زندگ پکریں انسان، کمالان بیبگر
نبشتہ کار : جابر مُراد
دی بلوچستان پوسٹ
برے برے من سک جیڑاں ءُ
جیڑاں جیڑان ءَ داں ھما وھد ءَ کہ منی مجگ کار ءَ یلہ دنت ءُ من دلپروش باں، سک دل پروش ،بے کساس دل پروش داں ھما ھد ءَ دلپروش باں کہ من گوں وت ءَ ھمے گُش آں کہ جیڑگ پہ تو نہ اِنت، نی بس اِنت جیڑگ اد ءَ ھچ نیست پہ جیڑگ ءَ تو وت ءَ مُپت ءَ گنوک کُتگ ءُ نشتگ ئے، جیڑ ئے پہ کے ءَ جیڑ ئے ءُ چی واستا جیڑ ئے، برے دل گُش ایت کہ تو پہ نام ءَ جیڑگ ءَ ئے ، پد ءَ اے ھم گنداں کہ ھما مردماں نام کش اِتگ آیاں زاناں چی مُز رس اِتگ، بیت کنت چندے مردم ءَ اگاں ھستیں وھد ءَ ھمے کردار ءِ سوب ءَ کمے ازتے بیتگ یا ھست بلے بازیں ھنچیں کردار ھم ھست اِنت کہ آیانی مرگ ءَ پد آیاں نام دیگ بیتگ گڑا چوں درستیں چیز پہ نام کنگ بنت،؟
اے ھم گندگ ءَ کیت ھما مردم کہ نامے ءِ واھُند اَنت بلے انگت ءَ مئے تہ ءَ آیانی نام ھوار نہ اَنت.
برے پَرے سال ءُ پَرا سال آیانی نام بس چندے مردم ءِ دپ ءَ گرگ بیت ءُ برے برے نہ لوٹ اِتگیں دل ءِ ھم مردم آیانی ستا ءَ وتی زُبان ءَ کار اِیت کہ یکّے اگاں آئی ءَ جُست بہ گیپت وتی کارے گڑا آیانی کر ءَ وتی کُتگیں کارانی ستا مہ بیت ھما دمان ءَ ھما مردمانی نام ءَ زُبان ءَ کار ایت ءُ وتی کار ءَ کنت ،بلے پد ءَ اے جُست ھم کیت ءُ دیم ءَ اوشت اِیت کہ ھما مردماں نام کش اِتگ آیانی مرگ ءَ پد چہ اے نام ءَ آیاں چی نپ ءُ سیت رس اِتگ ؟
برے دل اے ھم گُش ایت کہ مردم چی ءَ ھمے نام ءِ کشگ ءِ واستا وتی درستیں وھد ءَ دے اَنت ءُ وتی زند ءِ لوٹ ءُ واھگاں گُٹوس کن اَنت ،زاناں مئے چاگِرد ءِ تہ ءَ نام کشگ ھمینچک اژدری اِنت ؟
گوں وت ءَ منی جست ھچبر ھلاس نہ بَنت ،برے راج ءِ لوٹاں گِنداں ھیران باں کہ اے وڑیں راج ءِ تہ ءَ مَردم نام چی ءَ کش اَنت ءُ اے راج ءِ لوٹ نام کشگ ءِ کابِل ھم نہ اِنت ،پد ءَ من ءَ بژن بیت تاں اے گپ ءِ جنگ ءَ کہ کجام لوٹ اد ءَ وَ ھرکسی لوٹ ھم یک نہ اَنت، ھرکس بس وتی واھشتانی گلام اِنت، ھرکسی راہ جتا، لوٹ جتا ،ھرکس ءَ پہ وت ءَ یک جُتائیں راھے درگپتگ ءُ اوشت ءِ آماچ اِنت،پرچا کہ سپر ھما راہ ءَ کنگ بیت کہ آ راہ ءِ گُڈسر ءَ تو منزلے پہ وت ءَ بہ گند ئے، ل اے منی ھمک روچ ءِ کسہ اِنت کہ ایشاں چہ من بس وت ءَ جنگ ءِ تہ ءَ شکست وارتگیں سپاھیگے سرپد باں کہ دست بُرز اَنت ءُ پہ دو روچ گیش زندگ بیگ ءِ ھاتر ءَ لوٹ کنگ ءَ اِنت ،بلے اے درستیں چیزاں چہ پد دگہ بازیں ھنچیں مردم ھم گندگ ءَ کیت کہ آ چاگِرد ءِ دیمروئی ءَ پہ جوانیں رنگ ءَ جھد کنگ ءَ اَنت آیانی پکر پہ چاگِرد ءِ دیمروئی ءَ مھکم اِنت آیاں ستک اِنت کہ ما الم چیزے ناں چیزے کن ایں.
ھمے زندگ پکریں مردمانی تہ ءَ یکّے کمالان بیبگر اِنت چوناھا من کمالان ءَ نزاناں بلے آئی ءِ کتگیں ھرچ کار پہ چاگِرد ءِ دیمروئی ءَ یک مھکمی یے ءِ نشانی انت،بلوچ ھرچ نوجوان ءَ پہ چاگِرد ءِ دیمروئی ءَ کمالان ءِ وڑیں پکر دارگی اِنت ءُ کمالان جوڑ بیگ اِنت.
ھر وھدے من کمالان ءَ چاراں گڑا من ءَ منی بازیں جستانی پسہ رس انت کہ بازیں ھنچیں مردم ھست کہ چہ وت ءَ گیش دگر ءَ پہ زندگ بیگ لوٹ اَنت پہ دگر ءِ لوٹ ءُ تماھانی سرجم کنگ ءَ وتی وھد ءَ دے انت ءُ وتی وشیاں گٹوس کن اَنت.
ھما وھد ءَ من زاناں اے نام نہ اَنت اے ھنچیں چیزے کہ ترا لاچار کنت پہ دگر ءِ وشیانی ھاتر ءَ وت ءَ شموشکار بہ بئے ءُ وتی زات ءَ چہ سر بہ گوز ئے ۔۔۔۔۔۔
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
