی ءَ بیا بازیں چِست ءُ ایر دیستگ اِش،
بلے ورناہاں بگر تا کماشاں وتی سیاسی جُہد انگت داشتگ، اے مئے جُہدے زیبائی انت کہ پیر زال وتی بچانی شہادتءَ پہ سالونکی نازینک جن انت،
کماش وتی بچانی شہید بیگ ءَ پہار کن انت گہار پہ سیر ءُ سانگءَ راجی جُہدکار لوٹ کن انت، دنیا آں ہزاراں راج آباد انت چُشیں راج نیست کہ چُشیں دود بداریت۔
سیاست پہ آجوہی بیت یا پہ انسانی ھق گِری بلے سیاست وہدے ھمراہیءَ وتی لوٹاں بدل کنت،
بلوچ دو سیاسی جُہد کنّگءَ انت، پہ گار بیگواھیں بلوچاں آجوہی ئے جُہد دومی نیمگءَ بلوچ راج وتی سرزمین ئے آجوہی ءَ لوٹیت۔
چوکہ ماں پیسر گُشتگ ریاستءِ جج ءُ مج مئے لوٹانی جوابءَ ہما وہدءَ دنت کہ اشاں میان استمانی ھقانی گّل زور پِر بدی انت،
بلے جُست اے پاد کئیت میان استمانی گّلانی گوشاں کئے اے پِریاتاں سر کنت ءُ چے پیم؟
بلوچ راجے مزنیں آبادی ئے کلیجءَ نِشتگ ءُ ہمے آبادی ءِ تہا مزنیں مُچی ئے بلوچ راجی گّلانی تہا ھوار انت بلے کار کس کنگءَ نہ انت،
سبب اش انت کہ کلیج ءِ تہا قانون اجازت ندنت کہ تو ارزانیءَ یک ریاست ئے ھلاف ءَ کارے بکنے۔
کلیج تہا کساس 80% درسد ھالتکانی مستری ہندستانی ءَ گون انت ءُ آ پاکستان ھلاف سک نبشتہ کن انت۔
ھالتاکانی تہا گیش تِر پاکستانی مھلونکے بدھکاری،دوُزی،کُشت ءُ خوش بابتءَ انت۔ برے برے بلوچستان بابتءَ ھالے دی انت۔
بلوچ گّلانی سروک بائد یک سرپدے سنگتانی ٹیمءِ اڈ بدی انت کہ آں کلیج تہا گوں ہمے ھالتاکانی سروک کہ ہندوستانی انت اِشاں گِند ءُ نِند بکن انت ءُ بلوچ جیڑہانی بابتءَ تران بکن انت۔
انسانی ھقانی حال بنت یا سلاہ بندے تنظیمانی اُرش، بلے چاپ ءُ شنگ بہ بنت۔
اگں ھالتاکانی سروکاں گوں تران بیت نہ کنت گُڈا دومی آپشن ایمبیسی ئے سروک اَنت، آ وت وتی مردماں کار بندنت۔
یوکے ئے سنگت بائد اِنت انگریزی ہفتگی تاکے یاکہ مھتاکیں چاپ کنگے کوشش بکن انت۔
انگریزی ءَ بلدیں بلوچ نبشتہ کار ءُ دانشوریں مردماں گوں رابطہ کنگ بہ بیت ءُ اشاں نبشتہ کنگے زمہ واری دیّگ بہ بیت۔
دگہ یک کارے یوکے سنگت کُت کن انت کہ ہما برطانوی پارلیمانی سیاست دان کہ گوں آئیءَ گِند ءُ نِند بوت کنت آہاں وتی گپءَ سر بکن انت، اے کار واستہ اپوزیشن ءِ سیاست دان گیش کار دی انت کہ آہاں ھوں گورمنٹ سرا پریشر دیّگءَ آسانی بیت۔
انسانی ھقانی سرا کار کنوکیں وکیلاں گوں رابطہ کنگ ءِ جہد بکن انت۔
انسانی ھقانی سرا کار کنوکیں نبشتہ کار باز انت برطانیہ ئے تہا گوں آہاں رابطہ بکن انت۔
انسانی ھقانی این جی اوزانی سروکاں گوں رابطہ بکن انت۔
پہ اے کاراں یک ٹیم ئے ٹہینگ بہ بیت،
ہرچ سنگتے ہما پِڑا زانتکار انت آہاں ہما پڑا زمہ واری دیّگ بہ بیت۔
ہمے کار یورپ ءِ تہا ہرچ کجاکہ بلوچ آباد انت آہاں کنگ لوٹ انت۔ ناروے ءُ سویڈن ءَ نشتگیں بلوچ کہ آہانی کار دیما نیا آہگ انت آہاں گوں ھال تران کنگ بہ بیت آودا بازیں بلوچے آبادیں ءُ شریں مردم انت بلوچ دوست انت، پیشءَ بلوچی کاراں گون ھوار بیتگ انت بلے مروچاں بے توار انت، بائدے آہاں گوں ھال ھوال کنگ بہ بیت۔
کلیج بیت یاکہ یورپ ءُ امریکہ یا برطانیہ توامیں ملکاں فری لانس نبشتہ کار ہست کہ پہ انسانی ھقانی ھاترءَ نبشتہ کن انت،
لھتیں پہ زر ءُ لھتیں پہ انسان دوستی اشانی شوھاز کنگ مزنیں کارے نہ انت کہ مروچی انٹرنیٹ ءَ بازیں کارے آسان کُتگ۔
بلوچ سیاسی گّل ٹویٹر ایش ٹیگ ءُ زہرشانیءَ چہ کمے دیما در بیا انت، وتی رپورٹاں گیش چہ گیش درملکی ھالتاکاں ءُ دگہ انسانی ھقانی سرا کار کنوکیں گّلانی ویب سائیٹ ءَ سر کنگے جُہدءَ بکن انت۔ یک نوکیں سیاسی راہبندے ٹہینگ لوٹیت۔
یورپ بیت یاکہ بلوچستان مئے سیاسی جُہد قدیمی رہبندانی سرا اوشتے آماچ انت، ماں ءُ سال گؤزیت ءُ ما بلوچ کورٹ ءُ پریس کلبانی دیما اوشتیں وتی گار بیگواھیں وارثانی واستہ پِریات کنیں بلے کسی گوشے ءَ مورے نہ وارت پرچہ کہ آہاں جُست کنوک نیست،اِشی مطلب ہمیش انت ک ماں بلوچ وہدے لوٹانی ہمراھیءَ روان نہ انت۔
سنگتاں سّد آفرین کہ سک باز کار کنگءَ انت بلے ماراں وہدے ہمراہیءَ وتی سیاست ءُ جُہد بدل کنگ کپیت پرچہ کہ دنیا بدل بیتگ سیاست بدل بیتگ سیاستءِ لوٹ بدل بیتگ انت۔
دی بلوچستان پوسٹ : اے نبشتانک ءِ تہا درشتان کُتگیں ھیال ءُ لیکہ نبشتہ کار ۓ جندءِ گنت، الم نہ اِنت کہ دی بلوچستان پوسٹ رسانک نیٹورک ایشانی منوک بہ بیت یا اگں اے گل ءِ پالیسیانی درشانی اِنت۔
