دی بلوچستان پوسٹ نیوز ڈیسک کو موصول ہونے والی اطلاعات کے مطابق بلوچستان کے علاقے صحت پور میں فائرنگ کے واقعات میں دو افراد جانبحق ہوگئے جبکہ ضلع مستونگ سے خاتون کی تشدد زدہ لاش برآمد ہوئی
تفصیلات کے مطابق صحبت پور کے علاقے گوٹھ اعظم خان میں نامعلوم مسلح افراد نے گھر میں گھس کر گل حسن بھنگر کو فائرنگ کر کے قتل کر کے فرار ہو گئے جبکہ قتل کا دوسرا واقعہ پہنور سنھڑی کی بازار میں پیس آیا جس میں نامعلوم نقاب پوش مسلح افراد نے فائرنگ کر کے قیصر خان بنگلانی کو قتل کر کے فرار ہو گئے۔
ان دونوں قتل کی وجوہات معلوم نہیں ہو سکیں پولیس نے لاشوں کو تحویل میں لے کر ضروری کاروائی کے بعد ورثاء کے حوالے کر کے مزید تفتیش شروع کر دی۔
دریں اثناء مستونگ میں دشت کے علاقے تیراہ میل سے ایک نامعلوم خاتون کی تشدد زدہ لاش برآمد کر لی گئی جسے نامعلوم افراد نے تشدد کر کے قتل کر دیا تھا۔
مذکورہ خاتون کو شناخت کے لئے سول ہسپتال کوئٹہ منتقل کر دیا گیا اور مزید کا رروائی کی جا رہی ہے۔
