زندانانی تہ ءَ بندیگیں بلوچانی نِمدی پہ انسانی ھکانی گلاں
اکیل مراد
دی بلوچستان پوسٹ
دروت ءُ دراہ بات ئے جھان ءِ نامداریں مردماں انسانی ھکانی پد جنوکی ءِ نام ءَ شما زانگ بئیت شمارا ھَرکس انسان دوستیں مردم سرپد بیت۔
شما ھمک انسانانی توار ءَ سرپد بئے شمے میان ءَ زات ءُ زُریات ءِ تپاوتی نیست شما بس انسانی ھکانی واست ءَ جوڑ کنگ بیتگ اِت۔
من تہنا یک زندانی ئے نہ اِنت کہ مروچی اے نِمدی ءَ پرشما ندر کنگ ءَ اوں مروچی ءَ چہ بگر اے ھپتاد ءُ یکیں سالانی تہ ءَ مئے ھلک ءُ میتگ ءُ شھراں ھزارانی کساس رُستگیں ورناہ، پیریں کماش، سمبیھتگیں بانور ھم اے زندانان آرگ ءُ بندیگ کنگ بیتگ اَنت ۔
مروچی مارا چُنت کرنیں کہ اے زندانانی تہ ءَ بندیں ما ھمے اِیش کرتگ کہ شما پہ انسانانی ھکانی پَچگرگ ءَ جوڑ کنگ بیتگے، شما پہ انسانی سر ءَ ناروائی ءِ نہ منوکیں وڑے ءُ جوڑ کنگ بیتگے ۔
ما مروچی ھمے اُمیت ءَ اے زھمت کَشیتگ ءُ لَٹانی باریگ ھلاس کرتگ ءُ شمے سر ءَ یک نِمدی ءِ نبشتگ کنگ ءَ ایں تاکہ شما ھم مئے ھیال ءُ بیتگیں زوراکیاں سرپد بہ بئے۔
اے آھوکیں دسمبر ءَ شمارا ھم ھپتاد ءُ یک سال سرجم بیت کہ شما پہ انسانی زندمان ءِ رکینگ ءَ جاہ جتگ اَلم شمے دنیا ءِ زندمانی وشی ءِ سر ءَ گوزگ ءَ ایں شمے لوگانی زالبول ءُ چک وشھال شاتکام اَنت شما الم سھب ءَ وتی وھدانی سر ءَ بُست کن ئے ءُ شپ ءَ ھم وتی وھدانی سر ءَ لوگاں روئے۔
بَلے مئے میتگانی زندمان ھما سیاہ شپیں زندمان ءَ چگل دیگ بیتگ اَنت انسانی ھک وتی جاہ ءَ مارا کَس ھیوان ءُ رستر ءِ ھم سرپد بوھگ ءَ نہ اِنت ھرکسی لَٹ ءِ سر کہ چِست بیت مئے بڈانی سر ءَ تراک تراک ءَ توار کنت یکے دومیگ ءَ چہ گنتر ءُ زوراک تِریں رستراں مردم یکزدیں مرگ ءَ کُش اَنت۔
بَلے مارا زندانانی تہءَ رسترانی پئیم ءَ ھم جنگ ءَ نہ اِنت ھنچش مئے سرانی ھوش شتگ ءُ گار ءُ بیگواہ اِنت اے کجام فرعون ءِ زمانگ اِنت کہ اے مئے سر ءَ اے ھسابیں زوراکی بئیگ ءَ ایں۔
مئے کسان کسانیں ورناہ ءُ تپلیں زھگ ھم ھمے زندانانی تہ ءَ بندیگ اَنت بہ گندے اشانی چیھالانی توار اَرش ءِ ھدابند ءَ سر بوھگ ءَ اَنت بَلے مروچی ما اے نِمدی ءِ تہ ءَ ھم لھتیں چیھالاں نبشتگ کن ایں بلکیں شمے کَر ءُ کوریں دیداں سر بہ بنت اے زمانگ کھریں اَرش ءَ دروشان اِنت مئے پیوستیں زندمان ءَ۔
مئے ھڈانی پوست لگوشتگ اَنت ھُشکیں رگانی تْرکلیں سوھاسکاں زاھر اِنت ھون ھم تُش تُش ءَ روانت ءُ کاینت ھمے زوراک مئے ھمے ھوناں ھم وتی چماں گندگ ءَ اَنت انگت ھمے ھونانی ریچکاں گرگ ءُ مئے دیم ءِ سجویں پوست ءَ لگوشان اَنت مئے جوناں بُر اَنت ھنچیں یک دراج ءُ شِہ بریں گارے ءِ تہ ءَ بند کنگ ءَ اَنت اود ءَ پد ءَ کس ءَ ھم روگ ءَ نئیلگ ءَ اَنت۔
تاں کسے ءِ بئیت مئے پروشتگیں ھڈاں یکجاہ بہ کنت ءُ مئے شناس ءَ بہ کنت تاں مئے پشکپتگیں پیر ءُ عاجزیں مات ءَ اے کلوہ ءَ بہ دنت تی چک ءِ ھَڈ پلاں گار ءَ دز کَپتگ اَنت۔
تی چک پلاں وھد ءَ کُشگ ءُ بے کپن ءَ گار ءِ تہ ءَ بار دیگ بیتگ اے وڑیں کسہ بلوچ ءِ چاگرد ءَ سریچ اَنت بلوچ ءِ چشیں لوگ ءِ پَش نہ کپتگ کہ آئی ءِ تہ ءَ چُکے بیگواہ ءُ زندانی نہ اِنت۔
بَلے انگت ءَ شمے وشھالیں زندمان ءَ مئے تھار شپیں زندمان بیھال کرتگ ءُ مارا دنیا ءِ دیم ءَ ھنچش بے سماہ کرتگ کہ مئے چیھال گوشگ ءَ مردمی نہ اِنت گوشگ ءَ مئے گریوْگ دگہ رنگ اَنت۔
“گِلگ “
یا شما پہ نام ءُ وتی ساڑگ ءَ جوڑ کنگ بیتگے گڑ ءَ ھپتاد ءُ یکمی سال ءِ روچ ءَ الم ھمے گپ ءَ دنیا ءِ دیم ءَ پدر بہ کن اِت ءُ گوش اِت ما ایوک ءَ یورپی دنیا ءُ وتی راجی زندمان ءِ واست ءَ جوڑ کنگ بیتگ اِنت۔
دگہ رند ءَ مئے مات ءُ گھار دگانی سر ءَ شمے نام ءَ مہ گِر اَنت ءُ شمارا توار پِر مہ جن اَنت مروچی مئے زندانیانی اِش کنگ ءَ شال ءَ ھم مئے مات ءُ گھار مئے درگیجگ ءَ سِی ءُ شَشمی روچ ءَ نیشتگ اَنت ءُ ھمے سی ءُ شَشمی روچانی تہ ءَ مارا یکوی ھال سر بوھگ ءَ اَنت مئے کسان کسانوکیں چکانی دپ ءَ ھم شمے نام اِنت مئے گاریں مردمانی درگیجگ ءَ مئے کمک ءَ بہ کن اِت۔
اے وھد ءِ زوراک ھنچش شمے دست ءَ بے لگام بیتگ کہ شما آئی ءَ تشیں ھم گُشت ءُ جست کُرت نہ کن ئے کہ اے مردمانی نیادی لوٹ چی اَنت شما ھنچش بے تھمبل بیتگے کہ وتی واکداراں مئے دمگاں دیم دات ءُ اے جست پدی ءِ رند ءَ بہ کپ اَنت۔
اگاں شما درست اے وھد ءِ زوراک ءِ دیم ءَ پَشل ءُ بے تھمبل ءِ گڑ ءَ دروست ھمگرنچ بہ بیت ءُ مئے ھڈانی تواراں گوشبدارے بلکیں ھڈانی توار وشتر ءُ زیبناکی ءَ پدر بہ کن اَنت۔
بَلے یک رند ءِ پد ءَ شمے انسانی درا توار پِر کن ایں مئے ھما ماتانی تواراں رھم بہ زیریت ءُ الم آیاں اے جست ءَ بہ گِر اِت کہ شما پرچا اے دگانی سر ءَ اوشتوکے اے دہ سمبر ءَ پرچاہ نندانکانی تہ ءَ اِت۔
ما وتی گڈی گپ ءَ اے گوش ایں شما اگاں ایوک ءَ وتی دنیا ءِ واست ءَ جاہ جتگ گڑا وشھال ءُ زندمان بات ئے ۔
بلوچ ءِ زندانی
دی بلوچستان پوسٹ : اے نبشتانک ءِ تہا درشتان کُتگیں ھیال ءُ لیکہ نبشتہ کار ۓ جندءِ گنت، الم نہ اِنت کہ دی بلوچستان پوسٹ رسانک نیٹورک ایشانی منوک بہ بیت یا اگں اے گل ءِ پالیسیانی درشانی اِنت۔
