بلوچستان کے ضلع کیچ میں نامعلوم مسلح افراد نے کنسٹریکشن کمپنی پر حملہ کرکے تمام مشینری اور گاڑیوں کو نذر آتش کردیا ہے۔ جبکہ تربت میں نامعلوم افراد نے فورسز کو دستی بم حملے میں نشانہ بنایا ہے۔
کنسٹریکشن کمپنی پر حملہ ضلع کیچ کے علاقے دشت پیرانی بست کے مقام پر کیا گیا ہے۔
علاقائی ذرائع کے مطابق حملہ اس وقت کیا گیا جب مذکورہ کمپنی روڈ بنارہی تھی۔
خیال رہے کہ مذکورہ علاقے میں آزادی پسند تنظیمیں متحرک ہیں اس سے قبل بھی آزادی پسند کنسٹریکشن کمپنی پر حملہ کرتے آرہے ہیں تاہم آج ہونے والے حملے کی ذمہ داری قبول نہیں کی ہے۔
دوسری جانب تربت سے اطلاعات ہیں کہ نامعلوم افراد نے تربت میں پاکستانی فورسز کو دستی بم حملے میں نشانہ بنایا ہے۔
ذرائع کا کہنا ہے کہ اس حملے میں فورسز کو نقصان کا سامنا رہا ہے، تاہم حکام کا موقف تاحال سامنے نہیں آیا ہے۔
