شہید حمید نا وصیت
نوشت: بیبرگ بلوچ
دی بلوچستان پوسٹ – براہوئی کالم
تو پہ سررانی گُڈگ ءَ زِند ھیالان ءَ کُشے؟
پہ سندگ ءَ داشت کنے پُلان چہ بو تالانی ءِ؟
شہید حمید بلوچ اسے مکمل ءُ انقلابی ءُ بندغ اس ئس اس، سامراج دژمن اس ئس۔ ہفتاد نا دھائی ٹی کہ عمان نا فوج ٹی بھرتی مننگ ءِ سامراج نا چمبازی اس سرپند مریسہ اونا خلاف توار ارفے، حالانکہ دا ہمو وختاک ئسر کہ بلوچ قوم نا ہر ورنا روزگار نا پد رند اٹ تماسُس، عمان نا فوج ٹی بھرتی مننگ بلوچ قوم نا ورنا تیتون اوار اوفتا لُمہ باوہ کن اسہ تُغ اس ئس ولے شہید حمید ہمو انقلابی ئس کہ او تینا عقائد آتیٹی چلینگاکہ، نظریہ تون وفادار مس۔ اونا نظریات و عقائد آک انت ئسر دافتے او تینا آخری وصیت اٹ نوشتہ کیک۔
کیچ تربت نا اسہ خلق کُنچتی ٹی ودی مروکا حمید بلوچ ڈگری کالج تربت نا اسہ طالب علم اس ئس، بلوچ قوم کن بلوچ ورنا و خوانندہ غاتیکن جدوجہد کروکا تنظیم بلوچ اسٹوڈنٹس آرگنائزیشن تون تعلق داری تخاکہ۔
1979ء نا وہی ٹی عُمان حکومت بلوچ آتے بھرتی کننگ نا بندات کرے۔ گُڑا حمید بلوچ چے گویرا نا دروشم اٹ مظلوم و محکوم قوم سینا دڑد ءِ محسوس کریسہ دا بھرتی نا خلاف جنگ نا بندات کرے، او دا گڑا نا خلاف ئس کہ بلوچ قوم اسہ مظلوم و محکوم سینا حیثیت اٹ عمان نا فوج ٹی بھرتی مریسہ اسہ پین مظلوم و محکوم سیتون جنگ کے۔ گڑا دانا خلاف جہد کریسہ حمید بلوچ ءِ عمانی آفسر سینا زی آ مروکا جلہو سینا سازش اٹ دزگیر کریر۔پاکستانی ملٹری کورٹ ٹی مقدمہ ءِ چلیفسہ گڈ سر اٹ دا بلوچ قومی جہد کار ءِ 11 جون1981ء ٹی پاہو تریسہ شہید کننگا۔
دا کان اسہ وار ولدا پاکستانی سامراج نا خلاف بلوچ ٹی ہرا نفرت ودی مس او دائسکان برجاءِ۔ دا نفرت دے پہ دے آن زیات مریسہ ءِ۔ بلکن بلوچ قوم شہید حمید نا گڈیکو وصیت آ عمل کریسہ اونا پِن تون اونا جہد ءِ زندہ تخانے۔
شہید حمید نا وصیت نامہ:
”کنے دا گڑانا اسُل ہچ پرواہ اَف کہ کنا دا گدیکو کلہو یا وصیت بلوچستان نا عظیم انگاہ اُلس بلوچ اسکان سر مریک یا آخہ۔ دا وختا کہ ای دا کلہو ءِ لکھنگ اُٹ تو توفک بڈ آ پیرہ دار آک چار مہ کنڈ کنا داپار ایپار آ سلوک ءُ۔ اوفک کنا ہر حرکت، عمل آ نظر شاغنگ ءُ ولے کنا زند ئنا بیرہ 8 گھنٹہ پچانو انتیکہ داڑان پد کنے پاہو تننگ نا وخت بریک۔ فخر اٹ پاہو نا چٹ ءِ تینا لخ اٹ شاغوٹ۔ کنے افسوز نا احساس اَف و نہ کنے دانا پروا ءِ۔ انتئے کہ بے مسخت زندہ مننگ یا غلامی نا عذاب ٹی زند ءِ تیر کننگ اسےلہ لعنت ئسے۔
ای اسٹ انگا یا اولیکو بندغ افٹ کہ ہرا بلوچستان کن تینا جان ءِ ندر کننگ ءِ۔ دا وخت اسکان کئی ہزار آ بلوچ آک دا دھرتی کن ندر مسنو و مریسہ کرور۔ تینا خاہوت ٹی ای ارٹمیکو بندغ اُٹ کہ پاہو نا چِٹ ءِ لخ ئٹی شاغوٹ۔ تینا جان ءِ ہمو عظیم آ مسخت کن ندر کننگ اُٹ کہ کنے یخین ءِ کہ دا مسخت ءِ بروکا وخت ٹی ننا زنک الّمی دوئی کرو ءِ۔ کنا پیرہ داد کریم ءِ ہم برطانوی سامراج 1902ء ٹی پاہو تس.
ای دوستخواہ آ سنگت آتے پاننگ خواوہ کہ آزاتی نا وڑانگا نعمت آک بیدس ندر مننگ آن ہلنگ مفسہ، کم از کم کنے تاریخ نا خواننگ آن پد دُنو ہچو مثیال اس ملپک کہ ہرا قوم آک بیدس ندر مننگ آن آزاتی ءِ دوئی کرینو۔ آزاتی و خود مختاری نا کسر بھاز مشکل و سخت ءُ کسر ئسے ولے ہرا مِزل ننا و نُما کسر آ اُروک ءِ او مِزل اسہ بھاز عظیم ءُ مِزل ئسے۔ اگہ آزاتی تینا گام تے پدی تریسہ اُرے آ برے ولے کنے اُمیت ءِ کہ کنا مسڑ بی بی بانڑی کہ ہرا نا عمر بیرہ 3 سال ءِ یا کنا ءُ کنا نواسہ غاک دا آزاتی ءں تینا خنتیٹی خنور گُڑا ہمو دے گواچنی کنے آسراتی رسینگو۔
شہید حمید بلوچ مچھ جیل 10 جون 1981ء
