بلوچستان کے علاقے مند سے بی این ایم کے شہید چیئرمین غلام محمد کے تین قریبی رشتہ دار پاکستانی فورسز کے ہاتھوں اغواء
دی بلوچستان پوسٹ نیوز ڈیسک کو موصول ہونے والی اطلاعات کے مطابق بلوچستان کے سرحدی علاقے مند سے پاکستانی فورسز نے گذشتہ شب بارہ بجے کے قریب مند سوورو میں شہید غلام محمد بلوچ کے بھائی واجہ یوسف بلوچ اور دیگر رشتہ داروں کے گھروں پر چھاپے مار کر تین افراد کو حراست میں لینے کے بعد نامعلوم مقام پر منتقل کر دیا۔
تفصیلات کے مطابق مند سورو میں ہونے والے اس آپریشن میں پاکستانی فورسز نے شہید غلام محمد بلوچ کے خاندان سے تعلق رکھنے والے غلام حسین ولد شگراللہ ، فدا ولد شگراللہ اور بی این ایم کے رہنماہ واجہ یوسف کے فرزند اختر کو حراست میں لینے کے بعد نامعلوم مقام پر منتقل کر دیا۔
علاقائی ذارئع کے مطابق دورانِ آپریشن فورسز نے گھروں میں موجود خواتین اور بچوں کو بھی شدید تشدد کا نشانہ بنایا۔ علاقائی لوگوں کا یہ بھی کہنا تھا کے فورسز گھروں میں موجود قیمتی اشیاء بھی اپنے ساتھ لے گئے۔
واضح رہے غلام محمد بلوچ بی این ایم کے بانی چیئرمین تھے جن کو 2009 میں اغواء کرنے کے بعد قتل کردیا گیا تھا جن کی لاش چھ دن بعد تربت کے علاقے مرغآب سے برآمد ہوئی تھی۔
