اے جنگ نہ جَکّی
زِرگْوات بلوچ
دی بلوچستان پوسٹ
چَہ اے گْواچن ءُ راستی ءَ کس وت ءَ بے سماء کُت نَہ کنت کہ راجانی گِھبودی ءُ چاگرد ءِ سمبھینگ ءَ مستریں کارِست زالبولانی اِنت کہ مرچی اے گیدی ءَ رنگ ءُ بھارئے دَر آؤرتگ. ما اگاں وتی گْوست ءَ چَمشانک بِہ دَئیں ءُ بِچاریں تَہ مارا بانڈی، گُل بی بی ءُ دِگہ بازیں نام دیم ءَ کئیت کہ بلوچ راجدپتر ءِ زیبائی اَنت.
ھمے وڑا بلوچ راجی رھشون واجہ ڈاکٹر الله نذر بلوچ وتی بی ایس او ءِ کماشی ءِ زمانگ ءَ گُشتانکے ءِ تَہ ءَ گْوش اِیت کہ لیلہ کالد پہ پلستین ءَ تُپنگ ءَ چِست کُت کنت گُڑا منی مات ءُ گھار ھم پَہ وتی بے بھائیں آجوئی ءِ ھاترا گوں بَچّ، بْرات ءُ کماشانی ھمبرائی ءَ ایردستی ءِ بگیر ءَ جُھد کُرت کنت.
مرچی اے جُھد ءِ رَوان ءَ ھَزاراں مات ءُ گھار اَست اَنت کہ آیاں پَہ بِچکند ءُ شان وتی سالونکیں بَچّ ءُ چَنگ بَروتیں بْرات، ھَزار اُمیتیں جود ءُ اُوستانی ھونکّیں ساھگ کماش نْدر کُرتگ اَنت کہ اَنگت چو اَلبُرز ءَ دُژمن ءِ دیم ءَ میلانک اَنت.
ھمے وڑا راجدپتر وت ءَ گوں نوکیں رنگ ءُ گوناپ ءَ ساچگ ءَ اِنت. مات یاسمین ءِ کِسّہ ءَ بُنگیج کن ئے شپ آسر بیت بَلے کُربانیانی سِپت ءُ سَتاہ ءِ دْپتر ھَلاس نہ بیت ،وتی ورنائیں بَچّ ءَ ٹھل ءُ سینگار کنت ،دست ءُ پاداں ھِنّی رَج اِیت، راجی بیرک ءَ مانپُوشیت ءُ پَہ واھگے اَمباز کنت ءُ دَست ءَ بَڈ ءَ جنت کہ بُرو پَہ وشّی وتی منزل ءَ سر بات ئے.
اے ھَبر ءَ مات یاسمین سَرپَد اَت کہ ریھان جان ءِ گُڈّی منزل پہ آجوئی ءِ دَز گِرگ ءَ شھیدی اِنت کہ پَدا واتر نَہ بیت، بَلے ماتیں سرڈگار ءِ مھر کہ ھُلّ کنت ءُ چاڑ بَند اِیت گُڑا سرانی نْدر کنگ ءِ ھُبّ ءُ جَزبگ زِرد ءَ کرارے بکش اِیت ءُ اَرواہ ءَ ایمن کنت.
مرچی پَدا مات یاسمین کہ زی ریھان جان ءُ مروچی جنرل اسلم ءِ نمیرانی ءَ پَہ مڑاھ وتی بلوچ راج ءَ اے پَیام ءَ دَنت کہ پَہ اُستاد ءِ شھیدی ءَ بے توکل بوھگی نَہ اِنت.چیاکہ اُستاد ءَ دِگہ ھَزاراں اُستاد پیداک کُتگ، بلکیں سرجمیں بلوچ راج ءَ را اُستاد ءِ پِگر ءُ لیکّہ زِندگ دارگ ءُ دیم ءَ بَرگی اِنت. اے ھَبر دائم اُستاد ءِ واھش ءُ اَرمان بیتگ کہ منی راج ءِ ورنا دیم ءَ بیا اَنت ءُ وتی راج ءِ مات ءُ گھارانی اَرساں ءُ شھیدانی رِتکگّیں ھوناں چَہ زَوال ءَ بِہ رَکین اَنت.
اگاں ما اے مَکسد ءَ دیم ءَ بَریں گُڑا اُستاد ءِ واھش ءُ اَرمان گوں کُل شھیدانی اَرماناں پیلو بَہ اَنت ءُ اَرواہ تاھیر گیپت. چیاکہ اے گپ چو روچ ءَ پَدّر اِنت اُستاد گوں وتی سنگتاں پَہ ھمے مَکسد ءَ نْدر بیتگ داں منی راج ءِ گھارانی گُشان تار تار مَہ بیت ءُ ماتانی جیگ چاک چاک…….
دومی سگار بلوچ کریم مری ءِ مکّھیں مات ءُ لوگبانُک ءِ کُلوہ پَہ بلوچ راج ءَ کہ وتی ڈیھ بلوچستان ءِ آجوئی ءُ گُلامی ءِ ھِلاپ ءَ پاد بیا اِت ءُ کُربانی ءِ دَیَگ ءَ ساجو بِہ بَہ اِت. “ما وتی بَچ ءُ کُلیں شے آں کُربان کنوں بَلے پاکستان ءِ گُلامی ءَ نَہ منّ اُوں….. کسی لَٹ ءَ مِڑتی، کسی کَلم ءَ مِڑتی، اگا کاراں بَرے، پَدا نواں گڑدے…… ھِمت ءَ کن اِت، اے جنگ نَہ جَکّی، ما لگور نَہ بَہ اِیں، پَہ سرزمین ءَ ھَر وڑیں کُربانی ءِ دَیَگ ءَ تیاریں….. آزات بلوچستان زِندگ بات” .
اے ھَبر من بِندات ءَ گْوشت اگاں کُجام راج ءِ زالبول کہ وتی ڈُبّہ ءُ زمہ واریانی پیلہ کنگ ءَ جاڑی بوت گُڑا من جَزمّاں آ راج ءِ تھاریں شپ پَہ بام بُوّگ ءَ دیر نَہ کنت. پاکستان بِہ گِندئے گوں وتی بے سوبیں ناشرکاری آں گیش ءَ گیش زُلم ءُ زُوراکی بِہ کنت بَلے اے ھَبر ءَ شر سرپَد بِہ بیت کہ بلوچی ءَ گْوش اَنت “مَنجل لھڑ کنت وتی لُنٹاں سوچیت” اگاں پاکستان زُلمانی آس ءَ ھمنچو جَمبور بِہ کنت ھَمنچو گیش وت سُچ اِیت ءُ پُر بیت. چیاکہ پَہ پاکستان ءَ زُلمانی مَستریں مَنّانک بنگلہ دیش اِنت کہ آئرا بیدئے بے سوبی ءَ دِگہ ھِچّ پَہ نَسیب ءَ نَہ بوت. ھمے وڑا بیدئے بے سوبیں واھگاں چَہ بلوچستان ءَ پَہ ھَلو ھال واتر نَہ بیت.
مرچی بلوچ راج ءِ ھَر مات ءُ گھاراں اے پیسلہ کُتگ کہ ما وتی بَچّ ءُ بْرات، جود ءُ کماشاں نْدر کن اِیں بَلے گُلامی ءَ کبول نَہ کن اِیں. بلکیں گوں وتی راجی بامَردانی ھمکوپگی ءَ پَہ جنگ ءَ ھم ساڑی اِیں. گُڑا پاکستان گوں چین ءَ اے ھبر ءَ شر بِہ زانت کہ منی بے مُزّیں سی پیک پہ دْپ جاکی گوں ھِچّ وڑیں پیش بَندی آں گاماں دیم ءَ شھار نَہ دَنت ءُ چار دَست نَہ بیت. بَہ کول ءِ راجی راہ دَربَر ءُ بلوچ نیشنل موومنٹ ءِ کماش واجہ کلیل بلوچ گْوش اِیت کہ سی پیک بلوچ ءِ جونانی سر ءَ گْوز اِیت بَلے پہ شاتکامی ءُ ھلو ھال آسر نَہ بیت. چیاکہ بلوچ راج پَہ وتی ڈگار، گْواجن، لَجّ ءُ ننگّ ءَ ھَوار ڈیھ ءِ ھر بوچ، دار ءُ ڈنگرانی پھازگ ءَ ساڑی اِنت بَلے ایردستی ءَ ھِچّ داب ءَ وش آتک نَہ کنت.
دی بلوچستان پوسٹ: اے نبشتانک ءِ تہا درشتان کُتگیں ھیال ءُ لیکہ نبشتہ کار ۓ جندءِ گنت، الم نہ اِنت کہ دی بلوچستان پوسٹ رسانک نیٹورک ایشانی منوک بہ بیت یا اگں اے گل ءِ پالیسیانی درشانی اِنت۔
