بلوچستان کے ضلع کیچ کے مرکزی شہر تربت میں سیکورٹی خطرات کے پیش نظر ایف سی نے تربت شہر کے مختلف راستوں میں رکاوٹیں کھڑی کرکے لوگوں کی آمد و رفت بند کردی ہے –
دی بلوچستان پوسٹ نیوز ڈیسک کو موصول ہونے والی اطلاعات کے مطابق ایف سی نے شہر کے مصروف ترین علاقے سینماچوک، اللہ والی مسجد سے مچھلی مارکیٹ، جبکہ زور بازار جانے والی سڑک سمیت پرانا سول ہسپتال جانے والی سڑکوں کو رکاوٹیں لگا کر آمد ورفت کیلئے بند کر دیا ہے-
شہریوں نے سیکورٹی کے نام پر سڑکوں کی بندش، تذلیل اور نقل حمل پر پابندی پر اپنے غم و غصے کا اظہار کرتے ہوئے کہا کہ یہ عمل آئین کی خلاف ورزی ہے –
انہوں نے کہا کہ آئین شہریوں کو نقل وحمل کی اجازت دیتی ہے مگر سرکاری ادارے سیکیورٹی کے پیش نظر راستوں کو بند کر رہے ہیں۔
انہوں نے حکومت بلوچستان سے اپیل کی ہے کہ سیکورٹی کے نام لوگوں کی تذلیل بند کرکے ایف سی کو شہری اور کاروباری علاقے سے نکال کر یہاں پولیس کو تعینات کیا جائے –
