شھید نواب اکبر ھان بگٹی
نبشتہ کار: ریاض بلوچ
دی بلوچستان پوسٹ
بلوچ سر ڈگار ءَ مُدام کہ دری زورگیریں راجاں کَوزہ کتگ ءُ بلوچستان گُلامی ءِ سیاہ ءُ تھاریں جمبراں ماں پوشتگ، گڑا بلوچ ءِ ھرچ ٹک ،ھرچ پِڑ ءِ پگر ءِ مردماں وتی گُلزمین چہ سیاہ پوشیں جمبراں رکینَگ ءُ چہ گُلامی ءِ ترسناکیں آھنی بند ءُ پنجگاں وت ءَ رکینَگ ءِ ھاتر ءَ ءُ وتی ڈیھ ءِ واھگانی مارشت آجوئی ءِ ھاتر ءَ سر کپن بستگ ءُ دژمن ءِ دیم ءَ میڑ داشتگ داں ھون ءِ آھری پٹَگ ءَ بلے دژمن ءِ دیم ءَ سر جھل کنَگ نہ سیکیتگ.
پہ گُلزمین ءِ پھازگ ءِ ھاتر ءَ کُل بلوچاں یک رَنگ ءَ وتی جان ندر کتگ انت ، وھدے کہ زمین ءَ وتی بچ گْوانک جتگ گڑا بَگیر رنگ ءُ نسل، ذات ءُ زُریات ،اُگدہ ءُ شان درست یک ھساب ءَ وتی مکھیں مات ءِ مارشتِ آجوئی ءِ نیمگ ءَ گام جناناں ءَ ساڑی بوتگ انت.
بلوچ راج پھازوکیں پسّگاں چہ یک گرانکدریں نامے بلوچانی بگٹی ٹَک ءِ نواب ءُ شاہِ شھیدان نواب اکبر ھان بگٹی ئیگ انت، کہ آئی ءَ پیران سالی ءَ کوہ وتی کلات کت انت ، انبار بے رائیں گر ءُ وردنی آپ بیوکیں چمَگ بلے دژمن ءِ دیم ءَ سر ئِے جھل کنگی ھچـبر کبول نہ کوت، لگوری ءُ چم جھلی ءِ آسودگیں زند ءِ دائمی ببا دات ءُ کوھساراں بلوچانی راجی بامرد ءِ پنّام زرت ءِ.
نواب اکبر ھان 12 جَلکشان 1927 ءَ نواب مھراب ھان بگٹی ءِ گس ءَ ودی بوت، نواب اکبر ھان چہ کسانی ءَ سکّیں سوھویں ءُ بودناکیں زھگے اَت، 1946 ءَ آئی ءِ اُمبر 12 سال بیت وھدے کہ آھرا بگٹی ٹَک ءِ سردار نامینَگ بیت ، چہ کسانی ءَ آ شاھگانیں تجربگ ءِ ھُدابند بیت ءُ وتی ٹَک ءِ جنگ ءُ جیڑھانی پیسلہ پہ جْوانیں رنگے ءَ کنت. آئی ءِ پیسلہ ھمے رنگ کَابِل، بروسہ ءُ لاھک بنت کہ پہ درستاں کبول بنت.
نواب اکبر ھان بگٹی چہ بلوچستان ءِ مزن کدیں رھشوناں یکے اَت کہ آئی ءِ اَمَلی بسیرت باز مزن ءُ شاھگان اَت، نواب اکبر ھان ءَ باز ونتگ، سیاست، دود ءُ ربیدگ ءُ ھاسکن بلوچ سیاست ءُ چاگرد ءِ سر ءَ آئی ءِ اَملی دسترس کَس ءَ گون نہ ات، بلوچ سردارانی توک ءَ اِلم ءُ زانتی ءِ پڑ ءَ آئی ءِ مَٹ ءُ درور نیست اَت.
نواب اکبر ھان بگٹی یک سرجمیں بلوچے اَت ، آئی ءَ پہ مَڑاہ یک بلوچی زندے گوازینتگ ءُ پہ شان سر ئِے برز اَت.
نواب اکبر ھان بگٹی ءِ زند ءِ سر ءَ اگاں ھزاراں کتابی ٹِیکی نبشتگ کنَگ بہ بنت بلکین ءَ آ انگت کم بنت، آئی ءِ یک زگریں بلوچی دود ربیدگیں زند ءِ گوازینتگ ات ، نواب اکبر ھان ءِ آئیڈیل بلوچانی راجی بامرد بوتگ انت ، جنگ ءُ مِڑ ءِ پڑ ءَ آ بالاچ بیرگیر ءَ چہ باز متاسِر اَت ءُ مُدام وتی آئیڈیل جنگجو ھم گشت ئِے،اکبر ھان ءَ بلوچانی کوھنیں شائری ءُ گیدی کسّہ گیشتر کہ یات اِت اَنت ءُ باز رند ءَ دیواناں ھم گشتگ انت ئِےِ.
نواب اکبر ھان بگٹی وتی کَول ءُ دانکانی سر ءَ اوشتاتگ اَت. وھدے کہ بلوچستان ءِ وت واجھی ءُ بنکی ھکانی ھاتر ءَ تپنگ بڈّ ءَ کنت ءُ کوھاں وتی وابجاہ کنت ،گڑا چہ دژمن ءَ آسراتی زورگ ءُ ایمن بوگ ءِ راہ تاں شھادت ویل کنت.
26 ساچان 2006 ءَ بلوچ راجی رھشون نواب اکبر ھان بگٹی ماتیں وتن ءِ چہ دژمناں رکینگ ءِ ھاتر ءَ پیراں سالی ءَ گوں استانی لشکر ءَ میڑ دنت ءُ نمیران بیت، اکبر ھان بگٹی ءَ پیراں سالی مرگ ءَ را مڑاھے گوں کت ءُ بلوچ جھد دگنیا ءِ دیم ءَ گوں وتی شھادت ءَ پدّر کت، اکبر ھان بگٹی بلوچ دوستی ءِ یک برزیں چیدگ ءُ استالے اَت ،دژمن ءِ دیم ءَ کدی سر ئِے جھل نہ کت ءُ گوں پیراں سالی مزنیں نامے کَٹ اِت ئِے ،ھرچ بلوچ پسگے ءِ سر ئِے بُرز کتگ.
اکبر ھان ءِ شھادت ءَ بلوچ راجی زرمبش ءَ یک مزنیں تاگتے ءُ سرپدی یے رس اِت، ھر بلوچے ءِ دل ءِ توک ءَ پہ کَوزہ گیریں ریاست ءَ نپرتے ،نہ تُسوکیں یک آسے روک کت ، اکبر ھان ءِ شھادت ءَ بلوچ زرمبش ءُ پاکستانی کَوزہ ءَ دگنیا ءِ دیم ءَ پیشداشت.
اکبر ھان ءِ شھادت سجھیں تبکہ ءِ بلوچاں یک راھے پہ ھَوار کت ءُ دیم پہ یک منزلے راھی اَنت.
بلوچی زبان ءِ کوھیں کلات ءُ نمیرانیں شائر گلام ھسین شوھاز وتی شَیرے کہ پہ ڈاڈائے بلوچ شھید اکبر ھان ندر کنت ءُ گُش اِیت کہ
“کـس نـہ گـنـدیـت آ گْـورتگیں تـیـراں
منی ڈَڈر ءَ پـیـریں بیتگاں پـیـوست
زی گُبـاراں شـر گپـتـگ اَت پـیـر کوہ
ڈیرہ منی شپ دیم ء مُجاں سیاھیں”
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
