“بیا پد ءَ ھما کنٹین ءَ نِند ایں ءُ زپتیں سُلیمانی چاھے وریں”
مھروان بلوچ
دی بلوچستان پوسٹ
اے لھمیں کوش کہ کشگ ءَ اِنت، تئی ھون ءِ بوہ ءَ کنگ ءَ اِنت ،اُمید انت چہ بندیگ جاہ ءَ گْوات ءِ دست ءَ ھون بوھیں انترے تو پہ من ءَ روان داتگ ،من زاناں تو وتی جِند گوں ھوناں شُشتگ ءُ پاک کُتگ، من زاناں تو وتی پِکر انگت مُھکم داشتگ ءُ من اے گپ ءَ ھم دلجماں کہ باجو نہ بوتگ ئے، انگتگ اووووو منی پکر ءِ ھمبلو من ترا سک جیڑاں ءُ ترا گوں گوازینتگیں ساھتانی تہ ءَ واتر کناں زندگ بوگ ءِ جھد ءَ کن آں۔۔۔۔
ترا یات بیت بلوچستان یونیورسٹی ءِ ھنا کنٹین؟؟ من مدامی کہ ھنا کنٹین ءَ رواں داں ھما بُرزگ ءِ سر ءَ نِشتگیں مردمانی تہ ءَ ترا شوھاز کناں، بلے تو گِندگ نہ بہ ئے ءُ ھما اِنت تو رپتگ ئے تئی ھم رنگیں مردم ھم سک باز اِنت یا بیت کنت کہ من ترا ھرکسی تہ ءَ شوھاز کن آں ، نزاناں یار بلے زھیر کنت چے کساس چینچو بے کساس گُشگ نہ بیت،بلے ھمینچو گشاں کہ وھدے گوں وتی دیدگاں تئی اکس ءِ جوڑ کنگ ءِ جھد ءَ کناں گڑا اکس ءِ سرجم بوگ ءَ چہ پیسر ارس کَتار بند انت ءُ تئی اکس ساپ ساپ ءَ گِندگ ءَ کیت، چو ھما کوْانیں کیمراھانی وڑ ءَ پوٹو شُشتگ ءُ پد ءَ ساپ ساپ ءَ گِندگ ءَ اتکگ!
مھروان تو باریں سرپدئے ،جیڑگ ءَ ئے یا کہ ناں بلے تئی کلاس ءِ ھم مکتبی درست پارگ بیتگ انت ، تئی ھما پٹکیں سنگت ترا یات بیت۔۔؟؟ ھاھاھاھاھاھاھاھا آئی ءَ تو چوں شَمُشت کن ئے آ بزگ Presentation ءِ ساھت ءَ من دیست ملور مُلور اَت، گُش ئے یک گوْنڈوے چو بے ائید بہ بیت ءُ آ دگہ ائید کنوکیں دیم ءِ گونڈواں گوں آپیں نِگاھاں چار ایت، ھمے وڑ ءَ اے سنگت ھم بے ائید اَت ،بے تئیگ ءَ انچُش ما ھم بے ائید بیت ایں۔
ترا ھم وانگ ءَ چہ دور اِش کُت، اے نوکیں ھبرے پہ منی ءُ تئی واستا، تو زان ئے آ واجھاں زوراوراں ھرچی کُت کن انت، ماجو من دلجماں اے ساھتاں کہ تئی دست اِش پُشت ءَ بستگ ءُ چماناں سیاھیں چادرے مانپُشتگ اِش ،سیاھیں کوٹی ءِ کُونڈے ءَ ترا دور داتگ اِش۔۔۔۔۔!
شررنگ منی ارس پد ءِ کَتار بندگ ءَ آں ءُ دل ءَ را کسے گش ئے گوں پنجگاں پِرنچگ ءَ اِنت، تئی بابت ءَ جیڑگ سک گران اِنت ءُ ترا مہ جیڑاں چُش بیت ھم نہ کنت بلے! اے ساھت ءَ من ایوکاں اے تھاری ءَ پہ ترا نبشتہ کنگ ءَ آں بِزاں کہ تو منی ھمبلوو سک باز گیر پیداک انت۔
تئی آجوئی ءِ ودار ءَ دل ءَ کندیلے بلینتگ تئی ءُ آ دگہ سنگتانی ودار ءَ کہ تئی گوم ءَ زندان ءَ بندیگ اَنت ،من ءُ ھما پُرسیگیں لوگ بزگیں راج شمئے ودار ءَ اِیں، آجو بات ئے زوت ھمبلوو۔۔۔۔!
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
