الی اکبر سرمچارے اَت
نبشتہ کار: رئیس توکلی
دی بلوچستان پوسٹ
سُھب ءِ سرا چہ واب ءَ چم پچ کُتاں چمّاں لتاران ءَ لوگ ءِ دپ پچ کُت کہ گِنداں ھئور ءَ ترمپ جتگ زمین ءِ ھاکانی سرا ترمپانی پَد اِیر انت آزمان ھم تنیگہ جمبران اِنت سھب ءِ سَمین پہ چاڈے کَشگ ءَ انت ھمروچیگیں وڈا من وتی کار ءُ بازار ءِ روگ ءِ تیاری ءَ کُت ھمینچو کہ گُھار ءَ کوپ ءِ سیاہ چاہ ءُ نگن ءِ آرت چاہ ءُ نان ورگ ءَ پد من جھلاد بیتاں دیم پہ وتی کار ءُ روزگار ءِ نیمگ ءَ پانزدہ بیست منٹ ءِ میان ءَ من وتی کارجاہ ءَ سر بیتاں کَمّے وھد ءِ گُوزگ پد بازار ھال ءِ شِنگ ات لاش ءِ نادْراہ جاہ ءَ آرگ بیتگ پہ پجّار ِٔءِ ھاترا من اے ھال اِشکنگ ءَ گُوں وتا وت ءَ الوت ءَ آں دوشی مگرب ءِ وھد ءَ بمب ءُ تیراں ھم آواز کُت بیت کنت رھگوزے ھمے جنگ ءِ میان تیرانی دپ ءَ کپتگ یا، دگہ باریں چی چی ھمے سھت ءَ سنگتے ھم اتک اڈے اِشکنگ ءَ نادْراہ جاہ ءَ لاش ءِ آرگ بیتگ باریں سرپد نئیں کئی لاش اِنت ؟ انّاں یار من سر پد نیاں من پسّو دات سنگت ءَ گُشت گُڈا بیا رویں باریں کئے اِنت شُتیں نادْراہ جاہ ءِ دیم ءَ گِنداں گاڈی اُوشتوک اِنت مردمانی مُچی میڈی اِنت من چہ سائیکل ایر اتکاں دیم پہ ھمے گاڈی نیمگ ءَ گِنداں یک لاگریں ورناہ ءِ من دُرس نہ کُت ھمدا من یکّے جُست گِپت کہ کئے اِنت گُشتے یار ھاجی اکرم ءِ چُک اِنت ساری ءَ پٹبال ءِ پلیرے بیتگ چوکہ منی مجگ کار ءَ نہ ات کہ کجام اِنت ھان ھاجی اکرم ءَ من جُوانی ءَ زاناں من کہ کسان بیتگاں کماش ءِ ھمراہی ءَ گوں کماش ءِ دوکان ءَ اسکول ءِ موہکلانی روچ ءَ شُتگاں گُوں ھاجی اکرم ھمود ءَ اتک ءَ ۔۔بلے یار ھاجی اکرم ءِ یک چُکے پیسر ءَ پوج ءَ چِست کُت چِیزّے وھد ءَ رند آئی جُون (لاش) چہ کراچی ءِ نیمگ ءَ دست کپت ھو آ شھید اَدنان اِنت چُو سرپد نیاں شھید ادنان مستر اَت یا اکبر،،،شرّیں یار اے چُون چِست کنگ بیتگ یا۔۔۔۔ ھئو دُو روچ پیسر ناشُناسیں گاڈی سَواراں چِست کُتگ۔۔۔
مردم دُراہ شِنگ ءُ شان بوتاں من ھم دَرکپتاں اتکاں پہ وتی دوکان ءِ نیمگ ءَ وھد روان اَت ھرکس بیاہ ءُ چو پاکستان ءِ لاپ واریں مُلاھاں پَتواہ ءِ بِدے ءُ بُرو تو بُگش چُش بیتگ من گُشاں چُش۔۔۔۔ ھو راستے شھید اکبرءِ لاش مندیگ ءِ نیمگ ءَ گلام رسول باگ کِرّ ءَ دزکپتگ مرچی شَش(6)اکتوبر ءَ راجی گَل (بی اِل اِپ)ءَ وتی شِنگ کُرتگیں جار ءِ تھا گوْشتگ کہ سرمچار اَلی اکبر ءَ سُھریں دُرْوت ندر کنیں
گَل ءِ جارکشّ ءَ تران کنانءَ گوْشتگ سئے اکتوبر ءَ الی اکبر پاکستانی لشکری چیریں ادارہاں بیگواہ کُتگ پَنچ اکتوبر ءَ شھید الی اکبر ءِ تیر سُپتگیں جُون چگل داتگ شھید الی اکبر یک بازیں وھدی ءَ بی اِل اپ ءِ سرمچار ءِ بیتگ ءُ شھری کارانی زمہ ءِ وتی کوپگاں زرتگ اَنت ءُ آئی ءِ گران بھائیں دیم ھونیاں ھروھد ءَ یاتگیری کن ایں ءُ آئی ءَ سھر چکیں دروت ندر کن اَں ءُ آئی گڈی لوٹ بلوچستان ءِ آجوئی ءَ داں برجاہ بیت آئی ءِ سرا چاریگیں مردمانی پٹ ءُ پول بیت ءُ ترندیں سزا دیگ بنت۔
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
