21 اُستپان زبانانی جھانی روچ
گلؔ بلوچ
دی بلوچستان پوسٹ
مرچیگیں روچ کلیں جھان ءَ زبانانی روچ زانگ بیت ، زبان ءِ انسان ءِ اولی لوٹ ءُ بچار انت، بے زبان ءَ انسان چش دلوت ءِ رنگ ءَ انت، مروچی ھمے روچ ءَ دنیا ءِ مردم پہ وت ءَ یک شریں روچے سرپد بنت ، بلے بژن ایش انت کہ مئے زبان سک پشت ءَ کپتگ ءُ ما ھمے روچ ءِ ارزشت ءَ شری ءَ نہ زان ایں ، ما زبان ءِ کدر ءَ نہ زان ایں ، بلے زبان انسان ءِ اولی مستریں لوٹاں چہ یکے ، بے زبان ءَ راج گار ءُ بیگواہ بیت، ھر راجے کہ دیم ءَ شتگ گڑا آئی ءِ زبان ھم دیم ءَ انت ، آئی ءَ وتی ماتیں زبان چہ ساہ ءَ دوستر بیت ۔
زبان ءِ زندگ دارگ ءِ واستا ءَ ھر راج ءَ پہ وت ادارہ جوڑ کتگ ءُ وانگجاھاں چہ بندات ءَ وتی زبان ئِے گون اِنت ، بلے بژن ایش انت مئے بلوچ راج چہ اے چیزاں زبھر انت ، ناں پہ بلوچ ءَ شریں وانگجاہ ھست ناں دگہ ادراھے ھست کہ وتی زبان ءَ بہ وان ایت ءُ زبان ءَ زندگ بہ دار ایت ، بلے اے ھم الم نہ انت کہ ما بہ گش ایں ما گلامیں کوم ایں ءُ مئے دست ءَ ھچ نہ بیت ،گڑا اے مئے ردیں پگرے ، بلکیں زبان زندگ دارگ ءِ واستا ھر تک ءُ پھناتاں مارا وتی جھد کنگی انت ، وتی ماتیں زبان وانگ ءُ وانگی انت ، اگاں مئے زبان پھک گار ءُ بیگواہ بہ بیت ، مستریں گلام ھمے زانگ بیت کہ ما تھاری ءِ مدامی ھمکوپگ بہ ایں ۔
مرچی باندا ، رسانکدر ءِ دور انت ، پیسبک ءُ وٹسپ ھر جاہ ھست ءُ لبزانکی دیوان ھم جوڑ کنگ بوتگ اَنت ، مئے وتی زبان وانینگ بوگ ءَ انت ، باید ھر بلوچ کسان مزن ، جنین مردین ، ھمے دیواناں ھوار بہ بنت ءُ وتی ماتیں زبان ءَ در بہ بر اَنت۔
مارا وتی کم کم ءَ دیم ءَ برگ ءُ برجم دارگ لوٹ ایت ءُ الم یکروچے ما سوبمند بہ ایں پرچاکہ ھشکیں نندگ ءُ چارگ ءَ کار شر نہ بنت ۔
گڈسر ءَ من گوں راج ءَ دزبندی کن آں کہ وتی ماتیں زبان ءَ الم بہ وان ایت ءُ پہ آئی ءَ الم جھد بہ کنت کہ زندگ بوگ ءِ مستریں چیدگ زبان انت۔
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
