بیست ءُ پنچ دسمبر ءِ شیدائیں روچ
اکیل مراد
دی بلوچستان پوسٹ
سرڈگار مھرانی جَنت ایں آئی ءَ جَنت ءَ چوں دوستانک کنگ زمین ءِ دوستی اِنت ھاک ءِ وشبوئیں ءُ زیبائیں پُلکانی تہ ءَ گوازی کنگ ءُ آیانی پھازگ جِند ءِ بَچانی باسکان اِنت
باسک کَے اِنت؟
من ءَ؟
توے؟
زمین ءِ پاکیں دامناں رُستگیں بَچانی چکاریں ھوناں زمین ءِ مِچلیتگیں ڈن ءُ ڈاکاں کہ سبزاوگیں درچکانی لمباں زھیر نالیں کوش ءِ شِکگاں کہ دل ءَ تاھیر دے اَنت گڑا زمین ھم ھمے چیزانی تاھیری اِنت کہ آئی ءِ بَچ پراھی ءَ تاھیری اَنت آئی ءِ رکینگ، آئی ءِ زھیرنالیں کوشانی شِکگاں کہ بُتکگیں ھونانی سازگار ءَ بندوکیں گرنچ ءُ وشتامی ءِ شَھجواں زَرینان
اے ھمے مستاگیانی تام اَنت کہ آئی ءِ شیدائی ءَ رُژنائیں چراگ روک بیت ءُ مِریت آئی ءِ گوات ءِ ھبیل ءَ تھنائی ءِ سگاراں مٹینان کَنت ءُ یک نوکیں راھے ءِ شوھازگ ءَ در کپ اِیت
ھما راھے تہ ءَ پروشتگیں ءُ دمبرتگیں ودارانی تیلانک ھم ھوار اَنت آئی ءِ تہ ءَ کسان ءُ مزن ءُ ننویں زھگانی چیھال ءُ آئی ءِ بِرستگیں ءُ پیچ ءُ تابیں پندانی شوھازگ ءِ تچک کنگ ءَ سرانوانی راھسراں وابجاھی اَنت
سرڈگار ءِ شیدائیں بچ کہ پہ سرڈگار ءُ آئی ءِ گھبودی ءَ زروک اَنت گڑا آئی ءِ درستیں تماہ ءُ لوٹ گوں سرڈگار ءِ مھراں بندوک اَنت آئی ءِ لوٹ تھنا ھمیش بیت کہ آئی ءَ مھرانی دل وتی مات کوھانی ھسار کنگی اَنت آئی ءَ وتی درستیں شیھے پہ ھاک ءِ وشبواں ندریگ کنگی اَنت آئی ءِ مھرانی دل ءُ مھرستانیں میتگ ءُ جاہ تھنا شیپک ءُ تلار بندیں کوہ ءُ سیتگیں ڈنانی تہ ءَ پند بُروگ ءُ آئی ءِ مھرانی نَز آرگ اِنت
نِی بیست ءُ پنچ دسمبر، سارتیانی ھمگرنچیں شپ ءُ روچ زِمستانی ٹینٹگیں روچ کہ آئی ءِ ملور کَشیں رژن کہ من ءَ بژینگ ءُ کوھتیگ کَنت کہ چوشیں کُوھت ءُ دل دردناکیں روچ پمن ءَ ایوک ءَ نہ اِتگ بلکیں آئی ءَ اے بیست ءُ پنچ دسمبر ءِ روچ ءَ بلوچ ءُ بلوچ ڈگار ءِ سرجمیں درچک ءُ دار ارسیگ کُت اَنت
ھمک شھر ءُ میتگاں یک بے تواریں برمشے ءِ لمباں وت ءَ پُجارین اِنت بلوچ ڈگار ءِ کوہ ءُ ڈناں بہ گر تاں ھر ھما شیھے کہ پہ وتی گنجیں مھروان ءَ زروک بیتگ اَنت بلے بیست ءُ پنچ دسمبر ءِ دل دردیں روچ ءَ کوھتیگ کُت اَنت
مردنی منی جند ءِ ساہ کَشیں ارواہ گْوش اِیت کہ پمن ءَ اے روچ اگاں واجھیں شاہ وند ءَ گچین بہ کُت ایں بَلے اے دردناکیں کِسہ ءُ آئی ءِ داستان پمن ءَ ایر مہ کرتیناں مروچی منی دست ھم اے چِن ءُ چینکیں لبزانی نویسگ ءَ لرز اَنت کہ چَہ کجام داب ءَ ھست کَشیں ءُ مھروانیں انسانی بارو ءَ وتی چِت ءُ چینکیں لبزاں بہ شکسایاں بلے اے ھمے دل ءِ درد ءُ گم کَشیں کوھت اِنت کہ دل ءَ کم ءُ باز تاھیر بکشی بیت،
نِی ھما شولام کَشیں ءُ درچکانی ایریچیں ماہ کہ سبزاوگیں زمیناں ھُشک ءُ ھلاس کنت
بَلے زمین ءِ مھروان ھِچ بر ھلاس نہ بنت آئی ءِ کرد ءُ سَسا مدام وتی زندگیں ھمبلانی کوپگاں چیر اَنت آئی ءِ ھمک کرد ءُ سَسّا دمتوسیں پنداں یک نوکیں نام ءُ تمردی ءِ بکش اَنت
ھمے نام ءُ بامردانی تہ ءَ جنرل جان گوں ھمراھاں ھوار اِنت کہ آیانی ھونانی شَھجو ھمک ورنایانی چماں ھوناک کن اَنت آیانی ھونانی سھری ھمک ورناھاں تلام اِنت ءُ روان اَنت اے پند جنوکیں کِشک جنرل ءَ یک بازیں کِساسے ءَ دیستگ من بلوچ ءِ پدریچ ءَ باز کم کساس ءَ گِندگ ءَ کیت
کہ اے دراج کَشیں پند ءِ تہ ءَ جنرل ءِ وڑیں بامرداں مزن ءُ ٹوھیں کِردانی نِھال کِشتگ ءُ شتگ اَنت ھمے نِھالاں مروچی جنرل ءِ دراجیں پند نزیک کُرتگ ھمے سما بیت کہ جنرل پہ وتی زمین ءِ مھرانی امبازگ ءَ سوبمند بیتگ
کہ آئی ءِ کوھیں دل ءَ پہ زمین ءِ مھراں چی نہ بکش اِتگ چو ابراھیم ءَ کہ پہ ھدا ئِے مِھراں اسمائیل سالونک کُت ھمے وڑ ءَ بامردیں جنرل ءَ پہ زمین ءِ مھراں ریھان سالونک کُت کہ آئی ءِ بچی ءِ مھراں چَہ گیش زمین ءِ مھر گیشتر اِت اَنت کہ آئی ءِ دست دمانے ءَ لرزیشے ءَ ھم نہ گپت اَنت کہ اے رُستگیں بچ ءُ زانتگیں بَچ ءَ پہ زمین ءِ نام ءَ بکشگایاں کَمے باز ھم دل ءَ پہ بچے مھرانی نہ جیڑ اِیت
گڑا نِی زمین ءِ مھر بے کساس ءَ سما بنت کہ جنرل ءَ پہ زمین ءَ بے کساس ءَ مھر بیتگ آئی ءِ بے کساس مھر کہ زمین ءِ ھاک ءُ ڈوک جَنت ءِ نرم ءُ نازورکیں بالشتاں انگت نازروک تِراں پرے ھاتر ءَ ریھان جان ءِ سالونکی ءَ آئی ءِ دست نہ لرزیت اَنت آئی ءِ بکش اِتگیں بچ پہ زمین ءِ ھاکاں ھوار بیت،
بیست ءُ پنچ دسمبر ءِ نیمروچ ءِ کوھیں کلات ءِ پروشگ پہ بلوچ ءَ ترندیں تاوانے اَت بلے ءِ ھوناں چَہ آئی ءِ ھمبلاں رنگ زُرت ءُ آئی ءِ روانی ءِ کاروان ءَ اوشتگ ءَ نہ ایش اِت اِت ھمے نیمروچ ءِ گمجتیں بالاد اَت کہ جنرل اسلم، کریم مری، تاج مھمد مری، اکتر بلوچ، سنگت امان اُلّا ءُ پِدائی بابر مجید چَہ مارا ساھی دروشم ءَ سِست ءُ جتا کُت اَنت
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
