یاتانی دریگ
من گوں شهید صدیق عیدو ءَ
هسابجار
دی بلوچستان پوسٹ
صدیق عیدو بہ بیت ءُ ماتی نظیره ءِ چُل ءَ ماھیگ ءِ بو مہ بیت چو بوت نہ کنت ، منی اولی دچار کپگ گوں صدیق عیدو ءَ همے لوگ ءَ بوتگ ات ، ھردیں من چہ نگور ءَ کیچ ءَ اتکگ ات آں ،تاں منی جاگہ ماتی نظیره ءِ لوگ ات ادا من ءَ اولسر ءَ کور دپ ءَ کپتگ ات ءُ پد ءَ شهید صدیق عیدو ، ماتی نظیره مارا چہ سَئیناں کستر ات ،بلے پما ھر سئیناں یک ماتے ات، آئی ءِ دستانی چل مئے لاپ ءَ ات انت ، آئی ءِ لوگ چہ مهماناں هالیگ نہ ات ، بلے من ءُ کور ھر دُک آ لوگ ءِ چُک ات اِیں ءُ صدیق عیدو هم ھردیں کہ چہ باگیں پسنی ءَ اتکگ ات تاں آ هم همے لوگ ءَ ات ، کمیں وهد ءِ تہ ءَ ما سک هوار کپت اِیں –
ما بالاچ تامر ءِ اکس بندی ءَ بلوچستان اکیڈمی ءِ پِلم اینڈ تہٹر ءِ تہ ءَ بنجل کتگ ات، صدیق چہ پسنی ءَ اتکگ ات داں سے چار روچ ءَ همود ءَ مئے گور ءَ ات، روچ ءَ تامر ءِ کار ءُ شپ ءَ ماما انور، صدیق عیدو گوں وتی دگہ دو همرہ ءَ ءُ ما ات اِیں ، برے کندگ ءُ مزاک ، برے سیاست ات –
چد ءُ پد من دو رند ءَ کہ پسنی ءَ شتگ اتاں، تاں همائی ءِ لوگ ءَ داشتگ ات،صدیق ءِ مات ماتی گبّی کانٹی ئیں زگری یے ات ءُ صدیق زگری یے ءِ چُک ات بلے مزهبی یے نہ ات ءُ واجھانی سر ءَ چو گنج ءَ زهر ات ، بلے کوه ء مراد ءِ زیارت ئےِ بِھ کزا نہ کُت. همے کہ 27 ءِ زیارت بوت تاں صدیق ءِ بُندر مے ٹکانہ ات ، مهلوک ءَ زیارت ءُ زگر کُت ،ما نشت ءُ سیاست کُت ، من ءُ صدیق بی این ایم ءَ ات ایں ءُ کور بی اس او ءَ منی ءُ صدیق ءِ گُڈی دچار کپگ هم کوه ء مراد ءِ زیارت بوت –
اے سال ءَ من رزاکار اتاں ،صدیق گوں وتی پرکہ ءَ اتکگ ات، اد ءَ هم صدیق ءَ پہ ماتی نظیره ءُ حنیف شریف ءَ گوریں ماھیگ گوں ات ، من وتی کار ءِ سر ءَ اتاں، تاں من ءَ لاچار ئےِ کُت کہ رویں ماھیگاں سر کن اِیں ءُ پد ءَ ہر دُک کا اِیں. ما درکپت اِیں پہ مهروانیں مات نظیره ءُ حنیف شریف ءِ ماھیگانی رسینگ ءَ زیارت ءَ بگر داں تُربت ءَ من ، زیارت ءُ واجہ چہ زاه ءَ سیر ات اِیں ، آئی ءَ کند ات ءُ زاه دات کہ جھان ءِ کار یل داتگ انت اتکگ ءِ زیارت ءِ رزاکارئے ؟
ما کہ ماهیگ رسینتاں تاں واتری ءَ گومن دوکہ ئےِ کُت ، دنیا ءُ جهان ءِ زاہ ئِے دات انت کہ ترا چے کار اے زیارت ءُ میارتاں انت ، بلے من نہ مَرینت ءُ شتاں زیارت ءِ سر ءَ –
شپ ءَ کہ اتک داں سُهبائیگ ءَ منی همراه بوت من شپ گاٹ اتاں ،اَلنگ ءِ بُن ءَ منی ڈیوٹی ات ، زاھے من ءَ زاهے زیارت ءُ زاهے واجھاں داں شپ روچ بوت، اے شپ ءَ اولی براں من صدیق پجاؤرت کہ آ وتی ڈیہ ءِ آجوئی ءِ بامرداں چہ یکے ات اے سجیں شپ ما اَلنگ ءِ آتراپ ءَ گشت جت ،مئے بُن گپ سیاست ات ، صدیق شرگِداری مردمے ات، بازیں جیڑهانی سر ءَ باوست بوت ، آئی ءَ گوں وتی سرڈگار ءَ مهر ات ،گوں وتی کاز ءَ ایماندار ات ، ھر کجا ات آئی ءِ کار وتی مهلوک ءَ را سرپدی دَیَگ ات، آ پسنی ءِ تہ ءَ بی این ایم ءِ سرگرم تریں سنگتاں یکے ات . بی این ایم ءَ ابید آ بنی آدمی ھکانی ادارهے ءِ هم باسکے ات ، آ پہ همے وتی سرڈگار ءِ اِشق ءَ دژمن ءِ چمانی کُنٹگ ات ، شهید واجہ چیرمین ءِ شهادت ءِ درگت ءَ پسنی ءِ ھڑتال ءُ پُرشت ءُ پروشانی سوب ءَ آ سرکار ءَ وارنٹ کتگ ات، وتی پیشی جنگ ءَ گوادر ءِ آمید گس ءَ چہ واتری ءَ پسنی ءِ روگ ءَ آ گوں وتی همراه ایسُپ نظر ءَ سرکار ءِ چیریں ادارهاں بیگواه کُت ءُ پد ءَ بِھ نہ یتک-
من ءَ همے کہ کیچ ءِ اومان زور انت، تاں منی پونز ءَ گوریں ماھیگ ءِ بو بیت ءُ صدیق عیدو ءِ زاهانی توار………
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
