جنرل اسلم ءُ نفسیاتی گنوکیں پاکستان
صادق مُجاهد بلوچ
دی بلوچستان پوسٹ
من دروت ندر کناں جنرل استاد اسلم بلوچ ءُ اے دگہ راجی بامرداں کہ آهاں وتئی نگرهیں هون پہ بلوچستان ءِ آجوئی ءِ هاترا مَل اتگ انَت ءُ وتءَ کُربان کُرتگ.
نزاناں کہ گپءَ چہ کُجا بندات بکناں پرچا کہ مرچی من یک انچیں بُنگپےءَ ایر کپتگ آں ءُ انچیں یک بامردی ءِ بابتءَ کہ آئی ءِ اے بُراِتگیں پَند چہ منی نَد ءِ وس ءَ گیش انِت … بلے اگاں نبشتہ مکناں هم منی مجگ مناں ملامت کنت کہ چُشیں راجی بامرد هزارانی تہ ءَ کم ودی بنت… جنرل اسلم نام ءُتوار آئی ساڑا من هما وهدی سنگتانی دپءَ اِش کُرت انَت کہ آ چہ بولانءُ مارگٹءَ پہ بڑائیءِ هاترا سیاهجیءَ اتکگ اِت انَت اے نامانی تہ ءَ کہ شهید سدو مری ءُ شهید نبی مری عرف ساگر شهید بوتگ انَت ءُ کسے کہ هست داں جهانءَ گوں ابد مان بات انَت…
ما مُدام کہ بلوچستان ءِ هالتانیءُ هستیں جاور هال ءُ جنگی رپکءُ هنرانی ءُ گوریلا جنگءِ بابتءَ کہ گپ کُرت گُڑا شهیدءِ وتن جنرل اسلم بلوچءُ دگہ لهتے هستیانی نام آهانی زُبانءَ چو بینگءَ ایر رچان اِت انَت…وهدے گپ اتک پہ جنگی رپکءُ هنراں گُڑا استاد چہ درستاں بالاتر اَت…من چہ هما روچاں اے نام وتئی زهنءُ مجگءِ تہ ءَ نکش کُرت ءُ مار اِت بلوچ بے وارس نہ انِت کہ جنرلءِ ڈولیں راجی بامرد بلوچءِ آجوئیءِ سپر ءَ هوار انَت الم یک اُمیتے بلوچءِ تہ ءَ مان ایت …
همے رنگءَ وهد گوزان اِت انَت ءُ اے جنگ شاه کشان اَت هرکسءَ لوٹ اِت کہ وتءَ اے جنگءَ کجام نہ کجام وڑا هوار بگیج ایت وهدءِ همرائیءَ هرچیز بدل بوان اَت همے رنگءَ راجی جُهد هم وت ءَ پالایان اَت گندءُ گسڑاں یک کر کنان اَت ءُ چو دریا ءَ لیپگ کنان اَت… چدو پد استاد ءِ بابتءَ من سک باز گپ ونت آئیءِ آرٹیکل ءُ نبشتانک ونت انَت وهد وهدءِ سرا آئی ویڈیو پیغام آهان بوت انَت ءُ آئی ءِ کُرتگیں جنگی کمانداریءِ ویڈیو کہ دیم ءَ گوست انَت نوں ما گیشتر پوه بوهان بوتاں کہ اے وڑیں راجی هستی پہ بلوچءِ آجوئیءِ سپرءِ زندگ دارگ ءِ مستریں مانزماناں چہ یکے…
همے پیم ریاست پاکستان کہ چہ اے وڑیں جنگی کماندارءُ سیاسی زانتکار، مفکرءُ دانشورانی هما شعوری سوچ ءُ پگراں چہ نفسیاتی گنوک جوڑ بیتگ اَت پاکستان ءَ لوٹ اِت کہ من اے پیمیں هستیاں چے وڑ اے راجءُ مهلوکءِ دلاں چہ در کنگءُ آهانی مجگانی تہ ءَ هر وڑیں پروپکنڈه ءُ وڑ وڑیں نام دیگ ءِ دروگ بنا کُت بلے آئیءَ اے نزانت کہ چُشیں پگرانی هلاس کنگ منی وسی گپے نہ انِت… همے رنگءَ ریاست پاکستان ءَ آجوئی گَلانی هلاس کنگءُ جنرلءِ وڑیں بازیں راجی بامردانی سرءِ کیمت ایر کُرت انَت کہ آ لکانی هسابءَ اِت انَت… اے پندلءِ بے سوب بوهگ ءَ پد آئی هندی ڈیتھ اسکواڈ ٹهینت انَت تاکہ دویں نیمگاں بلوچ وت ماں وت کُشتءُ کشار جوڑ بہ انَت یکے دومیءَ هلاس کنگءِ جهد ءَ بکن انَت انچوش گُش انَت سوچ ءُ پگرانی هلاس کنگ یک بلاهیں مُشکلیں کارے کہ زورگیرءَ نفسیاتی گنوک جوڑ کن انَت…
11 اگست 2018 ءَ کہ استادءِ مستریں سالونکیں بچ شهید ریحانءِ فدائین اُرش چینیانی سرا کہ بوتگ اَت اے اُرشءَ بلوچ ءِ جُهدءَ یک توانءُ جانے بکش اِت .. بلکیں ما اے گُشت کنیں کہ بلوچءِ جُهد کہ یک هدے ءَ اگاں هورت بچارئے پروشتءُ پروش ءِ آماچ بوهان اَت ..اے اُرشءَ جنگءِ شکل بدل کُت همے رنگءَ کراچیءَ چینی کونسل خانہءِ اُرش ءُ دگہ بازیں اُرش چرے اُرشاں دراهیں دنیاءِ دیم گوں بلوچستانءَ کُرت ءُ پاکستان سِرین پروش کُت ءُ آ گیشتر نفسیاتی مریض جوڑ کُرت….
جنرل ءِ اے وڑیں جوڑ کُرتگیں پروگرامءُ جنگی مشناں اے خطہ ءِ جغرافی نظام ءُ مظلومءُ محکومءِ میانءَ یک بلاهیں تپاوتے پیدا کُرت…. نزورءُ کمزورءِ تہ ءَ پہ دُژمنءَ یک نفرتے جوڑ کُرت.. هر بلوچ ءِ دل ءَ پہ استاد ءُ هما بامردانی کہ آهاں پہ وتی نگرهیں سر پہ آجوئی ءِ هاترا ندر کُرتگ انَت یک امیتے جوڑ بیت انَت…
اے اُمیت پہ پاکستان ءُ چائناءَ مرگءَ کمتر نہ اَت… پرچا کہ اے پروگراماں ءُ فدائیناں زورگیر ءِ شاه رگ ءَ دست مان کُرتگ اَت.. همے پیم هرکس وتئی زندگ دارگءِ هاترا باید وتئی تاوان دیوکءَ بہ کُشیت کہ آ نوں زندگ بوت کنت پاکستانءَ هم وتئی دراهیں پندل ساز اِت انَت ءُ جنرل استاد اسلم بلوچ ءَ را شهید کُرت ءُ آئی دلءَ من اے جنگءَ سوبین بوتگاں…. بلے چُوش نزانت کہ جنرل اسلم یک پگریءِ نام انِت یک سوچی ءِ نام انِت ءُ اے سوچءُ اے پگر ءِ هلاس کنگ ھچ وڑ ممکن نہ اِنت ءُ دانکہ بلوچستان ءِ آجوئی ءَ زندگ مان ایت…
هوناں دنیایے مَل اِت
جُهدءَ رهبر رودینتگ
دی بلوچستان پوسٹ: اے نبشتانک ءِ تہا درشتان کُتگیں ھیال ءُ لیکہ نبشتہ کار ۓ جندءِ گنت، الم نہ اِنت کہ دی بلوچستان پوسٹ رسانک نیٹورک ایشانی منوک بہ بیت یا اگں اے گل ءِ پالیسیانی درشانی اِنت۔
دی بلوچستان پوسٹ: اے نبشتانک ءِ تہا درشتان کُتگیں ھیال ءُ لیکہ نبشتہ کار ۓ جندءِ گنت، الم نہ اِنت کہ دی بلوچستان پوسٹ رسانک نیٹورک ایشانی منوک بہ بیت یا اگں اے گل ءِ پالیسیانی درشانی اِنت۔
