امریکی ریاست میری لینڈ میں واقع ایک اخبار کے دفتر میں ایک شخص کی اندھادھند فائرنگ کے نتیجے میں 5 افراد ہلاک جبکہ 20 سے زائد زخمی ہوگئے۔
دی بلوچستان پوسٹ نیوز ڈیسک رپورٹ کے مطابق فائرنگ کا واقعہ ریاست میری لینڈ کے علاقے ایناپولس میں اخبار ’کیپیٹل گزٹ‘کے نیوز روم میں پیش آیا۔
فائرنگ کرنے والے حملہ آور کو بھی حراست میں لے لیا گیا، جس کی شناخت 38 سالہ جیروڈ راموس کے نام سے ہوئی۔
ملزم نے نیوز روم میں ہینڈگن سے اندھادھند فائرنگ کی، جس کے قبضے سے اسموک ہینڈ گرینیڈز بھی برآمد ہوئے۔
واقعے کے وقت عمارت میں 170 کے قریب افراد موجود تھے۔
رپورٹس کے مطابق ملزم کا اخبار ‘کیپٹل گزٹ’ سے دیرینہ تنازع تھا اور اخبار نے ملزم کے خلاف جولائی 2011 میں ایک مضمون شائع کیا تھا۔
دوسری جانب اخبار ‘کیپٹل گزٹ’ کو گذ شتہ روز سوشل میڈیا پر دھمکیاں بھی دی گئی تھیں۔
میری لینڈ کے گورنر لیری ہوگن نے ٹوئٹر پر اپنے پیغام میں کہا کہ وہ اس واقعے کے بعد شدید صدمے میں ہیں۔
دوسری جانب امریکی صدر ڈونلڈ ٹرمپ کو بھی واقعے پر بریفنگ دی گئی۔
ٹرمپ نے اپنے پیغام میں متاثرین اور ان کے اہلخانہ کے لیے نیک خواہشات کا بھی اظہار کیا۔
