ٹیسٹوناکامورہ، بے سلاہ ءَ جنگ کنان اَت – بالاچ قادر

ٹیسٹوناکامورہ، بے سلاہ ءَ جنگ کنان اَت
(اوگانستانءِ دمگ جلال آباد ءَ کشگ بوتگیں جاپانی میڈیکل ٹیم ءِ سروک ٹیسٹو ناکامورہ ءِ یاتءَ)

بالاچ قادر

دی بلوچستان پوسٹ

انسانی چاگرد ءِ تہ ءَ لہتیں انچیں تمردیں مردم ودی بنت کہ آہاں دنیا ءِ زلورت نہ بیت بلکیں پراہاں دنیا ءَ کار کپیت۔ اے وڑیں بنی آدم زندمان ءِ بنکی ارزشت ءَ سرپد بوگ ءِ ھمراہی ءَ اے زمین ءِ سرا آئیگ ءِ وتی جند ءِ مول ءُ مراداں ھوں زان اَنت۔ دنیا ءِ راجدپتر ءَ اگاں بچارئے ترا دو تہر ءِ مردم دست کپیت۔ یکے ھما کہ آہاں بمب، تیر ءُ توپگ ءُ ٹوپ جوڑ کتگ اَنت کہ چریشاں ھمک روچ سدانی ھساب ءَ مردمانی زندمان پلگ بوگا اِنت ءُ یکے ھما کہ آہاں لیٹ جوڑ کتگ، چراگ جوڑ کتگ اَنت کہ چریشاں انسان تہاری ءَ گوں جنگ کرت کنت۔ اے دنیا ءِ تہ ءَ لہتیں مردم ھما اَنت کہ آ انساناں کُشان اَنت، زھم ءُ تیرانی گوازی ءَ کنان اَنت وھدیک نیمگے ھما انسان اَنت کہ پہ انسانانی دردانی ٹپاں زیم جوڑ کن اَنت، مردماں دارو ءُ درمان دئینت ءُ زندگیاں رکینگ ءِ جہد ءَ دزگٹ اَنت۔

پاکستان ءُ افغانستان دو ہمساہگیں ملک اَنت، ھردو ملکاں انسان ءِ جان ءَ کیمت نیست۔ بمب ءُ تیر ءِ گوازی اِنت، ھمک روچ بے میاریں انسانانی ھون رچان اَنت۔ ھر سہت ھونانی شہجو تچ اَنت۔ اے دمگاں پہ انسانی زند ءِ رکینگ ءِ ھاترا لہتیں انچیں مردم بیتگ اَنت کہ آہانی جند ءُ بندر چناہا درامدیں ملکاں چہ بوتگ بلئے آہاں وتی زندمان ھمے جنگ زدگیں دمگاں گوں نادراھانی علاج ءُ  تیرسپتگیں لاشانی چنگ ءَ گوازینتگ۔

یکے ڈاکٹر رتھ فاؤ اَت کہ آئی ءَ وتی ورنائی ءِ بہاریں روچ پاکستان ءَ گوازینت اَنت ءُ ھمدا مُرت ھم۔ آئی ءِ بندری دمگ جاپان اَت، جاپان زیبائیں ءُ سیرلاپیں ملکے اود ءَ انسانی زندمان نوکتریں آسراتیاں گوں سر ءُ چیر اِنت۔ بلئے ڈاکٹر رتھ فاؤ پہ انسانانی زندمان ءِ ھاترا وتی ملک، وتی دمگ، وتی گس ءُ جاگہ یل دات ءُ دراھیں زندگی داں مرگ ءِ سہت ءَ ھمد ءِ مردمانی ھزمت کنگ ءَ پہ گوازینت۔

دومی نام ٹیسٹو ناکامورہ (Testu Nakamura)ئیگ اِنت کہ آئی ءِ بنکی سیادی گوں جاپان ءَ اَت بلئے زندے ماں افغانستان ءِ  وڑیں جنگ زدگیں دمگے ءَ گوازینت۔ جاپان پراہی ءَ تنگ نہ اَت۔ اودءَ زندمان پلگار ءُ آسان اِنت ءُ افغانستان ءَ زندگی ءُ مرگ کجام ھوں سہت ءَ دُچار کپت کن اَنت بلئے ناکامورہ ءَ ساہ کوار ءَ کُت ءُ درکپت۔ انسانی راجدپتر ءِ تہ ءَ وتی ساہ ءَ دست ءِ دل ءَ ایر کنگ ءُ پہ جنگ ءُ مڑ ءَ رؤگ ءِ بازیں کسہ ھست اَنت بلئے چشیں کسہ باز کم اَنت کہ کسے جنگ زدگیں دمگے ءَ پہ ھمے اوست ءَ وتی ساہ ءَ کوار ءَ کنت ءُ درکپیت کہ آئی ءَ انسانانی ساہ رکینگی اِنت۔ بنیادمانی ھون ساپ کنگی اَنت، لاشو چنگی اَنت۔

ناکامورہ  2008ءَ Head of Japan Peace Medical Services ءِ بستارءَ افغانستان ءَ ھما وھد ءَ اتک وھدے کہ آئی ءِ ٹیم ءِ یک مردمے بیگواہ کنگ ءُ کُشگ بوتگ اَت۔ آئی ءَ وتی کشگ بوتگیں سنگت ءِ Mission زُرت ءُ پہ ھمے اوست ءَ اد ءَ آہت کہ من انسانانی درداں زیمیگ پر کناں، کپتگیں لاشاں کوپگ دئیاں۔ آ مدام بدیستیں کوہے ءِ تہ ءَ، جنگلے ءِ میان ءَ، سڑکانی سرا یا شہر ءُ بازاراں زندمان رکینگ ءِ سامان بہر کنگ ءَ اَت۔ ٹپ وارتگیں بے وسیں مہلوک ءِ ھوناں پہک کنان اَت بلئے اے گپ ءَ ھوں زانتکار اَت کہ منی ھمراہ ھمے زمین ءَ مہلوک ءِ ھوناں پہک کنان ءَ وت ھون ریچ بوتگ اَنت۔ ناکامورہ ءَ زند ءُ مرگ ءِ گمان ءَ چہ گیش اے ھیال گور اَت کہ اچ منی دست ءَ چنچو مردمانی جان رک ات کنت، چہ من چنچو بے وسیں، تیر وارتگیں زھگانی ٹپ دارو کنگ بنت۔ آ گوں ھمے مکسد ءَ زندگ اَت۔

ھمے انسان شناس، مردم پہاز ءُ زیبائیں انسان بزاں Testu Nakamura، 4 دسمبر 2019 ءَ ھما وھد ءَ چہ جند ءِ کوارءَ کتگیں ساہ ءَ زبہر بوت وھدے افغانستان ءِ دمگ جلال آباد ءَ آئی ءِ گاڑی ءِ سرا ارش کنگ بوت۔ ناکامورہ ءِ مکسد انسان ءِ رکینگ اَت ءُ آ ھمے جہد ءِ میان ءَ گوں وتی شش ھمراہاں جنگ ءُ کُشگ بوت۔

ھمے مردماں کہ ناکامورہ ءُ آئی ءِ سنگت تیر آماچ کُت اَنت اسل ءَ آہاں نوں پروش وارتگ اَت پرچہ کہ ناکامورہ ھوں جنگے کنگ ءَ اَت۔ آ کُشان اِت اَنت ءُ ٹیسٹو لاشاں چنان اَت، آ جنان ات اَنت، ناکامورہ ھوناں شودان اَت، آ ٹپیگ کنان اِت اَنت ءُ ٹیسٹو ناکامورہ دراھیِ درمان بہر کنان اَت۔

اسل ءَ ھما کُشندہ زانتگ اَت کہ ٹیسٹو اچ ما باج برتگ پمشکا آہانی کرا مقابلہ کنگ ءِ ھچ ھاٹیگ نیست اَتءُ ٹیسٹو کُشت اش۔ آئی ءِ مرگ رند ءَ نوں باریں دگہ کسے وتی دست ءِ دل ءَ ساہ ءَ ایر کنت ءُ بے وسانی جوناں چادر پردئیگ ءَ افغانستان ءَ کئیت۔۔۔! ٹیسٹو ءِ کُشگ اسل ءَ یک زندمان شناسیں انسانے ءِ کشگ نہ اِنت بلکیں سرجمیں زندمان ءِ مرگ اِنت۔

ٹیسٹو ءَ سلاہ گون نیست اَت، تیرءُ تُپنگ گون نیست اَت، خنجر ءُ زھمے گون نہ اَت بلئے مدام بدیستیں جنگ ءَ اَت۔ آ مڑوکیں سپاھیگے اَت کہ سلاہ ءَ ابید گوں ھشکیں بچکندگاں ھوں جنگ کنگ ءِ رپکے زانتگ اِت اَنت۔