،،مات یاسمین ءِ اُستاد اسلم بلوچ ءِ شھادت ءَ پد بلوچ راج ءَ پہ کلوھے،،
نوہان نور بلوچ
دی بلوچستان پوسٹ
“یات بہ بیت مات یاسمین ءَ براھوئی زبانءَ وتی کلوہ داتگ ءُ نوہان نورءَ بلوچی ءَ رجانک کُتگ”
من ءَ اُستاد ءِ شھادت ءَ ناز اِنت. آئی ءَ وتی سرجمیں زند پہ وتی راج ءَ ندر کُتگ ءُ ھرچ بُھتام ھرچ گران ءُ ھرچیز گوازینت ءُ مھکم اوشتاتگ اَت . پرچاکہ آئی جوش اِیش اَت کہ وتنّ ءِ واست ءَ مزّنیں کار بکنت ءُ وتی راج ءَ چہ گلامی ءَ آجو بکنت. ھر چیز ءَ مھکم اوشتاتگ ءُ روگ ءِ وھد ءَ ایمانداری ، دل پَھک ءُ وپاداری ءَ گوں شُت.آ چہ یک چیزے ءَ پُشت ءَ نہ کِنزّ اِتگ۔
مرچی من ءَ گوں راج ءِ ورنایاں ھمے دزبندی اِنت کہ نوں اُستاد ءِ شھادت ءَ پد مہ پرش اِت. انگت گیشتر مھکم بہ بیت ءُ وتی جوش ءَ گیشتر بہ کن اِت. انچوش کہ اُستاد ءَ مایوسیاناں پروشت داتگ ھمے وڑ شما ھم مایوس مہ بیت. مایوسیاں بے پروش اِت. وتی تہ ءَ جوش ودی بہ کن اِت . من گوں آیاں اوشتاتگ آں.چنکس کہ آیانی سوچ ءُ سسّا اِنت چنکس آیانی مجگ ءِ تہ ءَ ھست اِنت. آ اگاں اُستاد ءِ کار ءَ دیم ءَ برگ لوٹ اَنت.اُستاد ءَ وش کنگ لوٹ اَنت آئی ارواہ ءَ وش کنگ لوٹ اَنت. آ اے کار ءَ دیم ءَ بہ بر اَنت ءُ آئی سوچ ءُ سسّا ءَ گوں ھوار اُستاد ءِ سوج ءُ سسّا ھمیش اَت کہ آئی ءِ ھمے واھشت اَت کہ منی راج ءِ زھگ دیم ءَ برو اَنت ءُ پُشت ءَ مہ بنت.اے گھارانی ارس ءُ سردی ءِ تہ ءَ نندگ ءُ شھیدانی ھوناں تاوان بوگ ءَ میل اَنت.اُستاد ءِ شھادت ءَ پد آ اے سوچ ءَ مجن اَنت کہ نوں ھرچیز شُتک ءُ ھتم بوتگ۔
مرچی یک اُستادے شُتگ دگہ دہ اُستاد جوڑ کرتگ. گوں وت ءَ ھزاراں جوڑ کرتگ.انچوش کہ ریھان جان شُت ریھان جان ءَ پد ھزاراں ریھان پاد اَتک اَنت۔
اُستاد ءِ کول ءُ واھشت اَت کہ من شھادت ءِ مرگ ءَ برو آں ءُ نِپاد ءِ مرگ ءَ چہ گھتر اِنت شھادت ءِ مرگ نسیب بہ بیت. ھر وھد ءَ ھمے لوٹ اِتگ ءُ آئی دوا کبول بوت. آئی واھشت سرجم بوت. ھنچوش کہ من نہ پروشتگ آں. من چہ راج ءَ دزبندی کن آں کہ آ مہ پُرش اَنت.گیشتر جوش بیار اَنت. گیشتر وتی کار ءَ دیم ءَ بہ بر اَنت.سوچ ءُ سسّا ءَ دیم ءَ بہ بر اَنت. جنگ چہ ھوش ءَ بیت.یک مردمے روگ ءَ پہ جنگ ھتم نہ بیت. ھما وھد ءَ کہ جنگ بندات بوتگ ھر مردمے پد ءَ یک مردمے پاد اتکگ۔
ھنچوش کہ بالاچ ءَ پد جنگ بند نہ بوت جنگ دیم ءَ شُت.آھر ءَ اُستاد دیم آورتگ ءُ آئی ءِ سر ءَ چنکس بھتام ھستگ اَت، چنکس آئی سر ءَ دورگ بندگ بوتگ. گپ گُشگ بوتگ آ نہ پرشت.ھرچیز ءِ تہ ءَ مھکم اوشتاتگ پرچاکہ آئی سوچ ءُ سسّا پہ وتنّ ءُ راج ءِ واست ءَ اَت۔
راج ءُ وتنّ ءِ سوچ ءِ جَنگ یک مردمے ءَ پہ نہ اوشت اِیت. بَلے من سرپد آں . نپرت ءُ درد کُلّینانی زِرد ءِ تہ ءَ ھست اِنت. اُستاد راج ءِ پِت بوتگ. آئی جوش آئی سسّا آئی سوچ ھرچ مردم ءَ گوں ھوار اِنت. آئی ءَ وت ءَ را چہ راج ءَ جُتا نہ کُرتگ اَت.آئی مزّنیں کربانی یے داتگ .ریھان ءَ جان ءَ پہ راج ءُ وتنّ ءَ کربان کتگ۔
ریھان ءِ سوچ ءُ سسّا چو کہ دیم ءَ شُتگ.ریھان جان ءَ چہ پد کُل پاد اتک اَنت. اے زھگ شُت اَنت ءُ دگہ ریھان پاد اتک اَنت. اُستاد ءَ پد کس ھم اے سوچ ءَ مہ جنت کہ جنگ ھتم بوتگ ءُ ما پرشتگ اِیں ءُ اگاں گیشتر اُستاد ءَ وش کنگ لوٹ اِت. آئی ءِ ارواہ ءَ را وش کنگ لوٹ اِت، آئی سوچ ءُ سسّا ءَ گوں دیم ءَ برگ لوٹ اِت گڑا جَنگ ءَ ھچ وڑ ءَ پُشت ءَ میل اِت . آئی شھادت ءَ پد اے ھوناں اے شھیدانی ءُ آ سنگتانی دراھینانی بیر گرگی اِنت. مارا دژمن چو ماپ کنگی نہ اِنت۔
دژمن وش بوتگ کہ ایشانی ھر چیزے ھستگ اَت شُت. نوں اے جنگ ءِ دیم ءَ بروک کس نیست اِنت. ورنا پاد بیا اَنت ءُ نشان بہ دَے اَنت. ھنچوش کہ اُستاد ءِ سوچ ءُ سسّا ءَ آئی ءَ اے جنگ ءَ را دیم ءَ برگ ءَ اَت. ما ھمے وڑ ءَ دیم ءَ بر اِیں. من گوں شُما مھکم اوشتاتگ آں. من دانکہ زندگ آں. راج ءِ مات آں ءُ راج ءَ گوں اوشتاتگ آں .ھنچوش کہ استاد ءِ سوچ اَت من چہ کلاں ھمے سوچ ءَ لوٹ آں ءُ چنکس ورنا اُستاد ءَ جوڑ کرتگ ءُ آیانی سوچ ءُ سسّا وتی وڑ ءَ لوٹ اِتگ اَت. من دوا کناں اللہ آیاناں مہ پروش اِیت ءُ مارشت ءُ اُوپار بہ دنت اِش۔
گھارانی ماتانی اے سردی ءِ تہ ءَ نندگ ءُ آدگہ شھیدانی ھوناں تاوان ءَ میل اَنت. انکس اُستاد ءَ واری سرجمیں زند پہ وتی وتنّ ءَ داتگ. نوں من چہ وتنّ ءِ کُلّیں ورنایاں چہ ھمے دزبندی کن آں. چنکس کہ جزبہ اِنت گیشتر پاد بیا اَنت ءُ اے جنگ ءَ گوں مارا ھوار بہ بنت ءُ اے گپ ءَ چہ وتی دل ءَ بہ کش اَنت کہ ما جنگ ءَ ھتم کن اِیں.اُستاد شُت مئے واست ءَ ھچ پشت نہ کپتگ. اگاں شما اُستاد ءِ سوچ ءُ سسّا ءَ دیم ءَ برت اِت گُڑا ان شاءاللہ جنگ دیم ءَ روت.چنکس کہ جھد کن اِت اے جنگ ءَ دیم ءَ روت اِنت۔
دی بلوچستان پوسٹ: اے نبشتانک ءِ تہا درشتان کُتگیں ھیال ءُ لیکہ نبشتہ کار ۓ جندءِ گنت، الم نہ اِنت کہ دی بلوچستان پوسٹ رسانک نیٹورک ایشانی منوک بہ بیت یا اگں اے گل ءِ پالیسیانی درشانی اِنت۔
