آس روک, بلوچستان, بیست ءُ ھشت مئی
اکیل مراد
دی بلوچستان پوسٹ
سال نوزدہ سد ءُ نَود ءُ ھَشت اَت، میاں مھمد نواز شریپ ءِ سرکار اَت، اے وھد ءَ ھونواریں لشکر ءِ سروک جنرل کاکڑ اَت کہ پاکستانی نامناکیں جنرلے ءَ اَت،
چونائیگ ءَ پاکستان ءِ گوشاں کپتگ اَت.
ھندوستان ءَ بیست ءُ سَے مئی نوزدہ سد ءُ ھپتاد ءُ چار ءَ ھندوستان ءَ وتی آس روکیں بمب ءِ چکاس کرتگ اَت، راجستھان ءَ وھدیکہ آس روکیں بمب ءِ تراک بیت چریشی ءِ زھر ءَ چشیں مزنیں تاوانکاری یے نہ بیتگ اَت بزاں کہ امریکہ، روس، برطانیہ، فرانس ءُ چین ءَ آس روکیں بمب ھست اَت، چریشاں پد ششمی مھتر ھندوستان ءُ ھپتمی زوراوریں پاکستان اَت.
پاکستان ءَ ھندوستان ءِ زھرانانی دیم ءَ پہ وت ءَ ھم زھر ناکیں بمبے جوڑ کُرت، بَلے پاکستان ءَ اے بمب ھنچیں سرڈگارے ءِ دلبند ءَ چکاس اِت کہ آ پیسر ءَ چہ دْرستیں آسراتیاں زبھر اِنت.
مروچی زھرناکیں تراک ءِ نام کہ زبان ءَ کَیت اشی ءِ تاوان، نادْراھی، جتائیں وئیلاں مانشان اِتگ، اشی ءِ اسباب چی بنت دنیا ءِ زانتکار گُش اَنت کہ”البرت آئن اسٹائن جاھے ءَ گُش اِیت، زھرناکیں تراک ءِ مستریں مول ءُ مراد ءَ ایوک ءَ آسری ھمے در کَیت اود ءَ بس بیرانیانی بیرانی اِنت، ایوک ءَ مردمانی ھمگرنچی ءَ دْرستیں ساھدارانی کوشی اِنت.
واجہ البرٹ گْوش اِیت کہ منی زندگی ءِ تہ ءَ منی مستریں ردی ھمیش اَت کہ من امریکی سروک روزویلٹ ءَ ھما کاکد بیتگ کہ چریشی ءَ چہ گُشتگ کہ جرمن ءِ شاہ زانت زوت ءَ چہ زوت زھرناکیں بمب جوڑ کنگ ءَ اِنت، چریشی ءَ امریکی سرکار ءَ جْوانیں دلگوش دیگی اِنت ،من اگاں بزانتیں کہ انسان ءِ مزنیں تاوانی تہ ءَ آماچ بیت ،گڑا ھمے ھبر من ھمے جاہ ءَ کَل کرتگ اَت”
راجدپتر ءَ اے زانگ بیت کہ بنداتی زھرناکیں تراک شانزدہ جولائی نوزدہ سد ءُ چِل ءُ پنچ ءَ امریکا ءَ ھما دمگ ءَ چکاس اِتگ کہ آئی ءَ ٹرانیٹی سائٹ گوشگ بیت کہ ھمے تراک کہ چکاسگ بیت، اشی ءِ وزن بیست ٹن ٹی این ٹی بیتگ، زانگ بیت کہ ٹی این ٹی ءِ زورامندی نادراھی کجام زھرناکیں تراک ءِ زور ءَ کساسی کنت.
جھانی دومی جنگ ءِ وھد ءَ امریکا وتی دیم ءَ چہ برز روکیں مھتر جاپان ءِ پروشی ءَ اولی رند ءَ زھرناکیں تراک ءِ کارمرد کنگ ءَ شش اگست نوزدہ سد ءُ چِل ءُ پنچ ءَ جاپان ءِ پر گنجیں شھر ھیروشیما ءُ چریشی سے روچ بزاں نُہ اگست ءَ دومی شھر ناگا ساکی ءَ چگل داتگ اَنت.
چریشی ءِ آس روکی ءِ آسر ءَ چہ سے چار ماھانی تہ ءَ ھیروشیما ءَ نَود ھزار ءَ بہ گر تاں یک لَک ءُ چِل ءُ شش ھزار مردمانی بیران بیتگ.
ناگا ساکی ءِ جاوراں کمی ءِ ھست اَت کہ اود ءَ کمے مردم مُرتگ اَت کہ سِی ءُ نُہ ھزار ءَ بہ گر تاں ھشتاد ھزار ءِ کَچ ءَ مردم مرتگ اَت.
اے اُرشاں چہ لَکانی مردم لھڑ کاریں گرمانی اسر ءَ چہ پیداک بیتگیں شمک “کینسر ” ءِ نادراھی ءُ دگہ وئیلانی تہ ءَ کپتگیں جاوراں مِر مِرانی ءَ لنگڑی ءِ دروشم ءَ مِران اِت اَنت، میزائلانی جنگاں چہ ملٹانی تہ ءَ جھان سر ءُ چیر بیتیں سائنس ءُ ٹیکنالوجی ءَ ھنچش جھان ءَ دیمروی کرتگ ءُ بُوَگ ءَ اِنت کہ چریشاں چہ انسانی زندمانانی وشنودیاں باز کمی ءِ آھتگ مروچی دنیا یک دمانے ءِ دیم ءَ اِنت، یک بٹنے ءِ سر ءَ اِنت، دست ءَ بہ جن ئِے ءُ ھما دمان ءَ دنیا سیاہ ءُ تھاریں شپاں کپ اِیت.
بَلے اے بھمیانگیں کار ءُ وابیں آشوب ءِ پُشت ءَ یک توپاں ءِ الگڑ کنگ ءَ اِنت ،اشی ءَ چہ گیشتر اگاں نِی جھان ءِ گیشتریں چیزانی تہ ءَ اگاں یل ءُ در گَلویں چیزے ھست گڑا انسانی جان اِنت.
زھرناکیں تراک ءَ چہ چکاں برین ٹیومر ءُ تھائی رائیڈ کینسر بزاں کہ چک چہ پیدائیشی ءَ لنگڑ ءُ منڈ بنت.
“یک رپورٹے ءِ رِد ءَ نوزدہ سد ءُ ھشتاد ءُ شَش ءَ جاپان ءَ یک ایٹمی تابکاری ءِ جاہ ءَ چہ یک ھزار ءُ ھشت سد چُک لنگڑی ءُ منڈی نادراھی ءِ آماچ بیتگ اَنت، زھرناکیں تراک ءَ چہ زمین ءَ ھدائی داتگیں دادانی ساہ ھم ھُشک ءُ ھلاس بنت، دمگاں زندگی ءِ آزگیں جاور مٹ بنت ءُ یک نہ وشیں کور چاتے ءَ کپ اَنت.
ھمے بمبانی درچاں بلوچستان ءِ دلبند ھم چکاسینگ بیست ءُ یک سال ءَ پیسر بلوچستان ءِ دلبند چاگی ءَ پاکستان ءِ گیر کانوداریں لشکر ءُ مَلاں تھاری، نادراھی، ساھدارانی زندمانی درست یک دمانے ءِ تہ ءَ پُلیتگ اَنت.
چاگی ءَ کپتگیں بمب ءُ زھرناکیں تراک ءَ چہ اود ءَ پیداگ بیتگیں زھگ بنکی ءَ لنگڑی ءُ آیانی جان ءِ پوست جتائیں نادراھیانی آماچ اَنت.
بلوچ سرڈگار پہ بلوچ ءَ زند ءِ ھاتی ءَ جھندمیں ڈیھے ءِ دروشم ءَ جوڑ کنگ ءُ ھمک نیمگ ءَ آس روکی ءِ آس جمبور کنگ ءُ بلوچ ءِ ھَست مندیں ساھانی گیری اِنت.
راستگ ءُ تچکیں ھَبر ایش کہ پاکستان ءَ وتی “دفاع ” ءِ واست ءَ بمب تراکی نہ چکاس اِتگ، بلکیں بلوچ ءِ کوشی ءُ سرگاری ءِ سر ءَ بلوچ ءِ زمین ءِ سر ءَ بمب تراکینتگ ءُ تاں ھروھدی ءَ بلوچ چہ ھجّگاں گار ءُ بیگواہ بہ بیت.
پرچاکہ آئی ءَ بلوچ ءِ چھرگ نہ گِندگ لوٹ اِیت نہ کہ بلوچ ءِ کَلیں ھَڈ بلکیں آئی ءَ ایوک ءَ وتی چَم بستگ اَنت گڑا بلوچ ءِ مڈی ءُ زمین اِنت کہ مروچی دنیا ء دیم ءَ اگاں گرانتِر ءُ نھاد بندیں سھر ءِ ھست.
گڑا بلوچستان ءِ زمین اِنت گام گام ءَ کل اَنت ،ھمے ھاتر ءَ پاکستان بلوچ ءَ لنگڑ کنگ لوٹ اِیت، ھمے ھاتر ءَ بلوچ ماتاں پیداگ بیتگیں زھگاں کور کنگ لوٹ اِیت، ھمے ھاتر ءَ بلوچ ءِ سرجمیں زندمانی ءَ سیاہ شپ کنگ لوٹ اِیت.
ھما کہ نَود ءُ ھشت ءَ جنرل کاکڑ ءُ کوریں ڈاکٹر کدیر ءِ لنگڑیں دستانی سر ءَ جوڑ کرتگیں بمب ءَ چہ بلوچستان ءِ سر ءَ کپتگیں آسر مروچی ھرکسی دیم ءَ پدر اِنت، اود ءَ زمانگی کھن ءُ آپ ھُشک، جنگلی رَستر، ءُ پَس ءُ گوگ ءُ اود ءَ گواتی دروشم بلوچستان ءِ تیوگیں دمگاں ھَور ءُ گوارانی ءَ وتی پاد ھم داشتگ اَنت.
بلوچستان ءِ جتائیں جاھاں کسان کسانیں ورنا ءُ نُنویں زھگ شُمک “کینسر ءِ ” آماچ اَنت ،ھمک سال ءِ تہ ءَ بازیں کساسے ءَ بلوچ ورناھانی شُمک ءِ نادراھی ءِ آسر ءَ بیرانیانی ھال پیداگ اِنت، اے دُروست مروچی ھمے تابکاری ءِ زور اَنت کہ بلوچ ءِ سر ءُ بھتاں کَپتگ اَنت.
دو ھزار ھبدہ ءَ شنگ بیتگیں رپورٹے ءَ بلوچستان ءَ شمک ءِ نادراھی ءِ آماچ بیتگیں مردمامی کچ ءُ کساس بولان میڈیکل کالج کینسر ءِ جاندْراہ کنوکیں ڈاکتر زاھد مھمود ءِ گوشگ اِنت کہ دوھزار پانزدہ ءِ وھد ءَ بی ایم سی ءَ سَے ھزار ءُ پنچ سد ءُ دوھزار شانزدہ ءَ پنچ سد مردمانی کینسر ءِ نادراھی ءِ کیس دیم ءَ اتکگ چریشانی تہ ءَ دو سد ھون ءِ کینسر ءِ آماچ بیتگ اَنت.
دوھزار ھبدہ ءَ جانسلامتی ءِ وزیر ءَ اے گپ پدر کرتگ اَت کہ تیوگیں بلوچستان ءَ یک سالے ءِ تہ ءَ یک ءُ لَک ءُ چِل ءُ ھشت ھزار مردم کینسر ءِ نادراھی ءِ آماچ بُوَگ ءَ اِنت.
مروچی ھمے زھرانی آسر اَنت کہ بلوچ ءِ سرڈگار کینسر ءُ دگہ نادراھیانی آماچگاہ جوڑ بیتگ.
بلوچ ھمک سال ءَ ھمے روچ ءَ سیاھیں روچے سرپد بیت پرچاکہ ھمے روچ ءَ بلوچ سرڈگار ءِ دلبند ءَ ٹوھیں آسے جمبور کنگ بیتگ.
دی بلوچستان پوسٹ: اس مضمون میں پیش کیئے گئے خیالات اور آراء لکھاری کے ذاتی ہیں، ضروری نہیں ان سے دی بلوچستان پوسٹ میڈیا نیٹورک متفق ہے یا یہ خیالات ادارے کے پالیسیوں کا اظہار ہیں۔
