زمین پهاز ءُ پیرک
نبشتہ : میار دشتی
دی بلوچستان پوسٹ
چیزّے نبشتہ بہ کن
کمّے بہ جیڑ……………………..!!
منی نَد ءِ بودِشت اِنچو نہ اِنت کہ پہ وتن شهید بیتگیں سرانی بابت ءَ اِسپیتیں تاک ءَ سیاه بہ کنت بَلے پد ءَ هما اِنسانی زمیر،……. هما باتنی جزبگ ءُ مارِشت اَنت کہ سکین دئینت بَلے اَنچیں کارِست هست کہ مردم ءَ لاچار کنت پہ نبشتہ کنگ ءَ اِے همے کارِستانی تمردی انت کہ منی نابودیں نَد اِسپیتیں تاکاں سیاه کنان انت.
لهتے اِنسان هست کہ مرگ ءَ چہ پد گْوش ئے پد ءَ همے دُنیا ءِ تہ ءَ دوبر زیبائیں زندگی ءِ واهُند بیت آ یک اَنچیں دروشُمی ءَ سمبھیت کہ سجّیں مردم آئی ءِ مھری جوڑ بنت……….. همے سما بیت کہ آ شئے بیت ءُ سرجمیں چاگرد آئی ءِ مُرید……….. آ دیم ءَ روان بیت ءُ لس مھلوک چو کاروانے ءَ آئی ءِ رندپداں جنزان بیت.
پد ءَ دگہ چیزّے بہ گُشاں سوبمندیں اِنسان هما اِنت کہ دنیا ءَ دوبر زندگی بہ کنت…………! آ اِنساناں من یک ندکاری ءِ درور ءَ بزیر آں بچار یک ندکارے یکبرے جهد کنت وتی کِسّھاں یک دپترے ءَ نبشتہ کنت ءُ همے نبشتہ کُتگینانی سر ءَ جیڑ اِیت ءُ دیم ءَ روان کنت داں وتی کِسّھاں سرجم کنت دانکہ همے دپتر ءَ پہ وانوکاں سر کنت………. گڑا آ اِنسان چو همے ندکار ءَ اَنت دنیا ءِ اولی زندگی ءَ پہ وتی کرد ءَ جهد کن اَنت کِرد ءِ سر ءَ جیڑان بنت داں آ کِرد ءَ یک شرّیں رنگی ءَ سمبهین اَنت ءُ دنیائے دومی زندگی ءَ گڑا آ بس وتی همے کِردار ءَ پہ لس مهلوک ءَ پہ سوگات ایر کن اَنت.
پیرک هما کارِست انت کہ آئی ءَ را زندگی مانا داتگ ، آئی ءَ پہ وتا نہ جیڑ اِتگ ، بس راج ، زمین ، راجی مڈّی ، هما گَل ، ءُ گل ءِ سنگت ءُ آئی ءِ راه ءُ راهبند…………..! اِے وڑیں اِنسان باز کم ودی بیت کہ پہ وت زندگی مہ کنت.
پیرک بامردی اَت ءُ راجی ڈبهانی زیروک راجی بامرد بنت آ کہ پہ راج مِر اَنت گڑا آ همے وڑیں تمردیں سر بنت هَو پیرک راهدربری اَت کہ داں زِند ءِ گُڈّی ساهت ءَ راج ءِ سوهُوی کُت ئِے، هَو پیرک تو نمیران ئے………..!
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
