بیگواہ کئے اِنت؟
حکیم واڈیلہ
دی بلوچستان پوسٹ
بلوچستان ءِ مزنیں شھر کوئٹہ (شال) ءَ گوستگیں دو ماہ ءَ چہ بُرز اِنت کہ بلوچ مات ءُ گہار زھر شانی کنگءَ اَنت کس وتی براتءَ شوہاز کنگءَ اِنت، کس وتی کماشءَ کس وتی لوگ واجہ ءُ کس وتی کہولءِ دگہ مردمیءَ ۔ سیما بلوچ وتی برات شبیر ءِ شوہازءَ باز وھدءِ در اتکگ سیما ءِ ھمرائیءَ آئیءِ نشار زرینہ(شبیر ءِ لوگ بانک) ھم گون اِنت۔ سیما ءُ زرینہ ءَ وتی زھرشانی گوں بیگواہیں بلوچانی گل وائس فار بلوچ مسنگ پرسنز ءِ زھرشانی کیمپءَ ھوار کُتگ ۔ وائس فار بلوچ مسنگ پرسنز کہ گوستگیں دہ سالاں چہ پہ بیگواہیں مردمانی توار اِنت۔ ہزاراں بیگواہیں بلوچانی ھاترہ جہد کنوکیں کیمپ مروچی چہ بانک سیما ءِ جار ءَ پد یک رندیں پدا پُر اِنت ۔ بازیں بیگواہیں مردمانی کہول ھمدا نیشتگ ءُ وتی مردمانی وداریگ اَنت۔ ھما مردمانی وداریگ اَنت کہ یک وھدے مئے توار بیتگ اَنت ھما مردمانی وداریگ اَنت کہ آیاں برگ پہ ھمے سوبءَ بیتگ کہ آیاں پہ مئے وشحالی جیڑیتگ پہ مئے بانداتءَ جہد کُتگ، آیانی میار ھمے بیتگ کہ آیاں شعور پیداک کُتگ ظلم ءُ ظالم نہ من اِتگ۔
نی ادا مستریں سوال ایش اِنت کہ بیگواہ کئے اِنت ھما مردم کہ دشمنءَ بُرتگ اَنت ؟ بندی جاہءَ دور داتگ اَنت ٹارچر بوگءَ انت، دشمنءِ ظلم ءُ زوراکیانی آماچ اَنت۔ یا ھما مردم بیگواہ اَنت کہ زندگ اَنت سلامت اَنت گردگءَ اَنت جُنزگءَ اَنت ھمے دمکانی سرا پہ وش دلی ءُ آرام اگں پہ تُرس گوزنت بلے بیگواہیں مردمانی کیمپءِ نزیکءَ ھم اَتک نہ کن اَنت۔ ادا اے گپ گیشینگ الم اِنت کہ دشمنءِ دستءَ بندیں مردمانی بیگواہیءَ یک نظریہ ءُ پکر ءِ گون اِنت بلے بلوچ شاعر، ادیب، نبشتہ کار، دانشور سیاسی گل ءُ آیانی باسکانی بیگواہی ءُ ھاموشی ءَ کجام نظریہ گون اِنت اے نظریہ اگں تُرس نہ اِنت دگہ چی اِنت۔ اے گپءَ ھچ شک نیست اگں بلوچ آجوئیءِ لوٹ مہ کنت بیت کنت ریاست اے بیگواہیءَ ھلاس بہ کنت پرچہ کہ وھدے آئیءَ کس گشوگ نہ بیت ھمک دُزی ءُ ڈنگی پہ آسودگی ءُ پہ آرام بہ بیت گوادر پہ آرام چینءَ دیگ بہ بیت، سیندک ءُ ریکوڈک ءِ پُلگ برجاہ بہ بیت ءُ گیس ھمے رنگ ءَ دزی بیان بہ بیت گُڑا کس گار نہ بیت کس کُشگ نہ بیت پرچہ کہ وھدے شعور گار بیت شعور مریت گُڑا انسان زندگیءَ ھم مردگءِ ھسابءَ بیت۔
اے گپءَ ھمک بلوچ مات ءُ گہار کماش ورناہ سرپد اِنت ءُ شر زانت کہ آجوئی لوٹوکیں گلانی باسک اگں ظاہری دروشمءَ کیمپ ءُ زھرشانیءَ بہر بہ زیراَنت آ ھم ھمے وڑءَ گار ءُ بیگواہ کنگ بنت اگں شھید کنگ بنت بلے مارا زانگ لوٹیت مئے مات ءُ گہارانی چے لوٹ کنگءَ اَنت ءُ ما چوں کردار ادا کُت کنیں۔ بانک سیما، بانک زرینہ، کسان سالیں انسہ ءُ دگہ پیریں مات ءُ کماش بس ھمے لوٹ ءَ کنگءَ اَنت کہ مئے مردمانی میار مارا گُشگ بہ بیت ءُ اگں آیاں گناہ کُتگ کورٹ ءَ آرگ ءُ پیش کنگ بہ بنت۔ بلوچستان ءِ وزیر اعلی ءُ کابینہ مئے توارءَ گوش بہ دارنت مئے جیڑہ آنی راہ ءِ بہ شوہاز اَنت۔ انسانی ھقانی گل مئے توار بہ بنت، نبشہ کار دانشور ءُ شاعر مئے گپاں دگنیاءَ سر بہ کن اَنت ڈن ءَ نیشتگیں بلوچ پہ بیگواہیں بلوچاں توار چِست بہ کن اَنت ءُ وتی وس ءُ واکانی ھسابءَ دگنیاءِ دلگوشءَ اے نیمگءَ کنگءِ جہدءَ بہ کن اَنت۔ اگں کس ھچ کُت نہ کنت گُڑا بزان شعور بیگواہ اِنت ما بیگواہ ایں مئے ضمیر بیگواہ ایں مئے بلوچی لج بیگواہ ایں، مئے میار جلی بیگواہ ایں۔ اگں ماں وتا وتی بلوچیتءَ ءُ وتی میار جلی ءُ راج دوستیءَ زندگ دارگ لوٹیں گُڑا الم ھمک بلوچ ءَ وتی وس ءُ واکءَ پہ بیگواہیں مردماں توار چِست کنگ لوٹیت دانکہ مئے گہار بزان اَنت کہ بلوچ توری دگنیاءَ ھمک جاہءَ نیشتگ اَنت آیاں وتی مات ءُ گہارانی گم پِر اِنت ءُ انگت مئے راج دوستی ھست ءُ سلامت اِنت۔
دی بلوچستان پوسٹ : اے نبشتانک ءِ تہا درشتان کُتگیں ھیال ءُ لیکہ نبشتہ کار ۓ جندءِ گنت، الم نہ اِنت کہ دی بلوچستان پوسٹ رسانک نیٹورک ایشانی منوک بہ بیت یا اگں اے گل ءِ پالیسیانی درشانی اِنت۔
