شیر
نبشتہ کار: سکی ساوڑ بلوچ
دی بلوچستان پوسٹ
شیر! وھدے کہ من ءَ ھمے ھال سر بوت کہ تو چہ مارا جتا کنگ بوتگ ئے گڑا ترا باور کنت منی سرجمیں جان یکبرے بُنڈ بوت ءُ من ھیران بوت آں کہ تو چہ مارا چوں زوت جتا بوت کن ئے، پرچاکہ تو مدام ھمے گْوشتگ اَت” ما یکجاہ ایں ءُ الّم پد ءَ دوچار کپ ایں ءُ مارا انگت باز کار کنگی اِنت، بلے ترا چہ مارا جتا اِش کرت، اد ءَ من ترا کدی بے وپا گْوشت نہ کن آں پرچاکہ تو بے وپائیں سنگتے نہ بوتگ ئے ءُ بوت نہ کنت.
شیر! تئی مسکرائی ءُ ھندگ اے بے تاھیریں دل ءِ ءُ نزوریں چمانی دیم ءَ نکش اَنت ءُ انگت من ءَ باز جیڑگ ءُ ارس ریچگ پرماگ ءَ اَنت، شیر من نہ زان آں کہ من گوں وتی اے بے زانتی ءَ پہ تو چے نبشتہ بہ کن آں؟
شیر ما انگت تئی ھندگاں سیراپ نہ ات ایں کہ تو جتا کنگ بوت ئے، شیر من زان آں کہ تئی روگ ءَ پد کراچی یونیورسٹی ھم بے چاڑ ءُ ملور بیت کہ تئی ھندگاں ءُ مھراں یونیورسٹی ءَ را ھم تاھیر بکشاتگ اَت.
شیرو منی ساہ، اے چاگرد ءِ یک بلاھیں اوستے گوں ترا بندوک اَت ءُ تئی مدام لوٹگ اَت کہ بلکیں تو من ءَ چہ تھاری ءَ در کن ئے ءُ یک روژنائی یے بکش ءَ ئے، شیر تئی روگ ءَ اے چاگرد ءَ را ھم گیش تھاری ءِ ارجان کرت.
شیر مروچی کجام سنگت اِنت کہ تئی روگ ءَ پد گمیگ ءُ ملور نہ اِنت، آ کجام سنگت اِنت کہ تئی بچکندگ ءُ مھراں شمشت کرت کنت، آ کجام سنگت اِنت کہ چہ ترا دل گران ءُ دل چِل اِنت، آ کجا سنگت اِنت کہ تئی بے مھری ءِ گلگ کنت، آ کجام سنگت اِنت کہ تئی مھراں تاھیر نہ بکشاتگ، شیر آ کجام سنگت اِنت کہ تئی جتائی ءِ ھال ءِ اشکنک ءَ پد وتی گوں ملوریں چھرگ ءَ آھ ئِے در نہ کرتگ، اڑے منی شیر آ کجام بدبھت اِنت کہ ترا چہ مارا جتا ئِے کرت، منی شیرو ءُ منی شیر من یار چے نبشتہ بہ کن ءُ تئی کجام داتگیں دادنی بارو ءَ نبشتہ بہ کن آں؟
شیر ھمے وھد ءَ کہ تیر تئی دلبند ءَ چاک دے اَنت ، من زان آں ھمے وھد ءَ ھم تئی پر مھریں لنٹانی سر ءَ بچکندے تالان بیت ءُ تو ھمے گْوش ئے ” اڑے زالم تو من ءَ چہ سنگت ءُ چاگرد ءَ جتا کرت نہ کن ئے”.
شیر اے وھد ءَ منی چمانی ارس ماں ارناکانی سر ءَ لیب کنان اَنت ءُ دیم پہ جیگ ءَ رھادگ اَنت ءُ دست ھم گیش بے ھاٹیگ بوان اَنت، بس گڈی ءَ ھمے گْوش آں” تئی داتگیں داد مدام مئے ھمراہ اَنت”.
منی شیر تو نمیران ئے اڑے منی شیرو تو نمیران ئے.
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
