اقوام متحدہ ءِ انسانی حقانی کونسلءِ ۳۷ می سیشن ءُ دزگیریں راجانی توار۔
نبشتہ: شھزاد بلوچ
دی بلوچستان پوسٹ : کالم
اقوام متحدہ ءِ انسانی حقانی کونسلءِ ۳۷ می سیشن جنیوا ءَ ۲۶ فروری ءَ چہ بندات بیتگ ۔اے سیشن ھمک سالءَ سئے رندا بنت اولی سیشن مارچءَ بیت، دومی جونءَ ءُ سہمی ستمبر ءَ برجم دارگ بیت۔ اے سیشنانی تہءَ دگنیا ءِ مھلوک ءُ ملکانی مردم وتی جیڑہانی درگتءَ گپ جنگءُ گِش ءُ گیوار کنگءِ ھاترہ کاینت۔ اے سیشنانی ءِ تہءَ مُلکانی نمائندگانی ھبر ءُ ڈیبیٹ بنت مُلکانی جاورانی بابت ءَ رپورٹ پیش کنگ بنت پدا ایشانی سرا جُستانی پسہ دیگ بیت۔ اے سیشنءِ تہءَ دزگیرایں راجانی مردم گیشتر این جی اوز آنی کمکءَ چہ سیشنانی تہءَ بھر زور اَنت ءُ جنرل ڈیبیٹانی تہءَ وتی گپ ءَ ھیر کن اَنت ءُ جاورانی بابتءَ سرپدی دی انت۔
اقوام متحدہ ءِ سیشنانی وھدءَ نہ تھنا اقوام متحدہ ءِ ماڑی ءِ تہءَ مردمانی مزنیں کساسءِ گندگ بیت ایشیءَ ھوار بروکن چیر ءِ دیما ھم مُدام دزگیرایں ءُ ظلمانی آماچیں راجانی مردم زھر شانی کنگءَ گندگ بنت۔ دگنیا ءِ تہءَ بیوکیں ظلم ءُ زوراکیانی آماچیں مردم ءُ راج اے پلیٹ فارمءَ پہ وتی جیڑہانی ءِ گِش ءُ گیواری ءِ سوبءِ زان انت۔ مردم ھمے پگر ءُ ھیالءَ گوں رونت کہ بیت کنت مئے توار ھم روچیں نہ روچیں گوش دارگ بیت ءُ مئے جیڑہ ھم یک روچءِ گِش اَنت۔
اے دگہ دزگیریں راجانی وڑا بلوچانی نمائندہ ھم گوستگیں بازیں سالاں چہ یو این ءِ سیشنانی بھر زیرگ ءَ اَنت ءُ ھمک سیشنءِ تہءَ بلوچستانءَ بیوکیں پاکستانی ظلم ءُ زوراکی، بلوچستانءِ تہءَ بیگواہ بیتگیں مردمانی جیڑہ، پوجی آپریشن ، کُشت ءُ خون، لوگ ءُ میتگانی ماندارگ ءُ بلوچستان ءِ آجوئی ءِ لوٹ ءِ بابتءَ تران کن اَنت ءُ دُگنیا ءِ دیما پاکستان ءِ کردءَ پدر کنگ ءِ جھد کن اَنت۔ ھمے نیامءَ دگنیا ءِ جتا جتائیں ملکانی ڈیپلومیٹ ، اھوالکار ءُ زانتکاراں گوں ھال کنگ بیت ءُ آیاں بلوچستانءِ جیڑہ سرپد کنگءِ جھد کنگ بیت۔
سیشنانی تہءَ تران کنگ ءَ ھوار دگہ مراگش ھم بنت چوش کہ کہ سائیڈ ایونٹ ءُ سیمینار برجم دارگ بنت کہ آودا بلوچستان ءِ درگت مردماں سرپدی دیگ بیت ءُ اے مراگشانی تہءَ بلوچانی پجیگءَ دگہ راجانی بلوچ دوزواھ ھم بھر زیرانت ءُ بلوچستانءِ بابتءَ سرپدی زیر اَنت ۔ چُشیں مراگشانی تہءَ بلوچ گیشتر تران کُت کن اَنت ءُ سرپدی دات کن انت۔ پرچہ کہ یو این جنرل اسمبلیءِ جنرل ڈیبیٹ ءَ ۱:۳۰ منٹ ءِ وھد رسیت کہ مردم وتی گپ ءَ اسمبلی ءِ دیما ایر بہ کنت۔ گوستگیں سال ءَبلوچانی لھتیں مراگشانی تہءَ پاکستانی ءُ چائنیزانی نمائندگاں ھم بھر زورتگ ءُ بلوچانی مراگشاں ھراب کنگءِ جھد کُتگ اَت بلئے بے سوب بیتگ اَنت۔
ایشیءَ ھوار بلوچ سیاسی گلانی نیمگءَ جنیوا ءَ زھر شانی، ریلی، بس ءُ ریلانی سرا پوسٹر جنگ ءُ کمپین کنگءَ ھوار زھرشانی ءِکیمپ ھم جنگ بنت پہ لس مھلوکاں سرپدی دیگ ءُ بلوچستان ءُ بلوچانی آجوئیءِ جھد ءِ پدر کنگ ءِ ھاترا۔
اے سیشنءِ نیام ءَ ھم بی آر پی ءِسنگتاں بروکن چیر ءِ دیمءَ زھر شانی کُتگ ءُ جنیوا شھر ءَ ریلی ھم کش اِتگ ۔ ھمے وڑا ورلڈ بلوچ آرگنائیزیشن ءَ جنیوا ءِشھر ءَ پوسٹر کمپین بندات کُتگ پہ مردمانی سرپدی دیگ ءِھاترا ۔ امیت ھمیش اِنت کہ بلوچانی توار ھم یو این ءَ باز زیت گوشدارگ بیت ءُ بلوچ وتی آجوئی ءِ توار دگنیاءِ دیم ءَ مھکمیں ءُ سرپدیں وڑی ءَ ایر کنگءِ جھدءَ برجم دار اَنت دانکہ اقوام متحدہ پاکستان ءِ زوراکیانی ھلاپءَ گام بہ جنت ءُ بلوچستانءَ وتی آجوئی ءَ گرگءِ پیسلہ کنگ ءِ حق ءَ بہ دنت۔
