نمدی یے زاهد جان تئی نام ءَ
نبشتکار: زهیر بلوچ
دی بلوچستان پوسٹ
من ءَ اوں پہ تو زهیر کنت، بِگند ئے من مار اِت مہ کناں کہ تو بدواه ءِ زندان ءَ کجام جاورانی دیمپان ئے، بلے پہ تو داهم سلامتی ءِ نیکیں دُوا ءَ لوٹاں.
تو زوت آجو بات ئے پہ سلامتی گِس ءَ واتر بات ئے۔
دگہ هیر انت اِد ابید ء تو هچ وشی نیست ….گِس ءِ دروازگ تئی ودار ءَ هما وڑ ءَ پچ اِنت ءُ من نشتگاں،
دریچک ءِ تاکاں کہ وهدے گوات پَچ ءُ بَند کنت گُڑا من جاهسِراں بگند ئے تئی توار اِنت
من تچان تچان ءَ ڈن ءَ درکایاں اے دیم ءُ آ دیم چماں شانک دیاں داں چاراں هچ نیست،ملوریں نگاھاں گوں اوشتاں هُشک باں.
مرچی ترا شَش سال سرجم انت کہ بدواھاں ترا اَچ ما سِستگ ءُ جُتا کتگ،بلے تئی دوری ءِ آس انچو جمبور انت کہ نوکی گُش ئے روک بوتگ۔
همے کہ روچ ٹِک کنت من پرشتگیں کاپر ءِ منُگ ءِ بُن ءَ نندان ءُ چماں دروازگ ءَ سک کناں بگند ئے اے ساهت ناں آ ساهت تو کا ئے ءُ پُتر ئے ،من تچان تچان ءَ ترا امبازاں زوران ءُ دل ءِ دراھیں زنگاں ریچاں،بلے اے روچ اوں انچو آسر بیت ءُ رولھی دور کوهانی شَم ءَ چہ ایر روان گُلزمین ءَ بوسگے گیپت ءُ دراھیں مُرگ پہ درَنگ ءَ سرگراں …
تھاری گیشتر ودان بیت .
تو زان ئے من ءَ مرچاں تھاری سک دوست بیت چے ءَ کہ من تھاری ءَ گوں تئی ترانگاں گوازی کناں.
برے تئی وشیں گپاں گیر کاران ءُ وتسر ءَ کنداں….پد ءَ اناگہ هاموش باں ءُ گریواں۔
بلے هردیں کہ استالاں چاراں داں گنداں تو استالانی تہ ءَ درَپشگ ءَ ئے پمیشکا من ءَ استال سک دوست بنت۔
برے برے من استالاں چاران ءُ جُنزان باں انچو سَما بیت تو گوں ما همگام ئے من ءُ تو گپ ءَ جنان ءَ روان ایں، کندانیں…… مسکرا کنان ایں،بلے اناگہ ءَ جھل ءَ چاراں من سک دور اتکگاں…..
جنگلے درچکاں تھاری انت من ءُ تئی ترانگ
تو زان ئے ، من هردیں کہ ایوک باں کایاں اے درچکے ساهگ ءَ ننداں،چے ءَ کہ اے درچک ءِ سر ءِ کپوت کہ نال اَنت من ءَ انچو سَما بیت کہ اے کپوت ترا نازینگ ءَ انت ترا لوٹگ ءَ انت ترا توار ءَ انت،اے کپوت اوں منی وڑ ءَ پہ تو زهیر وار انت.
هردیں کہ گوات کش ایت اے درچک ءِ شاه لُڈگ بِنا کن انت انچو سَما بیت کہ اے درچک ءُ دار اوں تئی وازمندگ انت۔
چی ءَ کہ ترا درچک ، دار ءُ مُرگانی درسانی گم پِر بوتگ.
من هردیں کہ اے میتگ ءِ دمکاں گرداں گڑا ماراں کہ درس ابیتک انت درس ملور انت،هَمُک ندارگ گُش ئے آس شانگ ءَ انت ءُ اے درس پہ تو زهیر وار انت.
من ءَ اوں پہ تو سک زهیر کنت.
هیر گپ و باز انت ….
تو زان ئے تو نوں بیا واتر کن…..
زوت آجو بات ئے زاھد جان
دگہ هیر انت اِد ءِ بس تئی کمی انت ، اے کمی زوت پُر بات
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
