سمّو ءُ جنگانی کسہ
گزین بلوچ
دی بلوچستان پوسٹ
سمّو !
راجدپتر نویس گُش انت کہ دنیا ءِ اولی دودمان (تہذیب) ءَ بگر داں مرچیگیں اھد ءَ ، ھرچ وھداں دنیا جنگانی آماچ بیتگ ، مئے واستا آ جنگانی کسہ تھنا راجدپتر ءَ پَشت کپتگ انت ، مئے زمین ھم جنگانی آماچ انت ءُ ما مرچی اے جنگی کسّھانی بھر ایں ۔
سمّو ترا یات بیت کہ وھدے تو ھما ڈکّ ءَ سر کپت ئے من گشت ”سمو کپ ئے، ایر بیا جھلءَ“ تو گوشت کہ من نہ کپ آں، من کمانڈرے ءِ چک آں۔ سمو ءِ کماندار نورا ،
سمّو پلستین ءِ کواسیں زانتکار مھمود درویش گش ایت کہ جنگ مردم ءَ چہ کسانیءَ پُھتہ کنت، چوناھا مھمود درویش ھم چو مئے ڈول ءَ کسانی ءَ چہ وتی زمین ءَ در پہ در کنگ بوتگ، ھمے ھاتر ءَ آئی ءِ زمین ءُ جنگ ءِ کسہ گوش ئے کہ مئے کسھانی چھرگ ءَ جن اَنت۔
سمّو !
لھتے روچ پیسر ءَ منی سنگتے ءَ گوں ھال بوتگ اَت ءُ من آئی ءَ گُشتگ اَت کہ نورا ءَ منی سلاماں بدے، سرجمیں سالے بیت کہ منی گوں آئی ءَ ھال ءُ اھوال نہ بوتگ، نورا وتی کاراں کوہ ءُ کوچگاں گوں دژمن ءَ سر ءُ چیر اِنت ءُ من گیش وتی کتاباں گوں دلگوش۔
26 اپریل ءِ سھب ءَ ھال اَتک کہ بلوچستان ءِ دمَگ پروم ءَ سنگتانی گوں دژمن ءَ جنگے بوتگ، نہ زاناں پرچی ءَ بلئلے منی گُمان وت سر ءَ پہ نورا ءَ شت، وھدے کہ نورا ذھن ءَ اتک گڑا من تئی ترانگ ءَ کپت آں۔ سمّو من وتی موبائل مٹ کتگ ءُ تئی دُراھیں اکس من گار کتگ اَنت ءُ یک پیم ءَ ودار ءَ بوتگ آں کہ کدی نورا ءِ گوما ھال بیت گُڑا من آئی ءِ گور ءَ تئی نوکیں اکسے لوٹ آں، اے روچ ءَ من ھمے ھیالانی تہ ءَ سر ءُ چیر اتاں سنگتے ءَ ھال کت کہ نورا گوں سنگتاں شھید کنگ بوتگ، من ءَ باور نہ بوت، گَل ءِ جار ونت کہ میجر نورا گوں سَے سنگتاں شھید بوتگ، بلے انگت باور کنگ ءَ نہ اِت آں، سمو اے ساھتءَ کہ من اے گالاں نبشتہ کنگ ءَ آں، من ءَ انگت باور بوگ ءَ نہ انت کہ نورا شھید کنگ بوتگ۔
سمّو !
من نورا ءِ اکسے دیست، آئی ءِ اے اکس ءِ گندگ ءَ گوں من ءَ یکبرے گمان بوت کہ پیڈل کاسترو اِنت، پد ءَ کہ اکسءَ را شرّی ءَ چار اِت تاں نورا اِنت، چوناھا پیدل کاسترو منی دوستیگیں ھستی یے (شخصیتے) ءُ نورا ھم ھمے اکس ءِ تہ ءَ منءَ نورا گیشتر دوست بوت چی ءَ کہ پیڈل کاسترو ءِ چھرگ ءَ جنگ ءَ ات، سمّو نورا پیڈل کاسترو ءِ ڈولیں بامردے بوتگ(ادا”بوتگ“ نبشتہ کنگ منءَ دوست بوگ ءَ نہ انت، بلے جنگ باز انچیں گالانی نبشتہ کنگ پرمائیت کہ آ ترا دوست نہ بنت) من ھیال کت کہ اگاں اے اکس تو من ءَ دیم بہ داتیں گُڑا من ءُ تو اے اکس ءِ سر ءَ باز گپ کتگ اَت، پد ءَ تو من ءَ گوشتگ ات کہ منی ابا کوہ ءَ اِنت۔
سمّو… ! من ءُ نورا مدام گپ ءُ گالانی میانءَ اڑ اِتگیں، اے پالیسی رد اَنت، اد ءَ چوش بوتگ، اود ءَ اے ڈول بوتگ، شپ روچ بوتگ ءُ روچ شپ بلے مئے گپ ءُ گال برجاہ بوتگ اَنت، برے برے انچو گمان بوتگ کہ ما سوگند وارتگ کہ یکے دومیءِ ھبر مَنّگی نہ اَنت، مئے گپ ءُ گالانی درستاں چہ وشتریں بھر ھما بوتگ کہ ما تئی سر ءَ گپ کتگ، تئی کسہ آؤرتگ اَنت، سمّو ما ایش گپ ھم کتگ سمّو مزن بیت بی ایس او ءِ چیئرپرسن بیت ،سمّو کہ مزن بیت مئے رھشونی ءَ کنت۔
سمّو ، اے ساھتاں منءَ تئی ءُ وتی کلیں ھبر گیر آیگءَ اَنت، نوراءِ گوما گوستگیں کُلیں ساھت ذھنءِ تہءَ تامرےءِ رنگءَ گوزگءَ اَنت، یاتاں نویس آں پد ءَ گالاں گار کن آں، چوناھا گران انت دوستیگیں سنگتےءِ چوشیں سِدگ، سک گران اِنت، پہ چیزےءِ نبشتہ کنگءِ ھاتر ءَ گال اوں ھمبراہ داری نہ کن اَنت۔
سمّو…!
1955ءَ امریکہ ویتنامءِ سر ءَ اُرش کنت، اے جنگ تاں 1975ءَ برجاہ دار ایت، اے جنگءَ امریکہ باز تاوان وارت، ھمے جنگءِ یک اکسے باز نامدار بیت، ھورٹس پاسءِ کش اِتگیں ایش اکسءِ تہءَ یک امریکی سپاھی یے اِلمیٹءِ سر ءَ نبشتہ اِنت کہ ”War is Hell“ ،من ھمے کہ اے اکسءَ گند آں گڑا جیڑ آں کہ راستیءَ ”War is Hell“۔ جنگ مردمءَ چہ وتی درستیں دوستیگیں مردماں سند اِیت، جنگ در پہ در کنت، جنگ مردمءِ کسانیءَ پچ گِپت۔
سمّو جنگ راستے کہ تاراجی یے ، بلے چے کن ئے؟ بلوچءِ گور ءَ جنگ کنگءَ ابید دگہ ھچ پشت نہ کپتگ، ھپتاد سال اِنت کہ بلوچءِ زمینءِ سر ءَ دری زور آور اَنت، بلوچءِ مال ءُ مڈّی پُلگ بوگءَ اِنت، بلوچءِ زِر بلوچءِ دستءَ نہ اِنت، زبان گاریءِ سیمسراں سر بوتگ، شال پیسر سگار ءِ ھرجان اَت ءُ نوں گوادرءِ سر ءَ چینءَ وتی چم ایر کتگ اَنت، جنگ تاراجی یے بلے بلوچءِ جنگ اِنت کہ بلوچستان، بلوچءِ دستءَ اِنت، اگاں اے جنگ مہ بوتیں گڑا بلوچءِ زمین پہ بلوچءَ گیش تنک تر اَت، جنگ کہ بیت گڑا سر ھم رو اَنت، بیست سال اِنت کہ بلوچ وتی سراں ببا دیگءَ اِنت، ھزاراں پیر، کماش ءُ ورنایاں وتی سر ببا داتگ اَنت، بلے جنگ برجاہ اِنت ءُ اے جنگ ھمے ھاتر ءَ برجاہ اِنت کہ نورا ءِ ڈولیں بامرد گوش اَنت کہ سر ءَ دئیں بلے زمینءَ نہ دئیں۔
سمّو نورا ءَ مدام بامردانی کسہ کتگ، نورا ءِ سنگت شیھو وَ کسہ کارے بوتگ، آئیءِ پُتینک پر بوتگ اَنت چہ بامرد ءُ جنگانی کسہ ءَ، چوناھا منءَ کسانیءَ چہ کسہ ءِ گوشدارگ وش بیت، زمینءِ کسہ، جنگانی کسہ، بامردانی کسہ، بگندئے ھمے ھاتر ءَ منءَ نورا ءِ ھمراہ داری وش بوتگ، بلے پد ءَ کہ منی تئی گوما ھال بوت، گڑا مئے کسہ مٹ بوت اَنت، بامردی کسھانی جاہءَ پٹ بال، ھور ءُ تَر ءُ گردانی کسہ بوت اَنت (نورا ءِ کسھاں ابید)۔
سمّو….! ھنوں دنیا ءُ جھانءَ کرونا ءِ کسہ اِنت۔ سرجمیں جھان اوشتءِ آماچ اِنت۔ پٹبالءِ کلیں گوازی Cancelبوتگ اَنت(بلے اے سیزن وش نہ اِنت، ال کلاسیکو ءَ بارسلونا دو گولءَ برگ بوت گڑا من گوازیءِ چارگ یلہ کت) اے وھدءَ گوں تو ھال نیست اَت کہ ترا ھال بدے آں، ایش ھم جنگءِ سوب اِنت کہ منی ءُ تئی ھال بوگءَ نہ اِنت۔
سمّو ، ھژدہ ماہ اِنت کہ منی ءُ تئی اولی ءُ گڈی دیوان بوتگ، سالےءَ گیش اِنت کہ منی ءُ تئی ھال نہ بوتگ، بلے سمّو اے ھژدھیں ماھاں من چہ تو بے ترانگ نہ بوتگ آں۔ سمو ءِ سر ءَ نبشتگیں شَیر ھم وتی گور ءَ ایر کتگ اَنت کہ اے منءَ تئی ترانگءَ گیج اَنت، من ھمے دوریانی ساھتاں چنچو کسہ جیڑ اتگ، چنچو کتاب ونتگ، چنچو سپر کتگ، تئی گوما اے کلیں کسہ کنگی اَنت، بازیں جاھانی اکس تئی سر ءَ دیم دیگی اَنت ءُ ترا جُست کنگی اِنت کہ اِنیچو وھد اِنت کہ مئے ھال نہ بوتگ تو چے چے کتگ؟ بلے جنگءَ انچیں جاور پیداک کتگ کہ من تئی گوما ایش کسھانی کنگءِ واستا ھال کنگءِ جاگہءَ ایش تاکاں سیاہ کنگءَ آں۔
سمّو کسہ باز اَنت بلے وھدے کہ زمینءَ جنگ بیت گڑا کلیں کسّہ گار بنت ءُ جنگ وت کسہ کار اِیت، بامردانی کسہ، زمینءِ پھازوکانی کسہ، زِرپھازانی کسہ، درویشءِ کسہ، نبی دادءِ کسہ، شیھو ءِ کسہ، نوراءِ کسہ۔
سمو….! ترا یات بیت من ترا گشتگ ات کہ CPECءِ دَگءِ سوبءَ شُمئے میتگءِ مردم در پہ در کنگ بوتگ اَنت، نوں اد ءَ چینءِ مردم کاینت ءُ نند اَنت تو گوشت کہ ابا اشاں نیل ایت، مرچاں کلیں سنگت تئی ابا(نورا) ءِ بامردیءِ کسہ ءَ کنگءَ اَنت، بی ایس او ءِ سیاستءَ بگر تانکہ آئیءِ شھادتءَ، تئی ابا (نورا) ءِ ایمان اَت کہ ما وتی منزلءَ روچے نہ روچے الم سر بیں، بامرداں ایش جنگ داں گُڈی منزلءَ دارگی اِنت ءُ تئی ابا (نورا) ءَ ایش جنگ داشتگ اَت یک بامردےءِ پیمءَ تاں وتی گڈی ساھتاں۔
سمّو…! نورا ءِ بامردیءِ کسہ باز اَنت، دانکہ ایش جنگ ھست اِنت نورا ءِ وڑیں بامردانی کسہ برجاہ بنت، من اے وھد ءَ اے گالاں کہ پتو نویسگءَ آں، من ءُ منی سنگتے نشتگاں ءُ جنگانی کسہءَ کنگءَ آں، بلوچءِ جنگءِ کسہ، سوریاءِ جنگ، اوگانستانءِ جنگ، کُردانی جنگ، بلے کلیں جنگانی کسہ اَنت۔
سمّو من جیڑگءَ آں کہ چو مہ بیت جنگءِ کسہ منی ءُ تئی پیسر ءِ کسھانی جاہءَ بگر انت، اے جنگ آماچیں زمینءَ دگہ کسہ چوناھا نیست اِنت، پشت کپتگیں کسھانی جاہءَ جنگی کسہ بگر اَنت گڑا پہ منی تئی درشان ءُ بیان کنگءَ کسہ نہ بیت،
سمّو من چوناھا جنگی کسھاں ابید دگہ کسہ ایوکءَ تئی ءُ تئی ھمرنگءِ گوما کن آں، تئی گوما ھال نیست اِنت ءُ تئی ھمرنگءِ گوما زھر آں، نوں منی کر ءَ پشت کپتگیں کسہ ایوکءَ جنگی کسہ اَنت،
سمّو … تئی ھال کنگ ءِ وداریگ آں ۔۔۔
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
