بلوچ ءِ آشوب ءُ ھندوستان ءُ روس ءِ آشوب
اکیل مراد
دی بلوچستان پوسٹ
مئے آشوبی سنگت ھنچش کمربنداں کہ مروچی آیاں اے پدر کرتگ کہ راجی لوٹانی پَد ءَ ھمک وڑیں دیمھونی ءِ دیگ ءَ چَک ءُ پدی نیست اِنت ھنچش دنیا ءِ آشوبی پکرانی تہ ءَ پوریاگر، نیزگار ءُ ھمک تَک ءَ سیادی کنوکیں مردماں وت ءَ ھوارینتگ ھنچش بلوچ ءِ آشوب ءَ ھم ھمے گِندگ کئیت کہ اشی ءِ تہ ءَ ھم پوریارگر نیزگار مان اِنت۔
نوزدہ سد ءُ ھبدہ ئے روس ءِ آشوب ءِ مردمانی راجدپتر ءَ مزنیں نامے داریت اے آشوب ءَ پد پوریاگراں وتی ایمانداریں جھد ءِ زور ءَ چہ کرناں چہ ھستیں ھاکمی تھت پروشتگ ءُ یک پوریاگریں ڈیھے جوڑ کرتگ لینن ءُ ٹراٹسکی ءِ رَند پداں چِست بیتگیں آشوب ءَ سرجمیں دنیا مَٹ کرتگ ۔
بنداتی میان اُستمانی جنگ ءِ سوتک سوچیاں چہ پد سیر لاپیں مھتر ھم شُد آماچ بیتگ اَنت ءُ سرجمیں دنیا آشوبی جنز ءَ وتی تہ ءَ مانپوشیتگ اَنت یکے ءَ چہ پد دوھمی مھتر آشوب ءَ چست بیان بیتگ اَنت کہ زردرایں تک ءِ دیم ءَ مِک بیان بیتگ اَنت۔
جرمنی ءَ چہ بہ گر تاں امریکہ ءَ ھمک کُنڈ ءَ پوریاگر چِست بیان بیتگ اَنت ھمے وڑ روس ءِ آشوب ءَ سرجمیں دنیا ءِ آشوبی جنزاں یک جوانیں شون داتگ اَنت ءُ کرہ ارز ءِ پوریاگراں اے پدر کرتگ کہ زرداریں ٹولی ءُ پُرزوریں مھتراں پروش دنت پوریاگرانی سوبمندی بیتیں ۔
ھاکمی کنگ ایوک ءَ زردار ءُ دُز ءُ ڈنگانی نہ بیت بلکیں ھما پوریاگر وتی پوڑی ءَ درگیج اِت آ وت مھکم بیت ءُ وتی چاگرد ءِ ھاکمی ءَ کُت کنت۔
اے سوبمندیں آشوب ءَ اے دراھیں جنزاں یک ھنچیں رژن ءِ تالینتگ ھَمک نیمگ ءَ پوریاگر گوں نوکیں جھدے ءَ جنزان بیتگ اَنت اے دراھیں جنزانی مھکم کنگ ءُ سرجمیں دنیا ءَ زرداری ءِ ھاکمی ءِ ھلاس کنگ سوشلسٹیں چاگرد ءِ سرجمی ءِ جَد ءُ جھد ءِ واست ءَ لینن ءُ ٹراٹسکی ءِ سروکی ءَ انٹرنیشنل(کومنٹری) دیم ءَ اتکگ،
دیما آھگ ءَ بنداتی پَنچ سالانی تہ ءَ اے انٹرنیشنل ءِ نیادی دیوان بندات بیان بیتگ اَنت چریشی ءَ چہ دنیا ءِ سرجمیں جنز ءُ اشی ءِ چِست ءُ ایرانی رھبندانی ھیالانی درشانگ ءَ روگ ءُ سوشلزم ءِ شنگ کنگ ءَ جوانیں گامگیج اِش زُرتگ۔
ھندوستان ءَ ھم ھمے آشوب ءِ وھد ءَ اے دمگ ءِ آشوبی ورناہ، پوریاگر ءُ آجوئی دوستاں اے آشوب ءَ گوں سک واھِشی داشتگ اے وھد ءَ روس ءُ ھندوستان ءَ بازیں کارنامہانی سر ءَ دلگوشی بیتیں کہ ھندوستان ءِ جتائیں یک جیڑگے بیتگ ءُ روس ءِ جتا یک جیڑگے بیتگ بلے روس ءِ سر ءَ ھچ وڑیں سامراجی تاکت بزاں ڈنی زورگری نہ بیتگ بلے اشی ءَ چَہ اَبید زار روس ءِ وھد ءَ چاگردے سر ءَ یک شدلاپی ءُ نیزگاری ءِ کوہ سر ءَ پروشتگ ءُ مردم لاچار کرتگ اَنت زار ءِ وتی سامراجی ءِ تھت بزاں وت ھم زورگری ءِ رِد ءَ گون بیتگ چریشی ءِ گلام کتگیں مھتر ایران ءَ چہ یوکرائن ءَ بازیں جاہ وتی دست ءِ چیر ءَ کرتگ ءُ گلامی ءِ سنکل گُٹ ءَ لوپ کرتگ اَنت۔
اے دویں مھترانی میان ءَ دگری ھمے بیتگ کہ روس ءَ لینن ءُ ٹراٹسکی ءِ وھد ءَ بالشویک پاٹی جاڑیگ بیتگ کہ گوستگیں بازیں وھداں زانشتی ءُ راجداری ءِ گپانی رِد ءَ یک بُرزیں وڑے ءَ مھکمی ءِ دروشم ءَ آشوبی بنھِشت ایر ایش کرتگ ایش وھدیکہ ھندوستان ءَ کمیونزم یا مارکسزم ءِ زانشت ءَ وت ءَ نہ رسینتگ نوزدھمی کرن ءَ پلیھانوپ ءِ دروشم ءَ روس ءِ سرڈگار ءِ سر ءَ مارکسزم ءِ زانشتی بلکیں ایوک ءَ نامان نہ بیتگ بلکیں اے زانشت ءَ وت ءَ مھکمیں دروشمے ءَ جَد ءُ جھد ءِ بن ھِشت ایر کرتگ اَنت ۔
اے جَد ءُ جھد اود ءِ پَٹ ءَ روس ءِ پوریاگرانی تاں وتی کلوہاں سر کنگ ءَ بیتگ اود ءَ زانشتی لڑ ءَ روس ءِ آشوب ءِ کرد ءِ سر ءَ ھم جوانیں گپ ءُ ھبر بوھگ ءَ بیتگ ھمے گپ ءَ ھبرانی سبب ءَ ٹراٹسکی ءِ زانشت ءَ ھمک دمان ءَ آشوب ءِ رنگاں وت ءَ پاشارینتگ چریشی ءِ منگ ءُ ایر کنگ نوزدہ سد ءُ ھَبد ءَ لینن ءُ ٹراٹسکی ءِ سروکی ءَ آشوب بنگیج کنگ بیتگ ۔
دوھمی نیمگ ءَ ھندوستان ءَ برتانیائی راج ءِ بگیری ءَ اُلس ءَ زھر درشانتگ اشی ءِ پدراھی بازیں میڑاھی جاک ءُ سلوات ءُ جنزانی دروشم ءَ گندگ بیتگ اَنت ۔
بلے کمزانتیانی سبب ءَ اے جنز سامراجی زور ءَ چہ آجوئی ءِ گرگ ءَ سوبین نہ بیتگ اَنت روس ءِ آشوب ءَ پد ھندوستانی آشوب ءِ لڑ ءَ کمیونسٹ ءِ زانشتی ءِ سر ءَ منوکانی بن ھِشت بیتگ ءُ ایشی ءِ ھمراھی ءَ ھم ھندوستان ءِ آجوئی ءِ جنز کہ ھما زانشتی ءِ بن ھِشت ءِ آیگ ءَ بندات بیتگ اَنت کہ آئی ءِ بن ھِشت نہ ایوک ءَ برتانیا ءِ سامراج ءِ راستی ءِ کردار ءِ پولکاری ءِ رد ءَ اتک کنت بلکیں ھندوستان ءِ چاگرد ءِ تہ ءَ جاڑیگیں جتائیں تکاں چہ پدر بیتگ۔
ھنچش بلوچ ءِ آشوب ھم دنیا ءِ آشوبانی وڑ ءُ پئیم ءَ وتی گاماں جنان اِنت ءُ دیم پہ منزل ءِ نیمگ ءَ روان اِنت بلوچ ءِ اے نوکیں جنز ءَ پہ آجوئی ءَ دراجیں مُدت ءِ نہ بیت بلے پہ گلامی ءِ سنکلانی ھاتر ءَ اے سک ءَ دراج اِنت پرچاکہ گلامی یک ھنچین نادراھی ءِ آئی ءِ کَش ءُ گورانی نِندگ ھم وش نہ اِنت ۔
بلوچ ءَ ھم وتی اشوب ءِ تہ ءَ ھنچیں پوریاگر ءُ نیزگار ھوارینتگ اَنت کہ آ ھِچ ءَ وڑ ءَ دم برگے نام ءَ زانگ نہ اِنت گوستگیں روچانی گپ ءَ بہ کن ئے یا گوستانک ءِ بلے جنز ھنچش دیمتر ءَ جنزان کنت آئی ءِ کسھانی پریچگ وش اِنت گوستگیں روچاں ماں بلوچ بامرداں کراچی ءَ بلوچ ءِ سرڈگار ءِ پل پانچیانی تہ ءَ دزمانجنیں چائنہ ءِ ایم بی سی ءِ سر ءَ اُرش کرتگ ءُ وتی ھون پہ زمین ءَ تلامینتگ اَنت ۔
اے اُرش ءَ نا ایوک ءَ کراچی جنزیتگ بلکیں پاکستان ءِ کُنڈ کُنڈاں ھوار چائنہ ھم پچ لرزینتگ اَت۔ ھمے سماہ بوھگ ءَ ایں بلوچ ءِ جنز ءَ یک ھنچیں گام ءِ جتگ اے درستیں گاماں چہ دراج تِر اِنت پرچاکہ دنیا ءِ رسانکاں ھوار ھمک مردمے دپ ءَ بیتگ کہ بلوچ لبریشن آرمی ءِ بامرداں چینی “قونصل حانہ ” سر ءَ اُرش کرتگ ءُ چائنہ ءَ ھوار دنیا ءِ ایندگہ استھسالی کمپینیانی واست ءَ یک ٹوھیں کلوہ ءِ بیتگ ۔
ھنچش واجہ برز کوھی ءَ وتی تحریر ءِ تہ ءَ بگھت سنگ گوں دو کامریڈانی ءُ رازق جان گوں دو کامریڈانی سر ءَ یک جوانیں چمشانک ءِ داتگ ھنچش ھمے وڑ ءَ ھمے سھیں ورناھانی دیمھونی ھم پہ بلوچ ءَ سوگات اَنت پہ بلوچ ءِ باندات ءَ سوگات اَنت پہ بلوچ ءِ گیریت ءُ ننگ ءَ سوگات اَنت
گیرکار اَنت یات رازق جان بھارانی
گیرکار اَنت یات رائس جان زبادانی
گیر کار اَنت یات اَزل جان ڈیھے ھرسھیں شھیداں ھوار بلوچستان ءِ درستیں شھیداں سھر چکیں دروت
بلوچستان آجو بات
بلوچ آشوب ھست ءُ ابدمان بات
