الوداع جنرل اسلم
نوشت: سمیر جیئند بلوچ
دی بلوچستان پوسٹ
داہیت راستءِ کہ موت بر حقءِ ہندن داہیت ہم راست ءِ کہ فکر و نظریہ ہچو وختس کسپک بلکہ وخت ئتون اوار پین سوگوْ ءُ روتہ خلسہ مونا کائک اگہ دُن مفروس تو اینو جہان نا بھلا بھلا ہستیک ارسطو ،سقراط ،افلاطون ،کارل مارکس، چے گویرا،ہوچی منہ تون اوارنیلسن منڈیلا و ایلو سدا آتا کچ ئٹ فلاسفر سیاستدان و سائنسدان آتا پنک مخلوق و کائنات آ بادشاہت کتوسہ۔اگہ ہندا وڑ جہان نا عظیم انگا بندغاتانبار اسہ
وار تینا بلوچ راج نا ہنوکا تاریخ آ چک خلین تو ننے حمل ،جیئند،خان محراب خان ،میر علی دوست ،داد شاہ ،علی محمد مینگل ،نواب اکبر خان ،غلام محمد ،بالاچ مری ،استاد سدومری ،جنرل شیروف و مائی گل بی بی تون اوار ہزارآ پنک دوئی مریرہ کہ اوفک تاریخ نا نہ بیرہ پنہ غا تیا جاگہ دوئی کریر بلکن اینو یا بروکا ہزارآسالتان ہم پد اوفتا پن تے بروکازنک ہم فخراٹ کاٹم ءِ بڑز کریسہ نہ بیرہ یات کروبلکن اوفتا کڑدارءِ بیان کرسہ بروکا زنک کن ہم محفوظ کرور۔
اگہ نن اینو بلوچ راج نا بیرہ داسانا ہفتاد سال یعنی ناپاک انگا ریاست پاکستان نا قوضہ غا نظر شاغنگ کن تاریخ ءِ پٹ پول کین و بلوچ نا پاکستان نا ظلم نا خلاف مزاحمت و کڑدارءِ اُرن تو ننے بے مٹو کڑدار دوئی مریک کہ اوفک دشمن ءِ ہروخت ہنداخہ مجبور کریرکہ اوفک تینا پتنک آتے مچ کننگ نا حدآ سرمسرو او فک آخرٹی بیوس مرسہ قرآن پاک نا پنا بلوچ ءِ مجبور کریر کہ اوفتون جنگ آن بیدس گپ تران کیر ،تاریخ شاہدءِ کہ بلوچ تینا مڑدی و تینا انسان دوستی نا دوآن مکار انگا دشمن ءِ قرآن پاک نا خاطرآن ہیت گپ کننگ کن وخت تسر دا چائنگ آن بیدس کہ کنا دشمن پنجاپی قرآن و نیاڑی نا قدر آن بے سما ءِ ولے تینا بلوچی شان ءِ یلہ کتور کہ دشمن میڑ ہیسنءِ گڑا اودے وختءِ ۔دانا مثال نن بابو عبدالکریم خان و بابونوروز خان نا دروشم ئٹی دوئی کننگ کینہ کہ اوفک پاکستان و پنجاپی ءِ جنگ نا وختا ہم وخت تسر ولے پنجاپی شرف نا وخت ءِ باتس و تینا شیطانی آگڑدار ءِ نشان تس وگوازی کرے ولے داپاکستان نا شیطانی چال اونا منافقی ءِ پاش کننگ کن بلوچ تینا پیرنگا تا قول ءِ گیرام کتوکہ دشمنی چاہے سدآ سال گذرینگے تینا بیرے اوڑان ہلوئی مریک ۔اوفک بلوچی قول تون اوار دا ہم گیرام کتوس کہ داسا نہ بیرہ دشمن آن بیر ہلوئی بلکہ اونا برجا انگا قوضہ ءِ ہم ایسرکروئی مریک ۔ داڑکن صفحہ بندی نا بناء کننگادا صفحہ ٹی غلام محمد بلوچ، بالاچ شہید ،استاد اسلم ،ڈاکٹر اللہ نذر تون اوار بھازا سرمچاراک تینا کاٹم تیا کفن ءِ تفیسہ پاکستان تون جنگ نا نہ بیرہ پڑوءِ کریر بلکہ عملاًاوفک داہیت ءِ پاش کریر کہ دا جنگ نا ایسر ہمو وختا مروئے ہرا وخت پاکستان اونا غلیظ انگا پنجاپی فوج تینا بیرم تے مچ کریسہ دا ڈیہہ آ ہنو۔
دا مسخت کن ایلو سنگت آتانبار گوریلا پنی آاستاد اسلم ہم تینا کاٹم آکفن ءِ تفیسہ دشمن ءِ جنگی پڑآن ہلیس سیاست نا پڑ اسکان نہ بیرہ دک خلکر بلکہ اسہ ہندنو زنک ئس تیار کریر کہ ہرا دے و نن ناپاک انگا فوج و ملک ئنا زیہ آ ملخموت آنبار بیست چار گھنٹہ سلنگ نا بناءِ کرے۔اوفتا رہبری و استادی نا مثال ءِ نن دُن دوئی کننگ کینہ کہ پاکستان و چین نا بربادی کن اوفک تینا جغر نا ٹکراو بھلا مار ریحان جان ءِ اسہ ملخموت ئس جوڑ کریر و راہی کریر کہ جہان نا مون آ بلوچ نا زیہا دا ملک آتا ظلم پھاش مرے۔نن فخرٹ پاننگ کینہ کہ استاد اسلم شان ئٹ سقراط آنبار زہر ئنا پیالہ (شہید ریحان جان) کنگر ولے تینا مزاحمت آن اسہ گام ئس ہم پد ی متوس۔ دامزاحمت نا دوئی کننگ کن اوفتا جغر ناٹکر نا گچین کننگ نا بابت راقم اوفتان سوج کریر کہ استاد دا زہر نا پیالہ ءِ نم امر گٹان تینا گذریفیرے ؟تو اوفک فخراٹ پاریر سنگت شاید نم نظریہ ءِ دائسکان پہہ متنرے یا نم اسہ باوہ سے نا حیثیت ئٹ دا سوج ءِ کیرءِ ؟دا ہیت راستے کہ اسہ باوہ سے نا حیثیت اٹ دا فیصلہ کننگ بھاز کبین ءِ ولے ہراوخت نظریہ مونا بریک تو دا فیصلہ راج نا غلامی نا مونا ہچو حیثیت ئس تخپک ،ہندن شہید ریحان جان ہم اسہ مارسے نا حیثیت ئٹ کنتون فیصلہ یا مشورہ کپک بلکہ اسہ فدائیں بلوچ سرمچارو قومی سپاہی نا حیثیت ئٹ صلاح و مشورہ کیک تو داڑے کنا باوئی آحق مونا بفک بلکہ اسہ سرمچار کامریڈ اسیناحیثیت اٹ کنے اودے رخصت کروئی مریک۔ہندن کنا ایمان ءِ کنا ایلو مار یا مسنک نظریہ نا بنیات آہندا کسرءِ گچین کیرہ تو ای اوفتے ہم اسہ سنگت و استاد ئسے نا حیثیت اٹ نیک دعاکیوہ وشان اٹ رخصت کیوہ۔داکان بیدس اگہ ای باوہ نا حیثیت ئٹ مچٹ پدی چک ہم خلیو تو ای او کنا چناک غلامی نا تہٹی خن ملانن ای اوفتیکن دا تغ ءِ ہم خننگ کپرہ کہ ای اوفتے خوانفنگ، انجینئر ،پائلٹ ،فلاسفر سائنسدان جوڑ کننگ کیو۔داڑے دا عظیم انگا حستی گلوگیر مریک۔۔۔۔۔۔ایلو دم ٹی اوفک کنے نظریہ نا بابت لیکچرتننگ نا بناء کیرہ۔اوفک درشان کیرہ کہ کنا بھلا تغ ہندادے کہ کنا تینا چنا یا کنا کامریڈ و فکری ءُ سنگت ئسے نا دوآن کنا راج نا لخان غلامی نا طوق مر مریک تو ای پہہ مریوہ کہ کنا چناجہان نا علم ءِ ہم دوئی کرے او ماڑی گاڈی تا مالک ہم مسک و جہان نا بھلوفلاسفر،سیاست دان ،انجینئر ،ڈاکٹر ،وکیل و سائنسدان ئس ہم جوڑ مس۔
داہیت آتان گڈ کنے لوزدوبتو، بیرہ اسہ قومی سپاہی ئسے آنبار اوفتیا فخر کننگ اوفتے سلامی تننگ آن بیدس ہچ ئس پاننگ کن کنتون سلیتو۔اسہ ساہت اسیکن کنے لگا کہ کنا ڈیہہ و کنا بیوس آبلوچ راج ناپاک انگا ملک نا دوآن آجو مس۔او وختا کنے اسہ ساہت ئس آجوئی کن دوبس ولے اینو ہمو ساہت اسہ پورو امیت ئس کنامونا جوڑ مسنے کہ واقعی استاد نا ہیت راستے ننا تغ و خواہش آتا پوروی ڈیہہ نا آجوئی تون گنڈو کے و آجوئی نا کسر نا دوئی کننگ استاد نا فلسفہ ٹی ساڑی و دوئی مریک۔یقیناًدافلسفہ ءِ اوفک ننکونا نابوداتیکن ہلار کہ اگہ نن ہندا فلسفہ نا پیروی کین تو دا کسر بھاز مرغن سلیپک بیرہ داڑکن دتر تروئی مریک دنکہ اوفک تینٹ ایترہ۔
اگہ نن انسان نا تینا عمر نا بابت ٹک خلین تو دا بھلا کائنات ٹی بھاز چنک شاید مورینکان ہم زندچنک نظر بریک ولے ہراوخت آ انسان نا نظریہ نا زیہا نظرئس بٹنہ تو مونا فلسفہ غانبار اونا قد ئنا مونٹی کائنات مورینکان ہم چنک نظر بریک یعنی نظریہ ہنداخہ مرغن شابیت او کڑنب کائک کہ نہ بیرہ ساڑی انگا انسانی زنک بلکہ لکھ آسال تیان گڈ ہم بروکا انسان اوڑان سبخ ہرفک و سرسہبی نا پلوآ گام خلنگ نا بناء کیک ۔چاہے دا مزل انسانی غلامی نا مرے یاسائنسی ایجادات و ایلو فلسفہ غاتا ہر وڑنا پڑا سرسہبی اونا مونا سجدہ کننگ آ مجبور مریک۔دا بلوچ راج نا خوش بختی ءِ کہ بیست پنچ سال اوفک اسہ بے مٹو فلاسفر و ہنینو جنگی و سیاسی و استاد سے آن ،غلامی نا طوق ءِ لانت ءِ تینا لخان کشنگ نا نظریہ و فکرءِ دوئی کیرہ۔ہندن اوفک دا ہم احساس ءِ اوفتان دوئی کیرہ کہ اوفک امرکہ تینا زندٹی اوفتا ہمراداری ءِ کریر جسمانی جتائی آن پد ہم اوفک ہمووڑ اوفتیتون ہمراہ داری کننگے۔استاد نا تروکا نظریہ داسا ہر سرمچارءِ دا ہم احساس ءِ تننگ ئٹی سرسہب مسنے کہ درو سرمچار اوفتا جسمانی ساڑی مننگ نا سوب آن تینے داخہ ذمہ وار سرپند متوکہ او ذمہ واری ہرفنگ نا ہم شاید کوشست کتوکہ ولے اینو اودے احساس مریک کہ استاد نا فلسفہ غان بیدس اونا ساڑی مننگ وسفر ٹی ہرفوکا بڈءِ ہم کنے دوکوپئی کروئی مریک۔دا احساس اوفتے سرسہبی نا پلوآ گام خلنگ کن بیوس کیک۔داسا بلوچ سرمچار آتا ذمہ واری ءِ کہ اوفک تینا و تینا سنگت آتا حفاظت کن استاد ناقومی جسمانی نخسان آن مونی انت سبخ ہیل کیرہ کہ اوفتیکن اسہ بلوچ سرمچارو استاد اسینا نا منہ دے پین زندہ مننگ و رہینگ المّی ءِ و اونا قومی خواستءِ یا نہ شہید ی ٹی؟ دا فیصلہ نا وخت اینوءِ ننے استاد اسلم نا پاک انگا دتر نا سوغند ہرفوئی مریک کہ نن اول تینا سرمچارءِ دشمن نا نذر او قہر آن رکنگ کن مروکاکوشست کرون و اونا جان نا حفاظت کن اول تینا کاٹم ءِ ندر کرون ہندن دنو ہچو خام خیالی ئس بروکا وختا کپرون کہ ہراڑان بلوچ راج نا آجوئی نا مزل مر تمسہ کائے۔ اللہ پاک تینٹ پائک اے انسان تقدیر نا تینا دوٹی ءِ اودے نی تینا حق یا مخالف ٹی کارمز کیس دا نا جندنا وس ئٹی ءِ۔ کاش استاد اسلم کم سے کم بیست پنچ سال پین جسمانی زندہ مروس غلام آ قوم بلوچ کن اسہ اللہ پاک نا ٹیکی ئس و دشمن کن خاخر و دوزخ اس ئس۔نن کاٹم ءِ شیف کریسہ تینا قومی رہبر استاد ءِ اونا ایلو شہیدآسنگت آتے سلام پیش کینہ کہ نن نما جسمانی جتائی کن اوغنگ نا جاگہ غاکاٹم ءِ فخراٹ جِک کریسہ نمے الوداع کینہ کہ نما بدلہ ءِ دشمن آن بلوچ راج ناآجوئی نادروشم ئٹی دوئی کرون، انشاء اللہ۔
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان میڈیا نیٹ ورک نا دا ہیت آتے مننگ الّمی اَف و نئے کن دا ادارہ نا پالیسی تا درشانی ءِ کیک۔
