ریهان پگرے
نبشتہ کار: میار دشتی
دی بلوچستان پوسٹ
پگر ! کجام پگر ؟؟
هما پگر چو استالی ءَ گیدی ءِ دمک ءُ دراں تِرپان اِنت ، هما پگر کہ آشوبیں گیدی ءِ بنی آدمانی سرجمیں هیال وتی نیم ءَ آؤرتگ ئے؟
آ پگر ! یک اَنچیں پگرے کہ چو پاکیں کُران ءَ منی راج ءِ زِرد ءَ وِرد بِیّان اِنت ، من همے سرپد باں کہ همے پگر اِنت کہ اِے تلار ءُ گریشگانی تها منی کُل راج ءِ سوهُوئی ءَ کنگ ءَ اِنت، نی من دلجم آں کہ منی راج هجبر رُنگراهاں سرکشّی نہ کنت، چیاکہ من ءَ رهبر ءِ سر ءَ سِتک ءُ باور اِنت-
من همے اِشکُتگ کہ بنی آدم لگور بیت، همراه ءَ نیمراه ءَ دروه اِیت، پد کنز بیت ،چہ وتی کولاں بجّ اِیت ، بلے پگر یک باتنی همراهے ، پگر هجبر لگور نہ بیت دانکہ وتی همگنگل ءَ هما ڈسّ ءُ مکسد ءَ سر مہ کنت-
همے پگر اِنت کہ چو دْرچکے ءَ رُستگ ءُ شاه جنان اِنت منی راج ءِ همک ورنا ءِ دل ءَ ، اِے همے پگر اِنت کہ پگرانی تہ ءَ زمین ءُ وتی مات ءِ موکگ ءِ سکین ءَ دیگ اِنت، من همے گش آں کہ اِے پگر جیڑگانی بُنزه اِنت ءُ جزبهانی سنگر اِنت-
اِے پگر کجا شموشگ بیت ، اِے پگر منی نیل بوهیں زِر اِنت، همے پگر باتیل ءِ نام اِنت، همے پگر منی پجار ءُ شُناس اِنت، همے پگر زمین ءِ زهگ اِنت-
اِے پگر ءِ تمردی ءَ من بیان نہ کن آں ، آئی ءِ تمردی ءُ سرمتابی ءِ تاریپ ءَ یکروچے اَلّم وهد شمئے دیم ءَ وت بیان کنت، من بس همنچو گُش آں کہ همے پگر ریهان اِنت-
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
