پدائی شھید ریھان جان
نبشتہ کار: بابا جی آر بلوچ
دی بلوچسان پوسٹ
ناں بے چاڑی ءَ دیم مانپوش اِتگ اَت، ناں ملور ءُ گمیگ اَت ءُ پد ءَ ھم زانت کہ من واتر نہ باں ءُ اَنگت وتی سر ءَ آجو بلوچستان ءِ بیرک ءَ بند اِیت ءُ مات بی بی یاسمین ءَ وتی امبازاں کنت ءُ پِت شھید اسلم جان ءَ بگل ءَ کنت رکست بیت ءُ گْوش اِیت،
“”مادر من واتر نہ باں پہ من دُوا بہ کن کہ من وتی منزل ءَ سوبینی ءَ سر بہ باں””
من شھید ریھان جان ءِ کلوھی تامر ءِ تہ ءَ ھنچیں جزبگے دیست، آئی ءِ ھوسلہ چو کوہ ءِ ھلمند ءَ مِک اَت ءُ ھچ پیمیں بیم گندگ ءَ نیاتک ءُ شھید ریھان جان وتی تہ ءَ وت یک سرجمیں دَروَنتے پہ بلوچ راج ءَ تھنا ناں بلکیں کُلیں گیدی ءَ ایر ئِے کتگ ءُ ابدمان اِنت ءُ من داد دیاں مات یاسمیں ءَ کہ اے وڑیں نہ ترسوکیں زھگے پیداک کُرتگ ءُ ماتیں گلزمین ءَ پہ ندر بوگ ءِ شون ئِے دات.
تنیگا من گیدی ءَ چشیں ورنا نہ دیستگ کہ وت مات ءِ دست ءَ پہ سالونکی ءَ ءُ شھادت ءِ واستا سینگارگ بہ بیت ءُ ھُدا ھاپز کنگ بہ بیت…
آپرین اِنت بی بی یاسمیں ءَ کہ ھدا ءَ مزنیں دلے ءِ واھند کُتگ ءُ شھید ریھان جان ءِ پیمیں آجوئی لوٹُکیں ورنا پہ راجی وت واجھی ءِ واستا کُربان کتگ…!!
آپریں اِنت منی مات یاسمیں ءُ اُستاد شھید اسلم جان ءَ کہ پہ آجوئی ءَ وتی بچ اِش ندر کُتگ..!!
من کسی تہ ءَ اے پیمیں جزبگ نہ دیستگ چُش کہ شھید ریھان جان ءِ مات بی بی یاسمین اِنت ءُ شھید جنرل اسلم اَت ءُ من بازیں وانگی ونتگ چُش کہ لیلا ھالد بہ بیت آ پہ فلسطین ءِ وشھالی ءُ جنگ ءُ چوپ ءِ ھلاسی ءِ وستا جھد اَت ءُ جوانیں کِردے ءِ ھُدا بند اَت، بلے چُش کہ بی بی یاسمیں اِنت کہ من اَنگت ھچ اے پیمیں ماس نہ دیستگ ءُ ناں کہ وت وتی زھگ ءَ سالونک بہ کنت پہ آجوئی ءَ …!!!
ھزار آپرین اِنت مئے مات یاسمیں ءَ کہ یک مزن جگریں ماتے ءُ تاں جھان ءَ من چشیں مات نہ گنداں کہ اے وڑیں بچ پہ آجوئی ءَ پیداک بہ کنت.
بلوچ ءِ راجدپتر ءَ ماں چوشیں جوھردار ءُ مزن جگریں مات ءُ پت نہ بوتگ، دیمتر ءَ ھدا بہ زانت۔
چوش کمبر بلوچ ءِ مات ءَ ھم کمبر راہ دات کہ برو بندیگاں پچگر بیا، بلے اود ءَ اے زانگ نہ بوت کہ کمبر شھید بیت یا سوبمند بیت، بزاں دوئیں جاور بوت کتگ اِت اَنت،
بلے کمے بِچار مات یاسمین ءَ کہ سدی سد زانت منی بچ شھید بیت، بلے انگت دست ء وت سالونک ئِے کنت ءُ پہ ڈیھ ءَ شھید بیگ ءَ راہ ئِے دنت،
بزاں ریھان ءِ مات ءِ جرات ءُ دلیری دیم ءَ تر اِنت۔
شھید ریھان جان تو نمیران ئے…
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
