لاچاری
مراد بلوچ
دی بلوچستان پوسٹ
داں من سر چِست کتگ ءُ من ءَ ھوش کنت من ھمے گندگ ءَ آں کہ مئے سرڈگار ءِ سر ءَ ھرچ نیمگ ءَ مئے مات ءُ گوھار ، کماش ءُ ورنا ، زھگ ءُ زالبول بزاں کہ مئے بلوچ راج ءِ ھر آدم زات اڑ ءُ جنجالانی دیمپان اِنت،وار ءُ بزگ اِنت ، ڈالچار ءُ لگتمال اِنت ، گار ءُ بیگواہ اِنت ، جنگ ءُ کُشگ بوگ ءَ اِنت ، ھر پِڑ ءَ ایر دست ءُ لاچار اِنت، ھمے جیڑہ ءُ جنجال ھر روچ گیشتر بیان اَنت بلے کم ترّگ ءِ نام ءَ نہ زان اَنت۔
ھمے جیڑھاں چہ یکّے مئے وانگ ءُ زانگ ءِ جیڑہ اِنت من سرپد باں کہ بلاھیں اڑ ءُ جنجالے پمئے راج ءِ واستا ، چی ءَ کہ ھرچ راجے ءِ دیمروی ءِ واستا وانگ ءُ زانگ المی اِنت، بلے مئے راج ءِ بدبھتی ھمیش اِنت کہ مئے راج ءِ وانگ ءُ زانگ ءِ ھک پچ گرگ بوتگ، مئے شھزانت ءُ سرپدیں مردم برگ ءُ بند کنگ بوگ ءَ اَنت ، شھید کنگ بوگ ءَ اَنت ءُ نوں چیزے وھد بیت کہ بلوچ زالبولاں چہ وانگ ءُ زانگ ءَ دور کنگ ءِ جھد بوگ ءَ اِنت، مئے زالبول لاچار بوتگ انت کہ کشکانی سر ءَ در بیا اَنت ءُ زھرشانی بہ کن انت۔
اے ھبر ھم راستے کہ ھر زوراکے وھدے کہ یک راجے ءِ سر ءَ ارش کنت آئی ءَ وتی گلام دارگ ءِ واب ءَ گنِد ایت گڑا ھما زوراک ءِ جھد ھمیش بیت کہ ھما راج ءِ زبان ءُ دود ءُ ربیدگاں ھلاس ءُ راج ءَ چہ وانگ ءُ زانگ ءَ دور بہ دار آں ،چی ءَ کہ یک زانتکار ءُ سرپدیں راجے ءِ گلام دارگ گرانیں کارے بیت، پمیشکا مئے دُژمن ءِ جھد ھمیش اِنت کہ بلوچ راج چہ وانگ ءُ زانگ ءَ زبھر بہ بیت ءُ وتی آجوئی ءِ واب ءَ مہ گند ایت ءُ جھد مہ کنت۔
مئے مردم انچوش کنگ بوتگ انت کہ آ تھنا سجھیں زند ءَ وتی زھگانی دو وھد ءِ ورگ ءِ ھاتر ءَ جھد بِہ کنت تا کہ بیران بہ بیت، اگاں کسے وتی زھگانی وانینگ ءِ جھد ءَ بہ کنت گڑا بزاں کہ آئی ءِ جند یا آئی ءِ زھگ برگ ءُ گار کنگ بیت۔
ھمے واستا دژمن مئے نوجواناں وانگ ءَ نیل ایت ءُ بارت بیگواہ اش کنت ، مئے گوھاراں روچے یک رنگے ءَ بزگ کنت، برے یک پندلے ساز ایت۔
شرم نہ کنت ھما واجہ کاراں کہ وت ءَ بلوچ ءِ درد وار گْوش اَنت بلے گوں دژمن ءَ نشتگ انت ءُ مئے مات ءُ گوھارانی سودا ءَ جَنَگ ءَ اَنت، مئے مات ءُ گوھارانی چہ چماں رِتکگیں ارسانی سر ءَ سیاست کنگ ءَ انت۔
نوں پہ بلوچ ءَ پشت کپتگیں راہ ھمیش اِنت کہ بلوچ وتی وت واجھی ءُ آجوئی ءِ ھاتر ءَ جھد ءُ کوشست بہ کنت، جنگ بِہ کنت،کربانی بہ دنت ، تا کہ بلوچ ءِ آیوکیں پدریچ بزگ ءُ وار مہ بیت، بلوچ ءِ مات ءُ گوھار کِشکانی سر ءَ در پہ در ءُ بزگ مہ بیت ، بلوچ پہ دو وھد ءِ نگن ءِ واستا وتی زند ءِ سودا ءَ مہ جنت ءُ پہ دری ملکاں چو درامد ءَ زندگی مہ کنت ، بلوچ ءِ نوک بروتیں بچ گار ءُ بیگواہ کنگ مہ بنت ،یک ماتے پہ وتی بچ ءِ شوھازگ ءَ ءُ یک گوھارے پہ وانگ ءِ واستا کِشکانی سر ءَ چلگی زمستانی شپاں در پہ در مہ بیت ءُ یک شش سالی ئیں زھگے پہ وتی پِت ءِ شوھازگ ءَ شد ھڑتالی بندر ءَ مہ نند ایت ءُ مہ گریت۔
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
