بلوچ قوم نا سکرات شہید حمید بلوچ
نوشت: عابد بلوچ
دی بلوچستان پوسٹ – براہوئی کالم
تاریخ ناپنہ غاتیا عظیم فلاسفر سکرات نا قصہ نوشتہ ءِ۔ سکرات اسے اندنو فلسفہ سینا خواجہ جوڑمس ہرادے اینو اسکان جہان نا حقیقی آ راہشونک تینا زند نا مسخت جوڑ کرینو۔ ہرا وخت کہ سکرات تینا وخت نا جابر آتا دوٹی مس حق نا ہیت ءِ کننگ نا جرم اٹ، تو اودے ہمو وخت نا گڑاس لغور، خلیس وجوفہ نا کمک اٹ اودے پاریر کہ نی حق و راست نا آن تینا باہ ءِ بند کر گڑا نی بچیسہ، اگہ چپ کتوس تو نا زند ایسر مریک ولے سکرات تو زند نا اصل مسخت آن واخب ئس، اودے اندا سما ئس کہ جہان بیرہ دے ءِ نن و نن ءِ دے کننگ کے دا زند جوڑ متانے بلکہ اندا زند نا اصل مسخت تینا زند و ایلو بندغ آ تا زند نا خیالداری و حق و راست ءِ چاگڑد اٹ ہمیش کن زندہ تخننگ نا ءِ۔ سکرات ءِ اندا حق و راست نا دَرک کننگ نا جرم اٹ زار نا پیالہ ءِ نوش کریفیر۔ اندا‘ زار ناپیالہ ءِ گلم کننگ آن سکرات ہمیش کن جہان ٹی زندہ سلیس۔
آخر وخت اسکان ہمووخت نا سامراج آتا دلال آک تینا وس ءِ کریر سکرات ءِ پاریر کے معافی خواہ، آئندہ حق و راست نا تران آن چُپ کر ولے سکرات اسے زندہ او پن اس کٹنگ کن و حق و راست نا دروشم ءِ ہمیش کن جہان نا مون آ نشان تننگ کن نہ معافی خوائس نہ کہ تینا تران آتیان چپ کرے۔
بلوچستان نا دھرتی آ ودی مروکا شہید حمید بلوچ دا صدی نا سکرات جوڑ مس۔ دا فرزند سکرات نا ڈول تینا مسخت کن پاہو نا چٹ ءِ بُک ہلک موت تون بغل گیر مس ولے تینا سوچ و فکر آن پدی متو۔ وخت نا بلوچ دشمن کوزہ گیر ریاست نا دلال آک شہید حمید بلوچ ءِ پاریر کہ معافی خواہ، نے پاؤ آن بچیسہ ولے حمید بلوچ لمہ وطن نا بہادر وفادار اولیاد سینا کڑد ءِ دوئی کننگ کن تینا وصیت نامہ ٹی نوشتہ کرے ’’کنے دا ہیت نا ہچو پشیمانی اس اف ،نہ کہ دا ہیت کنا خیال اٹی بسونے کہ کنے کہنگ آن زندہ سلوئی ءِ، انتئے کہ اگہ زن بیدس مسخت سیکن تیر مرے یا غلامی ٹی تدینگے تو دا اسے لعنت ئسے‘‘۔
شہید حمید بلوچ تینا لمہ وطن نا آزاتی کن تینا زند ءِ ندر کرے۔ بلوچ قوم و جہان نا محکوم آ قوم آتے شعور اس بشخا، او شعور غلامی نا زند نا پلویڑ آن پیشتمنگ نا ئس۔ غلامی نا زند اسے لعنت ئسے، دا لعنت نا ایسری کن اگہ جان ءِ ندر کروئی تمہ تو ندر کبو تا ۔ نہ تو داڑان چپ مننگ نسل سینا تباہ مننگ نا ءِ۔ سیاسی میدان اٹ قوم ءِ آزاتی نا قدر و قیمت آن بلد کبو۔ شہید حمید دا کلہو ءِ مچا قوم اٹ تالان کرے۔ اندا سوب آن اینو اسکان بلوچ قوم نا ورناک آجوئی ءِ دوئی کننگ کن ہر میدان اٹ جہد کننگ ءُ۔
ہرا ڈول سکرات زار نا پیالہ ءِ گلم کننگ نا وخت آ تینا اُرا، اولیاد و ایلو زند ئنا آسراتی تے پد بٹے اندن شہید حمید بلوچ ہم قومی آزاتی کن تینا اُرا، چنا، سیال و سیالداری تے پد بٹے۔ او تینا زیبا غا بانڑی ءِ یتیم کرے ولے دا گڑا ءِ سگیتو کہ کنا قوم غلام سلے۔
شہید حمید بلوچ تینا وصیت نامہ ٹی اسے بھلو راز وگواچنی سینا درشانی ءِ کرے او نوشتہ کرے کہ دا روشن آ سہب (آزاتی) ءِ بلکن کنا مسہ سال نا کودک آ مسڑ بانڑی یا کنا نواسہ غاک خنور گڑا ہمو دے کنے آسراتی دُو برو ءِ۔ حمید بلوچ اندا راز آن بلوچ قوم ءِ واقف کریفے کہ دا آزاتی نا پند اسے مرغنو پند ئسے، اسے بھلو جہد ئسے۔ دا اسے پنت ئسے بلوچ قوم نا راہشون تیکن کہ دا آزاتی نا دے تے بلکن ننا بروکا چین خنے یاکہ اوڑان ہم پد ئنا چین خنے ولے دا جہد ہچو وڑ و ڈول سیٹی بیدس مزل نا سرمننگ اسکان ایسر مفک۔ بلوچ قوم بایدے داسہ سرپند مرے کہ داٹی پِن، نرگسیت نا ہچو گنجائش اس اَف بلکن دا کسر مخلصی، ہمت، حوصلہ و جیرت خوائک۔ ننا ورنا تا ہم خیال اٹ دا مرے کہ آزاتی قربانی آن بیدس دوئی مفک۔ داٹی ذاتی، علاقائی، قبائلی تعصب نا ہچو گنجائش اس سلتنے، داسہ مچا جہد کار آک اسے دو مرسہ تینا مزل کن پند خلیر تانکہ تینا مسخت اٹ سرسہبی خنیر۔
