ماتی زبانانی مْیان اُستمانی روچ
سابق وائس چیرمین بی ایس او آزاد کما ل بلوچ
دی بلوچستان پوسٹ
زبان زندگیں راجانی زندگ بُوّگ ءِ مستریں چیدگ ءُ مانزمان اِنت کہ آئرا پہ دائمی ابدمان کنت۔ اگاں راجے ءَ را ءَ زبان مہ بیت آ راج پہ ابد کدی نہ مان انت۔ پمشکا اے ھبر دگنیا ءِ پلوا گوں راستی ءَ گندگ کیت کہ ہر راج ءِ پجار آئی دود ءُ ربیدگ، شھدءُ شکلیں زبان انت ۔ پمشکا گْوش اَنت اگاں تو یک راجے ءَ را ھتم ءُ چہ ہنڈالاں ولگوج کنگ لوٹ ئے گڑا چہ دْرساں پیسر آئی ءِ زبان ءُ دود مان ءَ ھلاس بکن کہ آئرا کس پہ گاروٹی ءَ داشت نہ کنت۔
مروچی اے ھبر ءَ ما شما کل پوہ ءُ سرپد یں کہ بیستءُ یک فروری ھما روچ اِنت کہ گیدی ءِ راج ءُ ماتی زبانانی میان استمانی روچ گْوشگ بیت۔ اگاں کسے پہ پگر ءُ سسا اے بابت ءَ وانگ ءُ زانگ لوٹ ایت گڑا آئی دپتری پشدر چو اے رنگ ءَ اِنت کہ انگریز وھدے بر صغیر ءَ کیت ءُ ھاکمی کنت گڑا آئی ہلاپ ءَ یک پر آشوبیں زرمبشے چست بیت کہ آھانی تہا نامداریں نام بھگت سنگھ، سبھاش چندر بوس ءُ گاندھی گوں وتی مھلونک ءِ ھمرائی ءَ پہ آئی ءِ لوٹانی منگ ءُ مڈیانی زورگ ءَ انکار کنت۔ اے درگت ءَ گوں گاندھی ءَ ھوار کلیں ھندوستانءِ راج یکمشت ءَ پاد کیت ءُ وتی جنز ءَ دیم ءَ جنزینگ ءَ ساڑی بیت کہ انگریز گوں وتی زورانسری، رپک ءُ پندل، ھندی چاریگانی ھمرائی ءَ ءُ دومی محمد علی جناح ءِ دروشم ءَ ہندوءُ مسلمان ءِ نام ءَ وت ماں وت مانگیشگے ودی کنت ۔
ھمے پئیما انگریز پہ وتی لوٹ ءُ گزرانی پیلو کنگ ءَ بر صغیر ءَ بہر ءُ بانگ کنت ءُ ہندوستان ءُ پاکستان ءِ نام ءِ سرا دو ملک دیم ءَ کار یت دانکہ آئیءِ واک، زورانسری ءُ ہاکمی برجاہ بہ مان اَنت۔ اے بابت ءَ ہمے ہبر دیم ءَ کیت کہ پاکستان ءِ جوڑ بوھگ ءَ رو درآتکی ءُ روبرکتی پاکستان ءِ جار ھر نیمگ ءَ شنگ ایت ، کہ رو درآتکی پاکستانی ءِ آبادی پنجاہ ءُ شش درسد ءُ روبرکتی پاکستان ءِ آبادی چل ءُ چار درسد بیت ۔
چوش کہ اد ءَ ھمے تضاد دیم ءَ کیت مذھب ءُ اسلام ءِ نام ءِ سر ءَ یک ملکے ٹہینگ ءُ دیم ءَ آرگ بیت، بلے اے نیمگ ءَ کمیں ہم چار ءُ دلگوش، ہیال گور کنگ نہ بیت کہ ادا جتا جتائیں راج گوں وتی زبان، دود ءُ ربیدگاں آباد انت ۔
رودرآتکی پاکستان ءِ اکثریت بزان بنگالی راج کہ آئی آبادی پنجاہ ءُ شش درسد اَت آہانی لوٹ ہمیش ات کہ ملک ءِ راجی زبان بنگالی بہ بیت، چوش کہ پاکستان ءِ اولی گورنر جنرل محمد علی جناحءَ اے وڑ نہ لوٹیت، بلکیں ھمے جار ءَ جنت کہ پاکستان ءِ راجی زبان اردو انت ۔چہ بنگالی راج ءِ ڈالچار کنگ ءَ پد 1952ءَ کساس بنگالی راج گوں وتی نودربراں صوبائی اسمبلی ءِ دیم ءَ وتی زبان ءِ ڈلگچاری ءِ ہلاپ ءَ زہرشانی کنت ۔ ہمے وڑ ءَ میڈیکل کالج ءِ ہاسٹل ءَ پولیس بنگالی نودربرانی سر ءَ تیر گواری کنت ءُ پنچ ورنائیں مکتبی شہید کنت کہ آہانی نام صلاح الدین، عبدالجبار، عبدالسلام، رفیق اللہ ءُ ابو برکت بیت ۔چہ اے نودربرانی شہادت ءَ پد بنگالی راج ءِ راجدوستی ءِ رگ ءُ ریشگانی اندر ءَ یک راجی زرمبشے سرکشیت ءُ سرجمیں بنگلہ دیش ءَ وتی امبازاں زور یت کہ آزرمبش language movementءِ نام ءَ بندات بیت ۔
وہدے اے زرمبش گوں ترندی ءَ وتی گاماں دیم ءَ جناں کنت گڑا بیست ءُ دو(22)فروری ءَ یک راجی زہر شانی یے کنگ بیت کہ آئی سر ءَ پو لیس یک رندے پدا تیر باراں کنت ءُ دگہ چار مر دم شہید کنت ۔
اے شہادتانی ہلاپ ءَ بنگالی نودربر پہ ہمے شہیدانی یاتگیر یءَ یک دیوانے بر جم دار اَنت کہ پو لیس آہانی دیوان ءِ بے سوب کنگ ءِ ہاترا گوں آرمی ءَ ہوار اُرش کنت داں آپہ وتی دیوان ءِ برجم دارگ ءَ بے سوب بہ بنت ، بلے چرے زلم ءُ زوراکیاں ابید اے زرمبش مہتل ءُ اُوشت آماچی ءَ در، گوں تُرند یں گامگیجان دیم پہ وتی منزل ءَ جنزاں کنت۔ وھدے اے جنز ءِ دیمروئیءَ پاکستانی لشکر ءُ باجگر گند اَنت گڑا آپہ ایشی ایر موش ءُ گٹگیر کنگ ءِ ھاترا 1956ءَ بنگالی زبان ءَ را پاکستان ءِ دومی مستر یں زبان گوشگ ءُ منّگ بیت بلے پہ اے ھبر ءِ منّگ ءَ بنگالی راج ساجو نہ بیت ۔
ہمے وڑا زبان ءِ نام ءَ اے زرمبش وہدے وتی گاماں دیم ءَ شہار دیاں کنت۔ 1970ءِ دہک ءَ الیکشن کنگ بیت کہ بنگالی راج گوں اکثر یت ءَ سوبین بیت بلے اے ہبر پہ پنجابی ءَ کارچ ءُ تپر بیت کہ آ اے سوبمندی نہ منّ اِیت ءُ وتی واہگانی درچک ءَ آپ دیگ لوٹ اِیت ۔پمشکا 1971ءَ بنگالی راج گوں مھکمیں راجی جُنزئے ءَ دیما کیت ءُ راجدوستی ءِ آشناہی ءَ کنت ۔
وھدے سرجمیں بنگالی راج وتی راجی پہازگ ءِ لوٹ ءُ گزراں پوہ بیت گڑ ا پاکستانی درندگیں لشکر ہم وتی زوراکیانی آس ءَ گیش جمبور کنت کہ چہ سئے ملین ءَ گیش بنگالی پسّگ گونڈلیں تیرانی دیمپان بیت ءُ شہیدی ءِ جام ءَ نو ش کن اَنت ۔ ھمے وڑءَ ہزاراں بنگالی زالبولانی لج ءُ ننگ سیاہ کاری ءِ ہرجان بیت ،ھزارانی کساس ءَ زندان ءِ تھاری آں کید ءُ بند کنگ بیت، لکانی ھساب ءَ چہ ڈیھ ءَ دراں ڈیھ کنگ بیت ۔
بلے !اے ھمے Language Movement زرمبش ءِ بُرتگیں پند ءُ داتگیں دیمونیانی مُزّ اِنت کہ 1971ءَ یک سوبمندیں راجی زرمبش ءِ دروشم ءَ ودی بیت دیمروی کنت ۔اے ھمے Language Movement جنز ءِ جہدانی برورد اِ نت کہ بنگالی راج (16)شانزدہ دسمبر 1971ءَ پہ آجو ئی ءِ گرگ ءَ سوبین بیت ۔
21فروری 1952ءِ زرمبش ءَ پہ بنگالی راج ءَ یک پُرمانا ءُ کاملیں مارشتے ودی کُت کہ سرجمیں بنگالی پہ وتی راجی آکبت ءِ ھا ترا یکمشت بوت اَنت ءُ آجو ئی گپت ءُ سوبمندی ءِ نگرہیں سنج بُتک ،مروچی بنگالی راج دُگینا ءِ دیم ءَ گوں وتی راجی پجار ءُ دود مان،منگہیں زبان ءِ ہمرائی ءَ پہ مجتّی زندگ ءُ ابدمان اِنت۔
مرچی دُگنیا ءِ کُلیں راج گوں بنگالی راج ءِ ھمرائی ءَ 21فر وری ءِ روچ ءِ شہیدا ناں سُھر یں دورت پیش کنت ءُ پہ شرپ گیر کار اِیت کہ آھانی جھد ءُ جپاہ ءِ برکت ءَ انت، مرچی ہر زندگیں راج پہ وتی ماتی زبان ءِ پہازگ ءَ گلائیشں اِنت۔
اے ہمے روچ اِنت کہ مرچی بنگلا دیش ءِ توامیں راج پہ ناز ءُ مڑاہ شہدائے مینار ءَ ساڑی بیت ءُ ندر بوتگیں سرانی سرءَ پہر بنداِیت کہ آہاں وتی زند ءِ واہش ءُ ارمان راجی نپ ءُ سیتانی ہاترا بکشاتگ ءُ ببا داتگ اَنت۔ پمشکا پہ مدامی زندگ ءُ نمیران انت کہ دائم ءَ گیر آرگ بنت ۔
ھمے رنگ ءَUNSCءِ تہا 1999ءَ 21فروری را ماتی زبانانی میان اُستما نی روچ مّنگ ءُ کبول کنگ بیت کہ مرچی ہر راج اے روچ ءَ وتی ماتی زبان ءِ زندگ دارگ ءِ ہاترا زبان ءِ نام ءَ مراگش ءُ لبز انگی دیوان اَڈ دنت داں مئے آوکیں پدّ ریچ چہ وتی ماتی زبان ءَ بیگا نگ مہ بیت ۔
دومی اے ہم گو شگ بیت کہ ہر راج ءَ راوتی ماتی زبان ءَ وانگ ءِ ھکّ بہ رس ایت ءُ وانینگ بہ بیت ۔ بلے مرچی ہم ایر دستیں راجانی زبان لگتمال کنگ بُوْگ ءَ اَنت ۔
چہ اے کلیں دپتر ی ہبرانی زانگ ءُ دربرگ ءَ پد ما ،بزاں بلوچ ہم ہمے اڑءُُ جنجالانی آماچ اَنت کہ ہما ریاست ءَ زی بنگالی راج ءِ زبان لگتمال کتگ اَت، مرچی بلوچ راج ءِ زبان لگتمال کرتگ ئےِ ۔
چوش کہ بنگالی راج چہ وتی دپتر ی جہد ءُ کوشست آں پد سوبمندی ءِ منزل ءَ سر ءُ آجو ئی ءِ مراداں بیت ۔اگاں بلوچ راج لوٹ اِیت کہ منی ہم زبان ءُ راجی زندمان بہ رکّیت گڑا پہ آئی ءَ اے ہثردری اِنت کہ آ وتی راجی زرمبش ءَ زندگ بہ دار اَنت ءُ داں سوبمندی ءَ ہروڑیں کُربانی دیگ ءَ پد کنز مہ بنت ،چیاکہ گیدی ءَ اے ہر راجانی انسانی ءُ بنکی ھک انت کہ آ وتی ماتی زبان ءَ بہ نویس ایت ءُ گپ بجنت۔ پمشکا بلوچ ہم پہ وتی ماتی زبان ءُ بولیانی پہریزگ ءَ جہد ءُ جپا ہ بہ کش ایت، بہ وان اِیت ءُ نوشتہ بہ کنت۔
بلوچی ءُ براہوی مئے وتی شہدیں زبان اَنت ۔
زبان زندگ بات ۔
بلوچ راج آجو بات ۔
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
