بلوچستان کے دو مختلف اضلاع میں فائرنگ کے واقعات میں تین افراد جانبحق ہو گئے ہیں۔
تفصیلات کے مطابق کوئٹہ کے علاقے کلی کمالو گاہی خان چوک کے قریب نامعلوم افراد کی فائرنگ سے ایک شخص جانبحق ہو گیا، پولیس کے مطابق مقتول کی شناخت حاجی عثمان ولد محمد افضل قوم لہڑی، سکنہ کلی چلتن کے طور پر ہوئی ہے۔
ملزمان فائرنگ کے بعد مقتول کی ناک کاٹ کر موقع سے فرار ہو گئے، لاش کو سول اسپتال کوئٹہ منتقل کر دیا گیا ہے اور پولیس نے واقعے کی تحقیقات شروع کر دی ہیں۔
دوسرے واقعے میں کوئٹہ ہی کے علاقے سریاب روڈ بی بی زیارت کے قریب نامعلوم مسلح افراد نے فائرنگ کر کے 40 سالہ محمد صدیق کو قتل کر دیا، مقتول کی لاش کو قانونی کارروائی کے لیے سول اسپتال منتقل کیا گیا ہے۔
ادھر ضلع جعفرآباد کے علاقے اوستہ محمد میں بھی فائرنگ کا ایک واقعہ پیش آیا، پولیس کے مطابق تھانہ سٹی اوستہ محمد کی حدود میں واقع غریب آباد میں نامعلوم افراد نے سید شوکت شاہ کو فائرنگ کر کے قتل کر دیا اور موقع واردات سے فرار ہو گئے۔
پولیس نے لاش کو قبضے میں لے کر اسپتال منتقل کیا، ضابطے کی کارروائی کے بعد لاش ورثاء کے حوالے کر دی گئی، واقعے کا مقدمہ درج کر کے ملزمان کی تلاش شروع کردی گئی ہے۔
