“بلوچستان من ءَ سک دوست بیت”
داس بلوچ
دی بلوچستان پوسٹ : بلوچی کالم
بلوچستان من ءَ سک دوست بیت منی نزا بلوچستان سرجم ءَ مھروان اِنت آھی ءِ کنڈو، کور، شیپ ءُ گوات دُرست مھروان اَنت برے برے منءَ ھنچوں سماہ کپیت ایش دروست من ءَ ھمباز کنگ لوٹاں او من اشان ءَ سُھب ءِ بام کہ نوک وتی روژنائی ءَ شنگ ءُ تالان کنت اے سُھب ءِ گوات گوں وتی ندارگ ءَ کہ ھمبازاں زُوراں کنت ترا وت واجہی ءُ گیشتر زندگ بوھگ ءِ سکین ءَ دنت پدا مگرب کہ وتی تہاری ءَ مانشانیت اے تہاری ترا بیم نہ دنت ترا مھردنت وتی کنت ءُ درامد نہ کنت۔
پمیشکہ من ءَ غلام حسین شوھاز ءِ شاعری سک دوست بیت ھمے ہاترا کہ آہ وتی شعرانی تہا بلوچستان ءِ ڈن ءُ ڈوک ،کہور ءُ شیپان نازینیت من ءَ یادانت غلام حسین شوھازے کُلیں شعر ،شوھاز ، توانگت زندگ بوتین ءِ نوں بلوچستان ءِ زیبائی گیشتر انت تئی ھیال ءُ لیکہ ءَ گوں تئی شعراں بلوچستان ءَ گیشتر زیبا کُت کناں بلے شوھاز، تئی سرڈگارے سرا جاہمنندیں زانوگریں ورناہانی واست ءَ پہ بلوچستان تنگ کنگ بوھگ ءَ اِنت تئی سرڈگارشپانی پاساں مر مرانکیں پریاد جنت وت وتی تہءَ جُوش کنت وتی دردانی پاہاراں کشیت انچوش کہ کسے ءَ سماہ بہ بیت، بلے ھماہاں کہ سماہ انت آہ درداں گوں زندگ انت ءُ دردانی زندگیءَ کنگ ءَ اَنت ۔
پدا واجہ ءَ بلوچستان ءِ سرا کسہ آورت ءُ گُشت
بلوچ سرڈگارے سرا جاہمنندیں بلوچانی کسہ سک دراج انت اے کسہ بازیں بہرانی تہا ہوار انت ہر یک بہرے دراجیں کسھائے
ادا درد ے کسہ ، ادا یاتانی کسہ، ادا مہرئے کسہ، ادا زوراکی ءِ کسہ ، ادا قُربانی ءِ کسہ، ادا مرگ ءُ زندے کسہ، ہر یک کسہ ءِ گوں درداں بندوک اِنت بلے اے قُربانی ءِ عمل برجاہ انت ءُ کسہ روان انت ۔
اے دروستیں کسہانی آروک واجہ کمبر انت کہ آھی ءَ مدام بلوچ ءُ بلوچستان ءِ سرا کسہ آورت آھی ءَ اے کسہانی تہا اوژناگ کنگ زانت آھی ءَ مھر ءُ مھروانی ءِ کدو کِساس زانت ،تہا چہ ھلاس اَت عاجز اَت بلے زندگی کنگ ءَ اَت ۔وانگ ءَ اَت، کار کنگ ءَ اَت ،مخلص اَت وتی سرا یقین اَت کہ اے عاجزی ءَ گوں وتی فرض پیلو کنگ ءَ اَت وتی کردارا کردے مان کنگ ءَ اَت ۔
دگنیا ئے جُنزانی تہااے وڑیں با مردانی ھزارانی ھسا ب ءَ کسہ است کہ لنگ ءُ مُنڈ بوتگ اَنت بلے وتی راجی زمہ واری پورا کُتگ انت اِش بلوچستان ءِ کمبر اِنت کہ آھی یک چم ءِ نیست انت دوھمی چم کم گندیت ،گُوش کر انت ،دست ءُ پاد نزور اَنت بلے قُربانی دیگءِ جزبہ گیشتر اِنت کمبر ءِ جُھد پہ بلوچ جُھد کاراں یک مثال ءِ آھی ءِ کُتگیں جھد ترا الم جیڑگ پرمائیت یک وتن دوستیں مردم ءِ کہ آھی ءِ تہا وتن دوستی ءِ واھگ بہ بیت آہ سرجمیں مُشکلانی دیمپان بوھگ ءَ چک ءُ پد نہ بیت منی نزا کمبر حوصلہ ءِ نام اِنت ، مھر ءِ نام اِنت ،دردے نام اِنت ، کمبر وانگی اِنت ءُ سر پد بوھگی اِنت،
بلے اے عاجزیں بالادیں کمبر کہ مرچی 7ماہ پورا اِنت گاروبیگوائیں آہ گوں بی ایس اوآزاد ءِ 3رہشون عزت جان ، نود ءُ چراگ ءَ ھوار بیگواہ بیت اے وڑیں زانوگریں ورناہانی سالانی سال بیگواہ کنگ بلوچ ءِ باندات ءِ بیگواہ کنگ ءِ نشانی اِنت۔
