ننا ادیب
نوشت: زرک میر | مٹ: عتیق آسکوہ بلوچ
دی بلوچستان پوسٹ
آو ادیب تون ہم پڈ اس مریک، او اسیکہ پڈ ولفک دوارہ ٹَک خلیک، اونا بدن ئٹ آ ہم اندنو بشخ ارے کہ او ستر پوشی کے، و اونا ہم زائیفہ و چُنا مریر، اوڑا دا طرہ ہم کہ ادیب ءِ سگریٹ دنز تروئی مریک و اگہ کس ادیب اس سگریٹ دنز تف او امرو ادیب ئس، ادیب نا باہ آن سگریٹ نا موڷ نا مُد ئٹ تالانی اندنے دُنکہ ملی نا کیٹلی آن باف بش مننگ۔ و دوارہ ہوٹل نا شغل جتا تینا جاگہ غا، اودے داڑکن کاریم اس تو کروئی تمک، و دُن کننگ اونا حق ہم ارے ولے کم از کم سرکاری نوکری آن او پد تورے تینے یا گڑا بخت والا ادیب سرکاری ملازم اس مف گڑا او سراط مستقیم آ بیدس تڈو ہلنگ آن ہننگ کیک نئے تو لغوشت کننگ نا گواچی مننگ کیک، او سڑک آ الاونسز کن ہم تولنگ کیک، اسہ پارہ غان او انداخس حساس مریک کہ او گلی تیٹ چُرو کن تولنگ آ ہم آ روادار اف ایلو پارہ غان او ہفتہ غاتے اسکان کسر تیا تولوک خلقت نا کسر ءِ تفوک مریک، دنو بھاز آ بے حساب بے ضابطگیک و تضاد آک مون آ بریرہ، ایلو پارہ غان تیوہ غا دفتر رشوت نا دود نا ردئٹ کائک گڑا ادیب صاحب امر داڑان مُر مننگ کیک و دوارہ دیمری نا رُم جتا، داڑکن اسٹ ایلو نا فائل تیٹ کوکڑو و سفارش پٹنگ نا نت دو خلنگ جتا۔
کنا خڑک ادیب برام آن ہم مُر تورے تینے نئے تو تینے رکھنگ نا تیوہ غا کوشست آتے دک اس لگنگ کیک کہ ہراتم چنا ءِ بڑز نہاد اسکول اسیٹی داخل کرفنگ مرے، زائیفہ کن گچین ءُ پُچ و میک اپ نا بست و بند جتا، داسہ ہر زائیفہ صفیہ مننگ کپک ولے صفیہ آ انت ضد کہ او ہم “منٹو صاحب” ءِ پاگل خانہ نا سیل و سوات کرفسہ گچینی تون ہنوک زائیفہ اس مننگ نا داد ءِ دوئی کریسس، گڑا چُنا زائیفہ و سرکاری نوکری ادیب اسیکن پول صراط مرور ہراکان سلامت گدرینگ ادیب اسیکن مننگ کپک۔ اسہ وڑئٹ ادیب نا دا سختی تیان گدرینگ و ذاتی چمشانک شاغنگ ہم بھاز الّمی ءِ ولے افسوز کہ ادیب اگہ دا تیوہ غاتے کے گڑا دوارہ تینا مخبری و پچار ءِ امر کننگ کیک او وخت او شریک جرم مریک و تیوی زند 164 (اعتراف جرم) کننگ کپک۔
نن بھاز وخت خننہ کہ ادیب اس دفتر اسیٹی تولوک چاہ نا کش خلیک، سما تمک کہ ادیب صاحب چُنا نا نوکری کن اسہ سرکاری دفتر ئسے آ پیری کننگے۔ اگہ ادیب تینٹ سرکاری ملازم ئسے گڑا تینا دیمروی، تنخواہ و پوسٹنگ نا پیری تیٹ اندن تمک کہ او حکومت وخت آ ہچو نغد کاری اس کننگ کپک و دوارہ تینا گریڈ آتے اُریسہ دانشوری کریسہ کیک، دا انداڑے ایسر مسکہ ہم ہیت اس ئس ننا ادیب دوارہ داخہ در سیاست زدہ مریک کہ او ریٹائرمنٹ آن گڈ ودکی خوائک یا دوارہ پارٹی اسیٹی اوار مننگ نا گمان کیک (اواری نا احوال مونی مرو) ننا رہی آ دُن آ درزن آ مثیال آک ءُ، اکادمی ادبیات آن ہلیس بلوچستان یونیورسٹی اسکان ہر جاغہ ننا ادیب مزاجاً سوختئی نا گواچی ءِ، تینے آن خر مریسہ تینے آن تشریحات و تشبیہات ٹہیفک، دن سمجھ ادیب نا سرکاری ملازم و دوارہ افسر مننگ اسہ المیہ اس مریک، و اگہ اورا اِرا انداخس کہ اونا برام مسونے (و تیوہ غاتا مسونے) و دوارہ چناک ہم دوست مریر گڑا ادیب نا سرگردان مننگ ہچو گوڑیفوک ءُ ہیت اس اف۔
یوٹوپیائی ریاست نا اگہ ہیت کننگہ گڑا اُست خواہی مریک کہ ادیب، فلسفی و سائنسدان آتے برام کپرنگ و سرکاری امور تیان مُر مننگ نا رمائشت مرے انتیکہ دا خواجہ غاک سرکاری امور ئٹ اخس تنخواہ ہموخس کاریم نا ردئٹ سلینگ کپسہ، اوفتے مفت ئنا شراب کنوئی تمک۔
اسہ چس کروک تدینی اس بنفیوہ کہ نن قلات ئٹ تینا استاد پروفیسر ادیب صاحب نا بھاز منتوار اُن کہ او ننے ملاقات نا وخت تریسہ کریکہ، ولے زیات اونا دوتیٹ کتاب تون اوار فائل اس ہم خننگاکہ، سوب اریفنگ آ ٹرانسفر توننگ کن نت دو خلنگ نا پاریکہ و سوب پاریکہ کہ اگہ اونا داکان ٹرانسفر مس گڑا دا مجلس آتا انت مرو ہرافتے ہر نن ہڈ ایتنہ ہرا بناء بناء ٹی شام غریبان نا دروشم اٹ مسکہ و ایسر آ متکنا روم نا ہمو کلب نا دروشم ٹی بسکہ ہراڑے روم نا شہنشاں آگسٹس شراب ئٹ پالیفوک اِرغ، ہلار و انجیر تون نوش کریکہ و دوارہ پاریکہ او مملکت نا بابت جُوانو تغ خنو و او ہروخت تغ ئٹ سمندر نیامٹ ئٹ دژمن فوج ءِ غرق مروک خناکہ و ساحل آ داد ئٹ سلوک بے حجاب مسن تے خناکہ گڑا نیمہ تغ ءِ او تغ ئٹ دژمن فوج تے دیر دروک اُریسہ پورو کریکہ و دا تغ تا نیمہ پوروی مملکت نا ذمہ واری مسکہ، او وخت شہنشاہ نا خواب گاہ ٹی اندنو مسڑ ہتنگاکہ۔ ننا قلات نا پروفیسر ادیب ہم مملکت نا مفاد ئٹ پین ہند اس ہننگ آن بچنگ کن ٹرانسفر توننگ نا درخواست نوشتہ کریسہ سفارش پٹاکہ۔ داسہ ریٹائر مریسہ پنشن داد آتا فائل ءِ پیری ایتک ولے داسہ دا الّمی ارے کہ او اُرے اسکان اندنو مجلس برجاء تخیسہ کیک، قلات نا گوْش ئٹ ننتون شراب و اوٹی پالفنگ کن اِرغ اف، ہلار و انجیر ہم، پروفیسر صاحب تون اوار اوار ننے ہم شہنشاہ آگسٹس آنبار مخالف فوج و داد ئٹ مسن تا تغک بریرہ ولے افسوز کہ ننتون چھپی ءُ گڑاک کہ نن مخالف فوج ءِ دیر دروک خنپنہ بلکن اوفتے برجاء تینا پارہ غا بننگ آ خنینہ واہم گڈانی نا ساحل آ داد ئٹ مسن تے الّم خنینہ، داسہ پابو دننگا حالیت ئٹ ننے و ننا پروفیسر صاحب ءِ داد دیر ایتو؟
برجاء۔۔۔۔
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔
