بلوچستان میں ہونے والے عام انتخابات میں نیشنل پارٹی کے بعد بلوچستان نیشنل پارٹی عوامی کا بھی جھالاوان عوامی پینل کے سربراہ شفیق مینگل سے اتحاد
دی بلوچستان پوسٹ نیوز ڈیسک کو موصول ہونے والی اطلاعات کے مطابق پچیس جولائی کو ہونے والے عام انتخابات کے حوالے سے پی بی 36 سوراب سے شفیق مینگل نے ظفر زہری کے حق میں دستبردار ہونے کا اعلان کردیا۔
تفصیلات کے مطابق سوارب کے حلقہ پی بی 36 کے اُمیدوار شفیق مینگل نے بلوچستان نیشنل پارٹی عوامی کے نامزد اُمیدوار ظفر اللہ زہری کے حق میں دستبردار ہونے کا اعلان کر دیا ہے۔ جبکہ این اے 269 خضدار سے بحثیت آزاد اُمیدوار بی این پی عوامی شفیق مینگل کی حمایت کرے گی۔
واضح رہے2013 کے انتخابات میں ظفر اللہ زہری نے شفیق مینگل کو بھاری اکثیریت سے شکست دی تھی اسکے علاوہ بلوچستان نیشنل پارٹی عوامی اور سابق مخلوت حکومت کا حصہ رہنے والے نیشنل پارٹی کو سیاسی حریف سمجھا جاتا ہے۔
یاد رہے شفیق مینگل پر الزام عائد ہوتا رہا ہے کہ وہ بلوچ مسلح دفاع نامی ایک ڈیتھ اسکواڈ کی سربراہی کرتے ہوئے، بلوچ قوم پرست سیاسی کارکنوں کے اغواء اور ٹارگٹ کلنگ میں ملوث رہے ہیں اور توتک میں اجتماعی قبروں کا ذمہ دار بھی انہیں قرار دیا گیا تھا جہاں سے 169 مسخ شدہ لاشیں برآمد ہوئیں تھیں۔
