عزت جان ءَ سالے سرجم بوت
ھمل بلوچ
دی بلوچستان پوسٹ
عزت جان ءَ مرچی یک سالے سرجم اِنت انگت بیگواہ اِنت. عزت جان دگہ ھرابیں گپ نہ جتگ بلکن ءَ یک نودربرے گل ءِ سنگتے بوتگ بلوچ راج ءِ سر ءَ بوؤکیں زُلم ءِ گپ جتگ بلوچ نودربراناں تچکیں راھے پش داشتگ پمیشکا مرچی زندان ءَ بندیگ اِنت ءُ پاکستان ءِ تھ ءَ راستی یک گناھے جوڑ بوتگ۔
عزت جان یک انسان دوستیں مردُمے اَت ءُ مدام انسان ءُ انسانیت ءِ گِپ جَتگ. پاکستان ءِ تھ ءَ اے کُلیں گُناہ جوڑ بوتگ اَنت . عزت جان یک ایماندار ءُ مخلصیں سنگتے اَت .وتی کوم ءِ بزگی ماریتگ ءُ عزت جان ءَ وتی کوم ءِ بزگی ءُ لاچاری بدھالی دیستگ گُڑا لاچارئیں راج ءِ واستا جدوجھد کُرتگ وتی راج ءِ گلامی نہ منّ اِتگ۔
عزت جان یک زانتکار ءُ پوئیں سنگتے اَت وتی نودربرانی رھشونی ءَ کنگ ءَ اَت. عزت جان ءَ پاکستان برداشت نہ کنت گُڑا 15 نومبر 2017 ءَ پاکستانی رینجر ءُ آئی ایس آئی عزت جان ءَ گوں نسیر جان ،احسام ،رفیق بلوچ ءَ ھوار بیگواہ کن اَنت ءُ مرچی سالے سرجم اِنت کہ انگت ھچ وڑیں ھال اِش نیست. پاکستان ءِ تھ ءَ بزگیں راج ءَ ھچ وڑیں کَدر نیست ءُ مرچی پاکستان ءِ دست ءَ بلوچ ماشٹر ،ڈاکٹر، وکیل ، نودربر، بزگر ءُ چونیں ھم بلوچ تبک ءَ مردم ھست اَنت پاکستان آواناں گار ءُ بیگواہ کُتگ اَنت ۔
کُجام کبزہ گِیر کہ وھدے وتی کَبز ءِ مُحکم کنگ لوٹ اِیت گُڑا ھما کہ مظلومیں کوُم بنت آوانی دُود ءُ ربیدگاں، رسم ءُ روج ءُ آوانی زبان ءُ زمین ءِ پچ گِرگ ءِ واستا وڑ پہ وڑئیں پندل ساز اِیت ءُ زُلم کن اَنت ءُ آواناں چہ وانگ ءُ زانگ ءَ چہ دُور کنگ ءِ واستا ھما راج ءِ نوجوانانی آوار جنگ ءَ بندات کنت ءُ آواناں ازاب جاہ ازاب دیگ ءُ مھلوک ءَ را ذہنی گُلام جوڑ کنت دانکہ بزگیں راج چہ تُرس ءَ ھاموش بہ بیت۔
مرچی مئے ءُ شُمئے دیم ءَ ھمے درور اِنت کہ پاکستان گوں بلوچ نودربراں چے کنگ ءَ اِنت ھمروچ مئے وانِندہ پُسگاں آوار جنگ ءَ اِنت آ زاکر مجید، زاھد بلوچ، عزت بلوچ ، نسیر بلوچ، حسام بلوچ، شبیر بلوچ ،آمر بلوچ ءُ ادگہ بازیں نودربرے بیگواہ اِنت مرچی پاکستانی ٹارچر سیلانی تھ ءَ بندیگ اَنت ءُ بیگواھیں مردمانی کئول ءِ مردم آ عامر ءِ گُہار انساہ ،نسیر بلوچ ءِ جَنِک ماہ رنگ ءُ شبیربلوچ گہار سیما بلوچ مرچی 13 روچ اِنت کہ کوئٹہ ءَ شُدھرتالی بُنجل ءَ نِشتگ ءُ دَگانی سر ءَ زھرشانی کنگ ءَ اَنت. مرچی کَس ھمے مردمانی گَپانی گُشدارگ ءَ تیار نہ انت. ما ھمے گَپ ءَ جَن اِیں کہ دگُنیا مئے گَپاں گوش نہ داریت دُگنیا وتی جاہ اگاں چون اِنت بَلے ھمے پاکستان ءِ کاسگ چٹیں بے زمیریں بلوچ چمچہ کہ پارلمینٹ ءَ نیندوک انت آوانی گوشاں بوڑے ھم نہ وارت کہ اِد ءَ مئے گھار وتی تنگوھیں براتانی مات وتی تھسوپیں بچانی شوھاز ءَ اَنت بَلے اے کاسگ چٹ ھچ نہ مانگار اَنت کہ مرچی اے انسان اَنت پاکستان ءِ دست ءَ بیگواہ اَنت۔
مرچی مئے بلوچ راج ءِ سر ءَ زُلم بوھگ ءَ اِنت بَلے دگنیا ھاموش اِنت اے ھاموشی پہ دگنیا ءَ یک سوالی نشانے کہ مرچی عزت جان ءَ گوں سنگتاں سالے بیت انگت بیگواہ اَنت۔
دی بلوچستان پوسٹ : اے نبشتانک ءِ تہا درشتان کُتگیں ھیال ءُ لیکہ نبشتہ کار ۓ جندءِ گنت، الم نہ اِنت کہ دی بلوچستان پوسٹ رسانک نیٹورک ایشانی منوک بہ بیت یا اگں اے گل ءِ پالیسیانی درشانی اِنت۔
