بلوچستان ءُ شھید پِدا بلوچ ءِ پِگری وارس
نبشتہ کار : شوھاز بلوچ
دی بلوچستان پوسٹ
ھُدامُرزی واجہ گُلام مھمد بلوچ ءِ لوگ ءَ ودی بوتگیں ورنا کہ آئی ءِ نام شھید پِدا بلوچ اَت، انچو کہ آئی ءِ نام اَت ،ھمے داب ءَ آ پہ مِسکیں ڈگار بلوچستان ءِ واستا پِدا اَت،بلے اے راستی یے کہ اے پیمیں بودناک ءُ لائِکیں مردم راجانی توک ءَ سک کم ودی بَہ اَنت ۔
شھید پِدا اھمد ءَ بلوچ کَوم ءِ دِرتہ پُچّی ءُ بزگی گوں وتی چماں دیستگ اَت کہ منی راج ءِ اے پدمنتگیں زِند ءِ مسترِیں سَوب گُلامی اِنت ،اگاں ما گُلامی ءِ ھِلاپ ءَ راجی آزاتی ءِ جُھد ءَ بُنگیج مہ کن اِیں گُڑا مئے آکبت رُوژنائی ءِ بدل ءَ تھاری ءِ مُجاں اندیم بیت ءُ ما ابد بیگْواہ بَہ اِیں ۔
اے درگت ءَ شھید وتی بِنداتی راجی جُھد ءَ چہ بی ایس او ءِ پلیٹ فارم ءَ بُنگیج کنت،ھمے وڑ ءَ راج ءِ ورنایاں راجی سِنچ ءُ زانت دیان کنت کہ 1987 ءَ گوں وتی پگری سنگتاں بی این وائی ایم (بلوچ نیشنل یوتھ موومنٹ ) ءَ جوڑ کنت ءُ راجی آجوئی ءِ پیام ءَ بلوچ ءِ گِس گِس ءَ سر کنگ ءِ جُھد ءَ گُلائیش بیت، بلے شھید پِدا اھمد وھد ءَ موہ نہ دات ءُ زُوت دُژمِن ءِ دست ءَ شھید کنگ بوت ،چیاکہ دُژمِن گوں وتی دُزّیں تولگاں اے ھبر ءَ شرّی ءَ سرپد اَت کہ آ پہ بلوچ راج ءِ وشھالیں باندات ءِ ھاتر ءَ جُھد ءُ کُوشست کنگ ءَ اِنت، پمیشکا آیاں واجہ تیر باران کُت کہ ما اے جُھد ءِ ایرموش کنگ ءَ سوبین بَہ اِیں، بلے چر ءِ ھبر ءَ آ نابلد اِت اَنت کہ شھیدانی پگر ءُ لیکہ پہ دائِمی زِندگ مان اِیت ءُ راج ءِ رھشُونی ءَ کنت۔
وھدے 2 مئی1988 ءَ واجہ پِدا اھمد شھید کنگ بیت ءُ جسمانی دْروشم ءَ چہ بلوچ راج ءَ گِسر کنگ بیت گُڑا دُژمِن ءُ آئی ءِ کاسگ چٹّیں ھمکار شادمانی کن اَنت کہ ما نوں وتی دِل ءِ ادارُکی واھگانی سبزینگ ءَ سوبین بوتگ اِیں ، بلے اے بے نسیبانی کُلیّیں ادارُکی واھشت ءُ ارمان گوں ھاکاں ھوار ءُ بے سوبی ءِ سِیمسراں سر بنت ، چیاکہ شھید واجہ پِدا اھمد ءَ بلوچ راج ءَ را یک انچیں پِگر ءُ لیکّھے داتگ آ کاروان مرچی ھم دیم پہ وتی سوبمندی ءِ مِنزل ءَ رھادگ اِنت،دُژمِن ستر وتی زُور ءُ واک ءَ کارمرز بِہ کنت، بلے اے راجی کاروان ءِ دیم ءَ داشت نہ کنت ، چیاکہ یک راجے ءِ دیم ءِ دارگ دُگنیا ءِ ھر وس ءَ چہ در اِنت۔
ھمے پیم دومی نیمگ ءَ ھما آستونک ءِ مار اِت اَنت کہ گوں شھید ءَ دگا اِش کُت ءُ چہ راجی پِگر ءَ پدکِنز بوت اَنت، ھمایاں 1989 ءَ بی این ایم جوڑ کُت ءُ بلوچ راجی آجوئی ءِ جُنز بُرت ءُ پاکستان ءِ نام نھادیں پارلیمنٹ ءِ زینت جوڑ کُت ءُ بلوچ راج کہ رد دات کہ شُمئے ھکّاں چہ پاکستان ءِ پارلیمنٹ ءَ پچ گریں ءُ دے اِیں ، آیانی کِر ءَ بلوچ راجی جُھد ءِ نِزوُر کنگ ءُ ریپّینگ ءِ مستریں ھیلہ ءُ ھُنر ھمیش اَت کہ آیاں کار گِپت ءُ بلوچ راج وھدی ھوالہ ءَ رد دات، چوش کہ بلوچ راج ءِ ورنا دُژمِن ءُ آیگی کاسگ چٹّانی کُلیّیں کارپداں سرپد اِت اَنت کہ آ مُلک مئے ھستمانی ءِ ھلاس کنگ ءَ گِر ءُ چیل اِنت چہ آ مُلک ءِ پارلیمنٹ ءَ مئے کُجام درد درمان بیت،ھما پارلیمنٹ کہ پوج ءِ دانکانی رِد ءَ سُر ءُ پُر کنگ ءِ مُھتاج اِنت ، چہ آ پوج ءَ کُجام اُمیت سیراپ بیت کہ آئی گوں وتی زُوراکی ءُ زُورانسری ءَ مئے آجوئیں ڈگار کْوزہ کُتگ ءُ مارا روچ ء مروچ گُلام داشتگ۔
زیکّیں ھما ھون لوٹوک مرچی اُوٹ پِنڈُوک جوڑ بوتگ اَنت ءُ بلوچ راج ءِ چُکچینی ءَ گوں دُژمِن ءَ ھمدست ءُ ھمگام اَنت، پمیشکا ھر راجی جُنزانی تہ ءَ اے دابیں راجی گدّارناں وتی سِلکاریانی سِزا رس اِتگ ، گُڑا بلوچ گدّار ھم چر ءِ ھبر ءَ بے تْرانگ مہ بَہ اَنت کہ بکشگ بَہ اَنت ، بلکیں آیاناں ھم وتی کُتگیں کارپدانی باپُشت ءَ سِزا دَیَگ بیت.
بَہ کول ءِ بلوچ راج ءِ شھزانت ءُ کواس واجہ پروپیسر سبا دشتیاری ءِ گْوشگ ءَ” اول مارا ھما راجی گدّار سبک دَیَگی اَنت اگاں کَے کہ بِہ بیت،رند ءَ بے مُزّیں دُژمِن،پرچا کہ اے چاگرد ءِ توک ءَ وتی وائرس ءُ سِلکاریاں شِنگ ءُ تالان کن اَنت داں راجی جُنز نِزوُر ءُ پہ دیمے جُنزگ ءَ مھتل بِہ بیت ، بلے چوش کدی نہ بیت”.
ھمے پیم مرچی پد ءَ بلوچ راجی جُنز گوں تْرندیں گامگیجاں دیم پہ گُڈّی مِنزل ءَ راھی اِنت ، گُڑا اے شھید واجہ پِدا اھمد ءَ ھوار کُل ھما شھیدانی داتگیں کُربانی ءُ دیم ھُونیانی برورد اِنت کہ گیدی ءِ ھمُک پاند ءَ بلوچ راج زانگ ءُ جاہ آرگ بیت کہ پہ وتی آزاتی ءِ ھاتر ءَ گُلامی ءِ ھِلاپ ءَ جُھد کنگ ءَ اِنت۔
ھمے وڑ ءَ 2000 ءِ دَھک ءَ بلوچ کَوم ءِ آشوبی جُھد پد ءَ گوں نوکیں جبزّگ ءُ مارشتاں بندات بیت کہ واجہ ڈاکٹر اللہ نزر بلوچ چہ پارلیمنٹ پرستیں نودربر گل ءَ گوں وتی پِگر ءُ لیکّھی سنگتاں جُتا بیت ءُ بی ایس او آزاد ءِ بُن ھِشت ءَ ایر کنت ءُ پہ جار بادشاھی دُژمِن ءَ بیھار دنت ءُ گْوش اِیت کہ تو مئے ڈیھ پہ زُوراک ءُ زُورانسری کْوزہ کُتگ ، ما تئی اے زُوریں وتواجھی ءَ نہ منّ اِیں،بلکیں چہ مئے ڈیھ ءَ وتی اُرداں بِہ بند ءُ درکپ ، اگاں نا ما ترا پہ ایمنی نیل اِیں کہ تو واجہ ءُ ما تئی گُلام بِہ بَہ اِیں۔
ھمے وڑ ءَ شھید واجہ گُلام مھمد گوں وتی پِگری سنگتاں چہ ابدالھی ٹُولی ءَ نزریاتی اِکتلاپاتانی پُشدرد ءَ در کَیت ءُ بلوچستان نیشنل موومنٹ ءَ بلوچ نیشنل موومنٹ جوڑ کنت ءُآجوئی ءِ جار ءَ پِرّینیت کہ بلوچ راج ءِ دردانی درمان پاکستان ءُ آئی ءِ بے واکیں پارلیمنٹ نہ اِنت ، بلکیں بلوچ ءِ اے گُلامی ءِ تھاریں شپ گوں آزاتیءَ بام بیت.
بِہ گِند ئے من مرچی اے ھبر ءِ گْوشگ ءَ رد مہ بَہ آں کہ رھیم ایڈوکیٹ ، اُستاد واھد کمبر، اکتر ندیم ،میر عبدالنبی بنگلزئی ءَ ھوار کُل شھید ءُ رھشون شھید پِدا اھمد بلوچ ءِ پِگری وارس اَنت،پمیشکا مرچی شھید واجہ پِدا بلوچ ءَ ھور کُل شھیدانی ھُون ءُ بلوچ راج چہ وتی پِگری وارساں ھمے لوٹ ءَ کنگ ءَ اَنت کہ اِتھاد ، تِپاکی ءُ یکمشتی ، چیاکہ تِپاکی ھما تاکت اِنت زُوراکاں چہ زُورانسری ءَ دار اِیت ءُ کْوزہ گیریں لشکر ءَ چہ وتی ڈیھ ءَ پہ تچگ ءَ مجبُور کنت ،بیا اِت تِپاک ءُ یکمُشت بَہ اِیں دیم پہ آزاتی ءِ مِنزل ءَ ۔
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
