بلوچستان کے بیشتر اضلاع میں موسم سرد اور خشک رہنے کا امکان ہے، جبکہ بعض بالائی علاقوں میں درجہ حرارت نقطۂ انجماد سے نیچے ریکارڈ کیا گیا ہے۔
محکمۂ موسمیات کے مطابق صوبے کے مختلف شہروں میں کم سے کم درجہ حرارت میں نمایاں کمی دیکھی گئی ہے۔
محکمۂ موسمیات کا کہنا ہے کہ کوئٹہ میں کم سے کم درجہ حرارت 0 ڈگری سینٹی گریڈ جبکہ قالات میں –1 ڈگری ریکارڈ کیا گیا۔ اسی طرح کوئٹہ کے بالائی علاقوں اور زیارت میں درجہ حرارت –5 ڈگری تک گر گیا، جبکہ ژوب میں کم سے کم درجہ حرارت 5 ڈگری ریکارڈ ہوا۔
صوبے کے دیگر اضلاع میں بھی سردی کی شدت برقرار ہے۔ سبی میں کم سے کم درجہ حرارت 13 ڈگری اور تربت میں 15 ڈگری سینٹی گریڈ ریکارڈ کیا گیا۔ نوکنڈی میں 8 ڈگری جبکہ چمن میں 4 ڈگری سینٹی گریڈ درجہ حرارت ریکارڈ کیا گیا۔
ساحلی علاقوں میں بھی موسم سرد اور خشک رہا۔ گوادر میں کم سے کم درجہ حرارت 14 ڈگری جبکہ جیوانی میں 17 ڈگری سینٹی گریڈ ریکارڈ کیا گیا۔
ماہرینِ موسمیات کے مطابق آئندہ 24 گھنٹوں کے دوران بلوچستان کے بیشتر اضلاع میں موسم خشک اور شمالی علاقوں میں شدید سردی برقرار رہنے کا امکان ہے۔
